Fryma evropiane pa opozitë

Zgjerimi i BE-së me anëtarë të rinj nga 15 në 25, po çon në realizimin e Evropës së lirë e të plotë, duke lënë pas të kaluarën dhe realizuar projektet e së ardhmes sonë të përbashkët. Këto janë zhvillime historike për kontinentin tonë. Unë jam i lumtur t'ju pohoj këtu se në Shqipëri fryma europiane nuk ka opozitë. Megjithatë, ne nuk mund të mos themi që bashkimin tonë me Evropën na e ngadalësojnë e vonojnë disa faktorë ku nga më kryesoret janë: haraçi i lartë që jemi të detyruar t'i paguajmë prapambetjes dhe plagëve të trashëguara nga e kaluara diktatoriale si dhe nga kostoja e lartë, e ardhur si pasojë e konflikteve dhe destabilizimeve në rajon. Le të kujtojmë vetëm pas 1999, kur Shqipëria priti mbi gjysmë milionë refugjatë kosovarë të deportuar nga regjimi i Millosheviçit. Ne bëmë detyrën ndaj vëllezërve tanë të një gjaku, por në të njëjtën kohë kontribuam në shmangien e një krize të rëndë humanitare në rajon dhe përtej. Ky realitet ka ndikuar në frenimin e investimeve, ashtu siç ka qenë një faktor për shtimin e papunësisë dhe të varfërisë. Ndaj ndihma dhe solidariteti juaj i gjithanshëm sot janë sa të mirëpritura aq edhe të nevojshme.

Ne jemi një vend që 12 vjet më përpara dolëm nga një diktaturë shumë e egër, ndër më të egrat në Europë. Si të tillë e njohim shumë mirë dhe e kemi të freskët rrezikun e diktaturave, po ashtu edhe rrezikun e terrorizmit, i cili këtë 10 vjeçar ka sjellë pasoja të rënda për të gjithë Ballkanin. Nisur nga këto motive ne i konsiderojmë veprimet kundër terrorizmit të ndërmarra nga Aleanca me në krye SHBA si mjaft të rëndësishme për mbrojtjen e civilizimit europian dhe të paqes në botë. Gjykojmë se është koha të mendojmë më mirë dhe më shumë sesi të shërohen plagët e të shkuarës në Irak, të shkaktuara nga diktatura dhe lufta. Ne urojmë dhe shpresojmë se Europa do ta kalojë sa më shpejt dhe më mirë divergjencat e krijuara kohët e fundit. Kjo është në të mirë të një të ardhmeje më të sigurt të kontinentit tonë të vjetër si dhe në favor të forcimit të lidhjeve transatlantike. Fatmirësisht tani jetojmë periudhën postkonfliktuale në Ballkan dhe një erë e re e bashkëpunimi ka nisur dhe po zgjerohet midis vendeve tona. Në këtë klimë të re, vendet tona të rajonit po përballojnë sfida të ngjashme e të njëjta për integrimin, siç janë hendeku në nivelin e zhillimit të vendeve tona me Evropën dhe problemet që lidhen me korrupsionin dhe krimin e organizuar. Ne jemi të vetëdijshëm se këto fenomene negative janë si barërat e këqija që rriten në një terren të përshtatshëm për to, siç janë papunësia, prapambetja ekonomike dhe varfëria. Dhe për t'i shkulur ato është e domosdoshme që ky terren të "kultivohet" - çka arrihet përmes investimeve dhe zhvillimit të gjithanshëm ekonomik e shoqëror. Prandaj ndihma dhe mbështetja e juaj do të na ndihmonte të mos biem në një rreth vicioz, ku zhvillimi dhe progresi ynë të mbeteshin peng të korrupsionit dhe të krimit të organizuar.