Shaip Emërllahu

MOLLËT E TETOVËS
Nëpër koncerte shekujsh
i krasiste e ujiste Tetova
Mollët e veta
si kokë kripe
të vjen të pëlcasësh
kur i sheh tutje
si i grin dhëmbi i keq
fundja
hëngrën aq
sa t’u mpihen dhëmbët
      Tetovë, 1989

MAJAT
Jusuf e Bardhosh Gërvallës dhe Kadri Zekës
majat
asnjëherë
nëpër dritaret e gjykimeve tona
nuk na shfaqen
me qafë të zgjatur
      Kërçovë, 17 janar

DROMCA JETE
nesër nëse s’luhet
valsi i shkëlqimit të syve
në dy krahë të hapet rruga
shkeljet e kujtesës
mbi të kaluarën e kërkuar
ushqejnë vetëm ngushllim
gjethi i episodit të udhës
ngrihet në gjerdan jete
kë shënjon faji
për këtë ngjitje gjethi
në atë model gjerdani
kur unë s’kam gisht
në këtë trazim
që formulon jetën
dromca hovesh
është jeta

BREZI IM
ende pa të pushuar
tambli të të rrjedhë,
qimet e flokëve
filluan të të zbardhen
ç’fat paske
o Brezi im?!

KAH PO SHKOJMË
bishti i natës
mbeti për çerdhe buklash
gjethi i mëngjesit
plasi me zor
kah tash?!
      1994

DEMANTUESIT KANË VDEKUR
të gjithë ata
që s’kanë qenë në Kala të Krujës
pëshpërisin “Shqipëria një kafshatë”
kanë të drejtë
kundërshtarët e Motit të Madh
kaherë kanë vdekur
      Krujë, 1 janar 1991

MARATONA SHQIPTARE
Tiranën
më parë se
maratonisti spartan
Athinën
do ta shkeli atë ditë
kur lajmin e rënies
së Mesjetës së ngelur
do ta shpie
vdekjen maratone do ta sfidojë
etja e madhe për të soditur
kurorën aq të pritur
tek lëshohet pas
mbi visin tim
sa vjen e provokohet
në këtë krah
Maratona shqiptare
      Tiranë, 1994

Në konkursin letrar të Qendrës kulturore "Naji Naaman" në Bejrut

Shaip Emërllahu fitoi çmimin letrar "Naji Naaman"

-- nga A. A.

Poeti Shaip Emërllahu është shpallur njëherit edhe anëtar nderi i Qendrës së njohur kulturore "Naji Naaman" të Bejrutit së bashku me fituesit e tjerë. Cikli fitues i poezive të poetit Shaip Emërllahu "Mollët e Tetovës" së bashku me një biografi të shkurtër të tij dhe një fotografi artistike këtë javë i botohet në një botim special të shtëpisë botuese "Naji Naaman" të Bejrutit

Lëtërsia shqipe sa vjen e afirmohet në botë. Keto ditë Qendra kulturore "Naji Naaman" e Bejrut shpalli fituesit e konkursit për letërsi që e hap cdo herë në fillim të vitit. Poeti Shaip Emërllahu është shpallur fitues i cmimit letrar për krijimtari "Naji Nanman" në mesin 155 poetëve konkurentë nga e gjithë bota me ciklin e poezive "Mollët e Tetovës". Kjo qendër ka ndarë edhe dy cmime tjera letrare ate të meritës ( fitues është poeti Nadine Devoille nga Franca) dhe ate të inkurajimit ( Abdur Rahman Ismail et Malak Mikhail Chnuda nga Egjipti). Në këtë cikël të përkthyer në frengjisht nga Andre Varfi janë përfshirë shtatë poezi.

Poeti Shaip Emërllahu njëherit është shpallur edhe anëtar nderi i Qendrës së njohur kulturore "Naji Naaman" të Bejrutit së bashku me fituesit e tjerë. Cikli fitues i poezive të poetit Shaip Emërllahu "Mollët e Tetovës" së bashku me një biografi të shkurtër të tij dhe një fotografi artistike këtë javë i botohet në një botim special të shtëpisë botuese "Naji Naaman" të Bejrutit.

Poeti Shaip Emërllahu është fitues i disa cmimeve letrare kombetare e nderkombetare dhe është përkthyer në disa gjuhë të botës.