Familja e tregtarit Mhill Gjuraj, me një mall të pashuar për Kosovën

-- nga Klajd Kapinova, Manhattan, New York

STAMFORD (CONNECTICUT)
Një shi i lehtë përkëdhel xhamat e makinës dhe pas një ore vranësirat zhdavariten, duke i lënë vendin rrezeve të diellit që shpërndajnë aromën e stinës së luleve...
Makina rrëshqet me shpejtësi në drejtim të pjesës veriore, duke lënë pas New York-un, për të hyrë në qytetin e ri Stamford drejt shtetit Connecticut.Stamfordi është një qytet i ri, i ndërtuar shpejt dhe populluar për banim gjatë 30 vjetëve të fundit. Sipas të dhënave të përafërta të shqiptarëve (që jetojnë në qytet me rrethina), banojnë 2500 shqiptarë.
Afrohem pranë shtëpisë së re të familjes Gjuraj dhe sapo futem brënda ndjehem si në shtëpinë time. Ndonëse është një shtëpi tipike amerikane, brenda ambienteve të saj antarët e familjes flasin gjuhën shqipe. Në odën e miqve, shquhet një çifteli, disa fotografi familjare dhe punime artistike që Mhillit ia kanë dhuruar miqtë dhe shokët e tij. Kurse librat thotë kryefamiljari, i kam blerë që fëmijët, nipat, mbesat, të mos e harrojnë gjuhën e nënës... Babai Gjoni e nëna Filja, kujtojnë se të parët u shpërngulën prej Pukës në fillim të shekullit XIX, për t’u vendosur në pjesën perëndimore të Kosovës. Ato kanë jetuar në katundin Sferrka e Thatë në komunën e Pejës deri sa morën udhën e kurbetit. Për t’i ardhur në ndihmë ekonomisë së familjes, Gjurajt janë marrë me bujqësi e artizanat. Dyert e familjes kanë qenë gjithnjë të hapura për komitët që vepronin ndër male, si Ndue Përlleshi me shokë, në luftë kundër pushtuesve serbë e komunistë.

Me valixhen e emigrantit drejt ShBA-së

Familja ka dalë nga Kosova në gusht të vitit 1972. Gjurajt janë 10 antarë. Gjoni e Filja kanë rritur fëmijët: Hana, Mirja, Zoja, Filja, Lajdja dhe vëllezërit Mhilli, Krista dhe më i vogli Toma. Ata në fillim nisën për Itali, ku vendosën në qytetin verior Attina. Këtu, ata punojnë e jetojnë për 16 muaj, derisa i miratohet kërkesa për të shkuar në SHBA.
Fëmijët e Gjonit dhe Files sot janë të martuar. Ata kanë nipa e mbesa dhe së bashku festojnë gëzimet e familjeve. Të gjitha motrat e Mhillit janë të martuar me shqiptarë. I vetmi vëlla i tyre, Tomë Gjuraj (1976), ka lindur në Stamford CT, kur familja kishte 3 vjet që jetonte në Amerikë.
Dy vëllezërit Toma e Krista, kur u rritën u fejuan në Kosovë dhe sollën nusët në Amerikë. Ata sot jetojnë të lumtur me fëmijët dhe tregtinë e tyre. Më 1973, për arsye të sundimit të pushtuesve serbë në Kosovë dhe për një jetë më të mirë, prindërit me fëmijët emigrojnë. Asokohe Mhilli ishte 16 vjeç, kur zbret në ‘tokën e premtuar’. Ata vendosën për një muaj në një nga lagjet e Bronx-it. Aty e kanë zanafillën e jetës së tyre artistë të famshëm në historinë e kinematografisë amerikane.
Për fëmijën e madh Mhillin ka shumë punë dhe pak kohë e lirë. Në Amerikë iu desht më shumë impenjim për të siguruar jetesën me prindërit, motrat e vëllezërit e tij.

Ecejakjet Stamford - New York dhe anasjelltas

Më 1973 në Stamford Mhilli punësohet në restorantin "T.R Restorant", duke punuar 16 orë në ditë. I pyetur për fillimet e para në punë ai thotë: "E kam pasur në fillim të veshtirë. Duke qenë i ri dhe djali më i madh i familjes, punoja e mësoja anglisht. Kam larë pjata dhe isha shumë i lumtur që kisha gjetur punë për të ndihmuar familjen me shumë antarë."
Familja më vonë lëviz drejt Stamfordit, ku jetojnë për 8 vjet. Ecejakjet nuk kanë të sosur nga Stamfordi në New York dhe anasjelltas. Ata rivijnë në Pelham Pkwy në Bronx dhe pasi qëndrojnë 3 vjet i rikthehen Stamfordit. Këtu, ai fillon punën si shofer në një kompani ndërtimesh, duke marrë një pagë shumë të mirë.
Familja përben për te një fazë të rëndësishme të jetës private. Më 1977 fejohet dhe po atë vit martohet me Agen me një darsëm të madhe në Bronx. Ai të ofron i gëzuar fotot që i ruan si kujtime të përjetshme.

Udhë e vështirë, por e bukur në tregti

Gjatë vitit 1978, Mhilli blen së pari një shtëpi në Stamford, ku jetoi vetëm dy vjet me vajzën e vogël Linda. Sërisht ndërron punë dhe punësohet në "Pitney Bowes", një kompani që merrej me dërgimin e pullave postare në Stamford. Për 19 vjet me radhë qëndron në kompani, ku siguron familjen e re dhe rrit mireqënien. Për Mhillin, tregtia, familja dhe ndihma për vendlindjen do të bëhen triemër i pandashëm dje dhe sot në ShBA.
Gjatë viteve është shtuar me fëmijë djem e vajza. Ai u gëzua shumë për lindjen e Zefit, Marjanit dhe vajzës Lorja, të cilat i shtuan më shumë gëzimet familjare. Gruaja e tij Agia qysh me ardhjen në Amerikë më 1978 punësohet për 7 vjet në një fabrikë telefonash. Agia një nënë e dashur dhe amvisë e mirë, me lindjen e fëmijëve i përkushtohet punës si shtëpiake. Por tregtari shet e blen. Kështu më 1981 Mhilli shet shtëpinë në Stamford e kthehet në New York. Ai blenë një pallat të ri me 25 banesa sëbashku me një ebrej si dhe një shtëpi private për vete në Pelham Pkwy. Babai Gjon e nëna File, përkujdesën për pallatin e blerë. Katër vjet më pas, më 1984, duke parë me kujdes ecurinë e tregtisë bën shitjen e pronave të vet dhe merr një fitim të konsiderueshëm. Me të ardhurat e financiare rikthehet në North Stamford dhe blen një shtëpi të re me 15 dhoma, ku jetojnë babai, nëna ,dy vëllezërit dhe familja e tij. Krista ishte i ri, ndërsa Toma ende fëmijë. Mhilli blen dy shtëpi të tjera në Stamford. Në vitin 1987, tregtari rikthehet përsëri në Bronx dhe blen një pallat me shumë apartamente.

Fati e udhëheqë në jetën e tij

Në vitin 1995 në Pelham Pkwy pas një pune të madhe e zgjeron tregtinë, duke blerë një pallat tjetër. Në fillim të vitit 1996 për herë të parë hapë një zyrë "Gjuraj Reality Management Office" 2706 Williams Bridge Rood Bronx, New York 10467.
Kur e hapi zyrën iu desht të lëshonte punën, ku punonte për 19 vjet. Tregtia e tij po pësonte një sukses. Fryt i saj është blerja që bën në vitin 2001 të një pallati tjetër me shumë apartamente në Pelham Pkwy.
Ai e ka filluar tregtinë me 25 banesa dhe sot ka në pronësi 200 apartamente, ku banojnë me qira shumë bashkëkombas. Pas disa kohe në vitin 2002, hapë një kompani të re për shërbime në ashensor me emrin: "UPLIFT Elevator Corp.", ku ofron shërmbime të kualifikuar nga specialistë profesionistë për 24 orë pa pushim. Klientëve u shërben shpejt, me çmime të arsyshme dhe çdo defekt riparohet me specialistë me shumë përvojë në këtë fushë.
Mhilli flet me shumë respekt për partnerin e palodhur e të aftë në tregti amerikanin z. John Lubina, i cili qysh në fillim pa ngurrim, ka qenë i gatshëm për të bashkëpunuar me tregtarin shqiptar. Ai i nderon dhe respekton shqiptarët, për ndihmën që i japin në tregti.
Mhilli me bujari ka blerë një shtëpi private dhe ia ka dhuruar vëllaut të vogël Tomës, me të cilin sot jetojnë nëna e babai. Ato në festa e gëzime familjare rimblidhën për të gëzuar sëbashku. Mhilli, ndihmoi vëllaun Kristen për të blerë shtëpinë e tij në Stamford. Ai është i lumtur, se njerëzit më të dashur të zemrës kanë ecur përpara dhe ruajnë një harmoni e gëzime në fisin Gjuraj.

Fëmijët një gëzim i përhershëm për Mhillin e Agen

Linda Gazivoda, është vajza më e madhe e Mhillit. Ajo ka lindur më 1979 në Stamford. Linda punon në një zyrë me babain e vet si administratore e tregtisë së tij. Ajo thotë se ka mbaruar shkollën e tregtisë në vitet 1997-1999. Shpesh ka punuar si shitëse e rrobave "Lord &Taylais" dhe në zyrën e avokatëve si sekretare në Stamford në vitet 1998-1999. Njohja e fejesa me djaloshin shqiptar Nikollë Gazivoda sjellë në verën të vitit 1999 martesën që gëzon shumë prindërit e vet. Çifti i ri, ka një vajzë të vogël simpatike Briana në moshën 2 vjeç.
Zef Gjuraj, është djali 20 vjeçar që ka lindur në Stamford. Ai ka mbaruar High School. Pasioni i tij është çiftelia dhe shpesh ka kënduar këngë popullore sa herë që janë organizuar festivale nën përkujdesin e kishës katolike "Zoja e Shkodrës" në Hatsdale NY. I pëlqen të merret me sport, një kënaqësi që e ushtron çdo ditë në sallat e forcës në qytetin ku banon. Ai gjatë ditës punon pranë bisnesit të babait në zyrën e tij.
Marjan Gjuraj, është djali i dytë 18 vjeçar që ka lindur në New York. Kur e pyet, ai shprehet se vijon shkollën e mesme të përgjithshme dhe është i dhënë pas librave. Ai ka dëshirë të vijojë shkollën e lartë në degën e bisnesit muzikor për disqe.
Gëzimi dhe hareja e familjes, është vajza e vogël Lorja Gjuraj, që sapo ka mbushur 14 vjetorin e lindjes. Ajo vazhdon studimet në një shkollë publike në Stamford. Eshtë shumë inteligjente dhe çdo ditë përpiqet që të mësojnë të flasë shqip bashkë me babain e nënën. Mësueset e shkollës flasin me shumë respekt për vajzën e vogël të Mhillit...
Mhilli është bujar dhe me modesti përgjigjet, se "çdo njeri nga ne e ka për detyrë për të ndihmuar Kosovën, mbasi atje kemi lindur e jemi rritur. Kosova si shtet i pavarur, është gjithnjë në zemrën time".