Emocionet e garës duket se i ka lënë mënjanë, pas medaljes së bronxtë që ka fituar në olimpiadën ndërkombëtare të matematikës. Për këtë arsye edhe garimi duket më i lehtë. Arlind Kopliku, është shqiptari i dytë që fiton një medalje në olimpiadën e matematikës dhe i pari në rang kombëtar. Së bashku me të në edicionin e radhës së Olimpiadën e 20-të Ballkanike të Matematikës, në grupin e shqiptarëve marrin pjesë edhe 5 gjimnazistë të tjerë. Arlindi vjen nga Shkodra. Profesorët që kanë punuar me të, madje edhe ata të Universitetit të Tiranës, shprehen se ai është një ndër më të talentuarit në matematikë, duke ofruar shanse për të fituar. “Edhe kjo është një olimpiadë e fortë. Kam marrë pjesë edhe herë të tjera. Por tani ndihem me i sigurtë, pasi konkurrimi bëhet në Shqipëri”, - tregon gjeniu i matematikës.
Përkrah tij, është Arlindi nga Tirana, i cili thotë se fituesi i ardhshëm i olimpiadës do të jetë shkodrani, fitues i olimpiadës ndërkombëtare, pasi siç thotë ai, Arlindi është talent i lindur. Fituesi i olimpiadës ndërkombëtare të matematikës, Kopliku, e sheh të ardhmen e tij në universitetet prestigjioze amerikane dhe evropiane, pas medaljes së artë që do t’i jepet nga Ministria e Arsimit në përfundim të arsim të mesëm. Pak rreshta më tutje, por këtë herë jo në garë, ndodhet shqiptari i parë fitues i olimpiadës së matematikës. Quhet Ilir Snopçe dhe vjen nga Maqedonia. Me krenari thotë se është shqiptar dhe se e ka përfaqësues vendin e shqipeve si i tillë, në olimpiadën ndërkombëtare të matematikës të vitit 1999. “Tani jam vetëm udhëheqës i grupit të konkurrentëve nga Maqedonia.
Unë dhe një pjesë e mirë e profesoratit të shoqatës së matematicienëve, kemi punuar me këta të rinj, që do të konkurrojnë në këtë olimpiadë”, - thekson Snopçe, i cili është në vitin e fundit të shkollës së lartë, për matematikë. Snopçe dhe Kopliku, e pohojnë se konkurrentët nga Ballkani janë vërtet të zotë. Olimpiada starton sot dhe në të marrin pjesë 54 konkurrentë nga 10 vende ballkanike. Ministri i Arsimit, Memushi, i pranishëm në ceremoninë e hapjes së aktivitetit më të rëndësishëm të vitit për arsimin, u uroi konkurrentëve suksese. Zëvëndësministri i Arsimit Sokol Axhemi, tha se së shpejti pritet të hyjë në fuqi një ligj i cili favorizon talentet në fusha të ndryshme të shkencës, e do të ndihmojë të rinjtë që të studiojnë në shkolla të veçanta me profesorët më të mirë të degës përkatëse.