Është nder dhe privilegj të përfaqësoj flamurin shqiptar në atletikë

-- nga Klajd Kapinova

MANHATTAN
Labinot Shaqir Gashi ka lindur më 1985 në katundin Pavlan në komunën e Pejës. Djaloshi shqiptar ka një shtat elegant sportisti dhe sjellje të thjeshtë me të gjithë ata që i afrohen për të ditur diçka nga aktiviteti i tij. Si shumë emigrantë, familja e tij u vendos në ShBA në vitin 1995. Ata prej 8 vitesh ndodhen në Astoria të New York-ut. Së bashku me vëllanë e tij Erzenin vijojnë High School Metropolitan ‘Christ the King’, një shkollë private në Queens. Ai vijon vitin e tretë të shkollës, duke udhëtuar 10 milje me autobus për një orë e gjysmë larg nga shtëpia e tij. Të dy vëllezërit merren me futboll amerikan e atletikë.
Labinoti me të ardhur në Amerikë, u regjistrua në shkollë dhe filloi të merret me sport, një ëndërr që e ka pasur qysh fëmijë. Prej tre vitesh ushtron mbretëreshën e sporteve, sikurse quhet atletika. Në vitin e parë të shkollës, pas garave të atletikës, bëhet fitues i vendit të parë duke marrë trofenë e parë. Gjatë garave të shkurtëra dhe të gjata të shpejtësisë, është përpjekur të ulë kohët e mëparshme të vendosur nga atletë të moshës së tij gjatë garimeve mes shkollave. Duke shfletuar kujtesën e dy viteve më parë, ai thotë se provat e para në kërcim së larti i ka bërë me shkelje të vijës së bardhë (faull), kurse për herë të tretë ka arritur sukses, duke marrë përgëzimet e trajnerëve të ekipit. Gjatë garave në pistë përherë kujton porositë e para të trajnerit amerikan, i cili i ka thënë: "Vrapo më shpejt dhe përqëndrohu në finale. Mendo vetëm për fitore dhe të arrish në finish i p ari".
Për herë të parë ka bërë një kërcim hedhje 5 metra, që sipas garuesit ka qenë një rezultat i kënaqshëm. Ai ka qenë i vetmi atlet që ka pasur rezultatin më të lartë për moshën e tij në të gjithë New York-un, duke ndihmuar me 6 pikë ekipin e shkollës kampion. Për rezultatet që ka arritur, ka shumë kërkesa, për ta pasur anëtar të ekipeve universitare.
Në vitin e dytë të shkollës ka qenë kampion në atletikë për garën 400 metra me pengesa. Deri më sot ai ka koleksionuar në shtëpinë e tij 47 medalje, tre strofe dhe një fitore kampion si ekip i shkollës në futbollin amerikan. Familja gjithnjë e ka përkrahur në rrugën e tij të sportit, ndonëse futbolli amerikan është pak i rëndë. Ai, asnjëherë nuk ka shprehur zhgënjim në sportet të cilat i ushtron me pasion. Gjatë tri viteve të fundit ka pësuar dy herë lëndime të rënda, por falë ndërhyrjeve të mjekëve i kaloi me sukses. Atleti, ka punuar shumë në seancat stërvitore individuale, duke pasur përherë pranë tranierin kroat Antoni Turkoviq, i cili ka qenë dy herë kampion botëror në "kickboks".
Turkoviq merret me përgatitjen e djaloshit shqiptar gjatë lëndimeve dhe falë punës së tij intensive për dy javë u rikthye në terren. Labinoti thotë se mjeku i tij, pas operacionit është habitur për kurajon e tij, duke thënë me keqardhje se Labinoti "nuk ka mundësi të futet në sport nga lëndimet e rënda gjatë ndeshjeve".
Duke e pyetur se nëse i kërkohet në të ardhmen të përfaqësojë ngjyrat e kombëtares shqiptare në atletikë, sportisti i ri thotë se është një kënaqësi e nder për të fituar një vend nderi me ngjyrën e flamurit shqiptar. Labinoti mendon që pas përfundimit të shkollës së lartë në sport, të kthehet në Prishtinë për të ndihmuar sportin e atletikës. Ai dëshiron që klubet shqiptare të atletikës të jenë në një nivel me ekipet amerikane dhe evropiane.

Garat individuale dhe rezultatet në atletikë:

Në 110 metër me pengësë ka arritur kohën 14 sekonda e 2 të qindat.
400 m. me pengesa 55. 8 sekonda.
100 m. shpejtësi 11. 2 sekonda.
200 m. shpejtësi 22. 2 sekonda.
400 m. shpejtësi 51.01 sekonda.
Në kërcim së larti ka arritur 6 m.

Në futbollin amerikan...

Gjatë sezonit 2002-2003 është shpallur kampion dhe është cilësuar si lojtari më i mirë në MVP, duke përfaqësuar ngjyrat sportive të shkollës ‘Christ the King’. Gjatë sezonit të futbollit amerikan ka pasur 11 (touchdowns) kalime të zonës për marrje të pikëve maksimale e barabartë me shënimin e golit në futbollin evropian. Labinoti ka shënuar 1600 (yards) kalime me top në sulm. Pozicioni i tij në futbollin amerikan është në rolin e sulmuesit anësor (wide reciver).
Sportisti ka pak kohë të lirë dhe me pasion të veçantë ushtron rolin e udhëheqësit muzikor (DJ), duke qenë anëtar i grupit muzikor "Music in Motion" me tre shokë e tij Rob Reznik, Steve Orlando dhe Eugene Khrompynë një lokal në Queens.