NË AMERIKË DOLI NË QARKULLIM REVISTA “PENA”

-- nga Shefqet Dibrani, Zvicër, 9 shkurt 2003.

Këtë vitë doli numri i parë i revistës “PENA”, organ i Shoqatës së Shkrimtarëve Shqiptaro-Amerikanë, shoqatë kjo e themeluar në gjysmën e parë të vitit të shkuar, falë kontributit dhe angazhimit të poetit dhe intelektualit të ri Gjekë Marinaj i cili është përfaqsues i shoqatës pran Zyrës Amerikane N.P.O. në Washington. Kryetar i saj i parë me mandatin një vjeçar është shkrimtari i njohur Naum Prifti kurse sekretar të saj janë Sami Milloshi e Luigj Çekaj.

Kryeredaktor i revistës “Pena” është Gjekë Marinaj, kurse redaktor e bashkëpunëtor janë emra të njohur si Naum Prifti, Kolec Traboini, Adnan Mehmeti, Sami Milloshi, Skifter Këlliçi, Petraq J.Pali, Qazim Rrushaj etj.

Revista hapet me studimin e Anton Çefës “Vokacioni atdhetar dhe kontradiktat e Nolit”, për të vazhduar me një intervistë të shkurtër me poetin Dritëro Agolli. Me poezi janë prezentuar Agron Tufa, Anton Çefa, Bujar Salihu, Luigj Çekaj, Adnan Mehmeti, Albana Mëlyshi, Gjeto Turmalaj, Petraq J.Pali, Uk Lushi, Dhimitër L.Gjoka, Shefqet Dibrani, Qazim Rrushaj, Ymer Abdullai, Lekë Gjoka dhe poetët e rinjë si: Elton Prendi, Zina Mroshaj; Pal Qarraj etj. Në rubrikën “Letërsi artistike” shkruajnë: Naum Prifti, Ramiz Gjini, Kolec Traboini dhe Albana Mëlyshi-Lifschin.

Ndërsa me vizione letrare me tri trajtesa paraqitet Gjekë Marinaj; “Epistomologjia dhe metamorfizmi në ndihmë të një vepre letrare”; “Dy mundësitë e probabilitetit të një poezie” dhe shkrimin “Poetët nuk vdesin-ata vetëm kalojnë në orën e njëzetepestë të ditës”, ky i fundit ka të bëjë me poezinë e poetës amerikane Emily Diskinson. Intelektuali i shquar Peter R.Prifti shkruan recensionin “Një vështrim i poezisë së Qazim Rrushajt”, si dhe janë botuar edhe dy shkrime të kësaj natyre nga Dalip Greca. Poezinë e poetit hebrej nga Ukraina e ka përkthyer Agron Tufa, duke i shoqëruar me një shkrim për autorin. Ndërsa në gjuhën angleze me poezi dhe një tregim prezentohet Edward Garcia.

E veçanta e kësaj reviste mund të thuhet se janë prezentimet e një mori librash, ballinat e të cilave ilustrojnë faqen e parë të revistës sikurse që i ilustrojnë faqet e poezive te shumë autorë. Aty këtu ka ilustrime me piktura të ndryshme, portrete autorësh dhe fotografi artistike duke e bërë revistën më tërheqse për lexuesin.