Ceremonia e fejesës së çiftit të ri Robyn Laguardia me Pal Gojanin

-- nga Klajd Kapinova, Manhattan, New York

NEW ROCHELLE (NY).
Në hotelin ‘Surf Club’, që i ngjason një shtëpie antike aristokrate amerikane, u organizua ceremonia e fejesës së çiftit të ri Robyn Laguardia me Pal Gojanin. Në hollin e restorantit zonja Ennet Laguardia (nëna e vajzës), një amerikane e mbajtur, me plot elegancë u thotë shqiptarëve: "Mirë se keni ardhë" dhe "Welcome" për të rinjtë amerikanë që vinin në darkën e shtruar nga Robyn & Pali.
I mbuluar nga emocionet Pali tregon se sot janë të ftuar në darkë miq, shokë të tij dhe të familjes Laguardia.
Robyn ka emocione dhe me miqtë e Palit flet disa fjalë shqip. Ajo e gëzuar u tregon vajzave unazën e shtrenjtë që i dashuri i ka dhuruar. Robyn është një vajzë e bukur 17 vjeçare që vijon studimet, ndërsa Pali një simpatik me pamje fisniku sot mbush 22 vjet.
Tullumbacat me ngjyrat e ylberit e kanë kthyer sallën në një mjedis intim,ndërsa dritat me ngjyrat e zbehta, e bëjnë më romantike këtë mbrëmje të jashtzakonshme.
Në tavolina, krahas mënysë së gatimit, shquhen dy zemra të ngrira në akull me gërmat e gdhendur "R" (Robyn) dhe "P" (Pali).
Tinguj të muzikës së njohur të këngëtarit italo-amerikan Frenk Sinatra në italisht e anglisht bënë për vete 200 të ftuarit. Një zemër e madhe ishte formuar në sfondin ku qëndronte i ulur çifti.
Buzë detit, rreth dritave me ngjyra, filloi riti i fejesës, duke marrë në fillim bekimin nga dom Nikolin Përgjini, i cili kishte ardhur enkas për të uruar e bekuar çiftin... Më pas zonja e organizimit të darkës Ennet Laguardia, përshëndeti miqtë e ftuar dhe i uroj fejesën vajzës dhe dhëndrit. Ajo tha se ishte shumë e lumtur në këtë ditë bashkë me vajzën tjetër të vogël, miqtë dhe të afërmit e familjes.
Në një çast udhëheqësi i muzikës ftoi miqtë të dëgjojnë nga goja e çiftit mënyrën se si i shprehin dashurinë njeri tjetrit, duke shkëmbyer unazat. I pari gëzimin e shprehu Pali. Ai u drejtua nga vajza që dashuron dhe me qetësi i tha: - Robyn a më do mua? Ajo shumë e lumtur pohoi: "Yes" dhe në shqip shtoi: "Pal unë të dua!".
Një surprizë e këndshme mbuloi sallën, kur fishekzjarret shumëngjyrëshe shpërthyen në të gjitha tavolinat me zambakë e karajfila... Çifti del për të kërcyer valësin e dashurisë, duke u ndjekur nga çifte të reja amerikane e shqiptare. Grupi i kamerierëve të shërbimit nën tingujt e muzikës së lehtë amerikane, dhuroi shampanjën e dashurisë së çiftit.
Një suprizë të këndshme kishte menduar zonja Laguardia, e cila me delikatesë afrohet pranë Robyn e Palit të ulur në karriget e bardha dhe u jep në duar nga një zarf. Në sallë menjëherë mbretëroi heshtja. Drejtuesi i muzikës thotë se duhet të hapen zarfet dhe të thuhet me zë se çfarë surprize fshehin ato... Një tronditje nga befasia dhe buzëqeshje e natyrshme shpërtheu nga të dy të dashuruarit, që përqafohen të lumtur në krahët e njeri tjetrit. Muzikanti tha se zonja Annet, ka bërë si dhuratë për Robyn e Palin nga një makinë "Mazda 2003". Zonja lëshon dhe një surprizë tjetër. Ajo tha se Pali ka një gëzim të dyfishtë, mbasi sot ka ditëlindjen.
Dritat shuhen gradualisht dhe çifti rifillon të kërcejë, duke mbajtur në dorë karajfila të kuq me llambushka të ndezura. Salla mbulohet për disa minuta me shumë drita të vogla që përcjellin në errësirë ngjyrën e kuqe të dashurisë... Orët e minutat kalojnë me shpejtësi nën tingujt e muzikës së lehtë amerikane, italiane, të cilat shpesh zëvendësohen me muzikën shqiptare, ku miqtë e Palit e ndjejnë vetën si në shtëpinë e tyre. Keny me Terry-n, Arbeni me Floren, Gjini me Meritën, urojnë dajën e tyre për fejesën me lumturi të përhershme. Në orët e vona të mbrëmjes, kur njerëzit përshëndeten për t’u larguar, Robyn e Pali shpërndajnë dhurata simbolike mes tisit të bardhë të dëborës që kishte disa minuta që binte...