Pse nuk vjen Nano në Shqipëri?!

-- nga Lutfi Dervishi, 14.08.2003

Askush nuk duhet të nxitohet dhe të thotë se nuk do. Fatos Nano është njeriu që vazhdimisht flet për "Shqipërinë tonë të dashur!". Kjo nuk është pak. Problemi është se ka disa pengesa objektivisht të pakalueshme që z. Nano nuk po bëhet mbarë të bëjë një vizitë në Tiranë. Axhenda e ngjeshur e pushimeve nëpër Mesdhe e ka detyruar kryeministrin të shtyjë ardhjen në Tiranë, por këshilltarët e tij garantojnë se nuk është në pyetje a?, por kur? që në shqip do të thotë se pyetja a do të vijë e ka përgjigjen po brenda, është vetëm problemi i kohës. Në gjuhën gjysëm diplomatike burime pranë kryeministrit thonë se kur të piqen kushtet z. Nano do të vijë patjetër në Tiranë.
Burimi sqaron se "pjekje e kushteve" do të thotë që kryeministri Nano të bindet plotësisht se stabiliteti institucional, politik dhe ekonomik i vendit ka hyrë në rrugë të pakthyeshme! Drejtues të organizatave joqeveritare e bashkë me to edhe zyrtarë të Bankës Botërore dhe Fondit Monetar Ndërkombëtar kanë paraqitur raporte pozitive që e rendisin Shqipërinë në radhën e vendeve të pjekura nga pikëpamja demokratike, por kjo nuk ka qenë e mjaftueshme për të bindur Fatos Nanon.
"Me letra këta e bëjnë Shqipërinë si Kaliforni, por nuk ka lindur akoma ai burrë që të ma hedhë mua", ka thënë Nano. Më pas ai ka shtuar se pa u zgjidhur problemi i ujit të pijshëm, energjisë elektrike (për Shkodrën në vecanti), papunësisë, emigracionit të paligjshëm dhe monopoleve në biznese ai nuk do të paraqitet në pikat e kalimit kufitar me Shqipërinë! Lista e kërkesave të z. Nano vjen vazhdimisht duke u shtuar!
Brenda sesionit të ardhshëm të Parlamentit që do të mblidhet në muajin shtator z. Nano pret të zgjidhet problemi i kompensimit të ish të dënuarve politikë. Në këtë pikë Nano është treguar shumë këmbëngulës dhe ka paralajmëruar se nëse nuk realizohet kompensimi një më një, jo për cdo ditë, por për cdo orë burg politik, ai do të kthejë paratë e veta të burgut! Të njëjtën ndjeshmëri kryeministri ka treguar edhe për cështjen e kompensimit të ish pronarëve. Të kompensohen deri në qindarkën e fundit me toka në bregdet!

Qeveria 1001 procka për të kthyer kryeministrin!

Qeveria shumë e shqetësuar për mungesën e kryeministrit kërkon që ai të kthehet në Tiranë. Në kuadër të këtij shqetësimi duhet parë edhe deklarata e Ministrit të Mbrojtjes Majko se po shkova në mbledhjen në Mal të Zi do të vras ministrin e Mbrojtjes së Serbisë! Majko, thotë një këshilltar i kryeministrit e ka bërë këtë deklaratë për të nxehur z. Nano që ai të vijë urgjentisht në Tiranë. Por z. Nano e ka pritur me të qeshur këtë deklaratë ashtu si radhën e parë kur i thanë se Pandi ka kërkuar një tunel poshtë Adriatikut për t' u lidhur me Italinë. Në atë kohë Nano tha: "Sa mirë që flet Pandi kështu! Media dhe ai (Berisha) do merren me të dhe jo më atë që (nuk) bëj unë. zëvendëskryeministri Meksi, që ka filluar të shfaqet shpesh edhe në uebsajtin e kryeministrisë (kur ishte Meta zëvendëkryeministër faqja ishte programuar në mënyrë të tillë që sapo të formoheshin gërmat m e t a, të refuzoheshin automatikisht nga kompjuteri)- pra zonja Meksi, ka hedhur një llaf me gjysëm zëri se nuk do të presë asnjë të huaj as edhe komisionin e negociatave me Bashkimin Europian, pa u kthyer kryeministri Nano!

Zgjidhja!