MISTERET E PANDRIÇUARA TË NJË KOHE

-- nga Alban H. KODRA, 10 mars 2004 / TN

Këto ditë doli nga shtypi romani më i ri i poetit, publicistit dhe romanicierit Arif Molliqi, "Shënime nga arkiva e qytetit D.". Në këtë roman autori përshkruan rrugëtimin e arkivit të një qyteti brenda të cilit krimi ec nga një epokë te tjetra. Në botën reale dhe në atë të vetëdijes, ky krim përcillet gjersa më në fund kryhet, por gjithmonë duke i lënë vend krimit të ri.

Cila është rruga e krimit?

Në një kohë të gjithëfarëshme si kjo e jona, që ishte mbarësim ideologjik, ku njeriu poshtërohej, kthehej në një hije të tmershme të vetvetës, i kërcënuar nga mekanizmat e shtetit, edhepse i pafajshëm akuzohet për diçka që s'e ka kryer kurrë. Misteret ende të pandriçuara, të kësaj bote plot krime, janë të mbyllura në Arkivin e zymtë të Manastirit në qytetin D., e askush nuk guxon t'i prekë.

Sidomos, për enigmën shekullore të krimeve të ndodhura aty, askush nuk guxon të pyesë, pse ndodhin ato. Ai që interesohet për "Vulat e arta" të atij arkivi, brenda të cilave janë kodifikuar rrugët e krimit, kërcënohet dhe përfundon i dënuar ose i vrarë, siç thotë Kafka; "pa e marrë vesh fajijn".

Poashtu, në këtë roman përshkruhet një histori tronditëse për një dashuri që ingranazhohet nga shërbimi i ftohtë i një shteti, por gjithmonë duke e përdorur Manastirin në qytetin D. si mekanizëm për t'ia arritur qëllimit.

"Shënimet nga arkiva e qytetit D." është një roman, të cilin e bëjnë aktual ngjarjet e kohës sonë, pasi aty, secili e gjën figurën e njeriut të kërcënuar nga një kohe e pamëshirshme, kohë kjo për të cilën shumica ka heshtur.