Rugova e Daci do të shkojnë në Vjenë

-- nga Faton Osmani

Ndërsa bisedimet vazhdojnë, mendohet se kryeministri Rexhepi e lideri i PDK-së Thaçi do të pranojnë

PRISHTINË – Kryetari i Kosovës, Ibrahim Rugova, i është përgjigjur pozitivisht ftesës së kryeadministratorit Harri Holkeri për të marrë pjesë në takimin e Vjenës, që mbahet të martën e ardhshme. “Presidenti Ibrahim Rugova e ka marrë këtë vendim në bazë të mandatit të tij, që e ka me Kornizë Kushtetuese, sipas të cilës, në bashkërendim me PSSP-në, presidenti e përfaqëson Kosovën dhe i ushtron të drejtat dhe detyrat e veta në pajtim me dispozitat kushtetuese”, - thuhet në njoftimin e zyrës për shtyp të kryetarit të Kosovës, të lëshuar të premten pasdite. Ndër këto dispozita, sipas kësaj zyre, më themelorja është se presidenti i Kosovës, në bashkërendim me PSSP-në, merr veprime në fushën e marrëdhënieve të jashtme. Rugova është lideri i parë kosovar i cili i thotë “po” takimit, i cili shënon fillimin e dialogut Prishtinë – Beograd, siç thuhet për çështje praktike. Shefat e zyrave të SHBA-së dhe Britanisë në Prishtinë kanë zhvilluar gjatë ditës së djeshme një sërë takimesh me liderët kosovarë në përpjekje të marrin qëndrimin përfundimtar rreth takimit të Vjenës.

Mersi Ris dhe Mark Dikinson janë takuar me kryeparlamentarin Nexhat Daci, liderin e PDK-së, Hashim Thaçi dhe atë të AAK-së, Ramush Haradinaj. Përfaqësuesit e zyrave perëndimore kanë theksuar se takimi i Vjenës është me interes për Kosovën dhe kanë shprehur shqetësimin e vendeve të tyre për vonimin e harmonizimit të qëndrimeve të lidershipit kosovar, si dhe për kompletimin e delegacionit. Ndërkohë edhe kryeparlamentari Nexhat Daci pas një takimi njohës që ka patur me komandantin e ri të KFOR-it, gjeneralin Holger Kommerhof, ka deklaruar se “fillimi i dialogut në Vjenë është një rast unik që Kosova t’i marrë përgjegjësitë e veta”. Supozohet se edhe kryeministri i Kosovës, Bajram Rexhepi dhe lideri i PDK-së Hashim Thaçi do të binden për të shkuar në bisedimet e Vjenës. Ndërsa Ramush Haradinaj, në një konferencë për gazetarë pas takimeve, deklaroi se “mënyra se si mund të sigurohet pjesëmarrja në Vjenë, por edhe për një proces të suksesshëm, është nënshkrimi i një rregulloreje nga ana e Holkerit për ndërtimin e ministrive në sferat në të cilat ka kërkuar qeveria e Kosovës”.