SHQIPËRINË E SHPËTON PENSIONIMI I NANOS DHE BERISHES NGA POLITIKA

-- nga Zef Ahmeti, Universiteti St.Gallen, 18.01.04.

Shqipëria po kalon prej nje krize në një tjeter. Sa duket se udhëheqësit e politikës së Tiranës kanë vendosur te bëjne politikë progresive ne shërbim të popullit dhe interesit kombëtar, plasin skandalet! Me sa duket puna e ndaljes se skandaleve dhe involvimit të strukturave shtetërore ne vepra kundërligjore është berë si ajo puna kur femijet perpiqen te bejne pus per larje ne lum duke u perpjekur ta ndalin ujin, por kot, sa zihet një pjesë, uji shperthen ne anën tjeter.

Shqipëria ka nevojë për një politikë alternativë, ose udheheqës politikë që këtë traditë te deritashme të politikës shqiptare të llojit "nano" e "berisha", ta bartin në një politikë në shërbim të popullit dhe ngritjes së identitetit të tij, e me këtë ngritje te identitetit edhe ngritje të pozicionit shqiptar në politikat rajonale, në Evropë dhe botë.

Shqipëria ka njerëz që mund ta hedhin atë në binarët e duhur politikë dhe përparimtarë. Ata nuk duhet të heshtin.

Nuk mjafton te flitet nga qeveritarë për "shpallje lufte krimit". Kjo luftë kërkon veprim. Nuk mjafton te flitet për integrime evro-atlantike. Sipas realitetit sot, derisa politika shqiptare do ta fusë Shqipërinë në këto struktura, popullsia e saj nuk do të jetë më në të, ajo veç do të jetë në Evropë... derisa stukturat shqiptare bëjnë politikë të mërzitshme pa perspektivë, integrimet po bëhen me tragjedi te gomoneve, dhe involvimin e strukturave shtetërore shqiptare në këto ngjarje tragjike!

Lufta kundër krimit të organizuar kërkon luftë pemanente. Me aksione të veçanta dhe mëpastaj futja e veshëve në lesh dhe mbyllja e syve, nuk mjafton. Shërbimet Sekrete të shteteve të zhvilluara luajnë një rol shumë të rëndësishëm në qetësinë e vendit. Ku është ai i Shqipërisë?

Konfiskimi i parave të pista dhe pasurive të arritura me anë të kësaj “zejtarie” pse nuk investohen nga shteti në përforcimin e policisë shqiptare? Pse një pjesë e Shqipërisë favorizohet e një pjesë tjetër lihet në mjerim? Shteti shqiptar nuk duhet të luaj vetëm rolin e demonstrimit të forcës, por si pushtet duhet të kujdeset edhe në shërbim të ngritjes së mirëqenies së popullatës, pra t'i shërbejë popullit. A duhet të ndodhin përherë tragjedi që shteti të intervenojë, apo duhet që pushteti shtetëror të kujdeset në mënjanimin e humbjeve të qytetarëve të saj?

Edhe diaspora shqiptare po i ndien pasojat e politikës shqiptare në vendlindje. Përfaqësitë diplomatike të shetit shqiptar, bie fjala në perëndim, asnjëherë nuk kanë ngritur zërin kundra elemneteve që kanë “kriminalizuar” shqiptarët në ato vende ku jeton dhe vepron diaspora shqiptare. Kjo heshtje e diplomacisë shqiptare a do të thotë se prejudikon dakordimin e këtyre përfaqësive, se diaspora shqiptare është e tërë e kriminalizuar dhe e organizuar në grupe mafioze?!

Shqipëria ka nevojë për ndryshime! Lëvizja “Mjaft” ndoshta mund të ngrihet në një subjekt politik alternativë në politikën shqiptare. Nano dhe Berisha, në këto turbullira që po shkaktohen kohë pas kohe, ndoshta do të kontribuonin më së miri me tërheqjen e tyre nga politika. Dhe shteti t'iu ofrojë atyre vilat, ku ata do mund të shijojnë “pensionin e hershëm nga politika”.