"Më përtej kohërave" i Kasëm Trebeshinës

revista letrare shqiptare
kryeredaktor irhan jubica
shqipëri - kosovë - mali i zi - maqedoni
del të dielën e fundit të çdo muaji
numri i parë doli më 31 mars 2002
kutia postare nr. 1526, tiranë, shqipëri
tel: +355692132186
[email protected]
www.arsalbania.tk

njoftim për botimin e librit "Më përtej kohërave" të Kasëm Trebeshinës

"ars" merr ekskluzivitetin e botimit të veprës së Kasëm Trebeshinës

Revista letrare shqiptare "ars" njofton botimin ekskluziv të librit me tregime e novela "Më përtej kohërave" të shkrimtarit të madh shqiptar, Kasëm Trebeshina.
Për herë të parë botohet, në hyrje të këtij libri, bibliografia e plotë e Trebeshinës, hartuar posaçërisht për këtë botim. Në këtë bibliografi janë përfshirë të gjitha veprat e autorit, të botuara ose jo, të shkruara në shqip apo në anglisht. Ndarë sipas gjinive, bibliografia përfshin 30 tituj veprash poetike; një numër rekord prej 68 veprash dramatike, ku vendin kryesor e zënë dramat e më pas komeditë, tragjikomeditë, monologjet e poemat dramatike; 48 romane, përmbledhje tregimesh apo novelash, ku mund të përmenden romanet epope "Planetiada" prej 5 vëllimesh (ende i pabotuar) apo "Kënga shqiptare", gjithashtu 5 vëllimesh (botuar më 2001); nga letërsia për fëmijë në bibliografi përmenden 4 tituj; 12 tituj veprash i përkasin kritikës dhe publicistikës, mes të cilëve "Promemoria" e vitit 1953, si dhe "Skicë për historinë e letërsisë shqipe"; ndërsa nga krijimtaria eseistike numërohen 8 tituj, ndër të cilat edhe "Shkrimtari dhe diktatura", botuar në numrin e parë të revistës "ars".
Libri "Më përtej kohërave" përmban novelën prej 19 kapitujsh "Përjetësia brenda vdekjes", një arritje e padiskutueshme jo vetëm e Trebeshinës në planin e vet krijues, por dhe në krejt letërsinë shqipe, si dhe tregimet "Piramida e çuditshme" dhe "Maçoku", që mund të konsiderohen sfidë për prozën shqiptare. Duke u nisur nga episode të vogla, Trebeshina ndërton skena, subjekte e personazhe gjysmëmitikë që kalojnë mjeshtërisht lehtë nga rrafshi i realiteteve aktuale apo nga e kaluara historike në ato të prodhuar prej imagjinatës dhe fantazisë së lavdërueshme, nga njëra epokë në tjetrën, e gjithashtu, nga njëri nivel komunikimi në tjetrin, gjithmonë nëpërmjet një gjuhe të thjeshtë, pa dekore të kota e stërhollime të qëllimshme stilistike, për të dhënë një rezultante befasuese, që të shtyn në dyshime serioze mbi lidhjen e mundshme të veprës me jetën e secilit lexues.
Libri "Më përtej kohërave" i shkrimtarit Kasëm Trebeshina u paraqit para lexuesit në Panairin e 6 të Librit në Kosovë, ditën e premte, ora 10:00 në një nga ambientet e Pallatit të Sportit të Prishtinës, ku u mbajt panairi.
Lindur më 1926, Kasëm Trebeshina është shkrimtari me periudhën e krijimtarisë më jetëgjatë ndër autorët shqiptarë, rreth 66 vjet, edhe pse i është botuar deri më tash më vetëm një e dhjeta e krijimtarisë. Ndonëse njihet më së shumti si prozator e dramaturg, një pjesë të konsiderueshme të veprës së Trebeshinës i përket poezisë. Antikonformizmi i tij u bë i njohur që më 1953, por Trebeshina i përmbahet deklarimit të tij të para 50 viteve, të cilin e rithekson edhe tani, sa herë ndokush kërkon të shesë disidencën për vlerë: "Unë e kam hedhur në erë veprën time, nëse ajo ka vlerë artistike, do t'i qëndrojë kohës…". Nuk është e sigurt nëse kjo mund të merret si profeci, por e sigurt është se "Odin Mondvalsen" apo "Kënga shqiptare" janë dy nivele ende të mbërritura prej ndonjë autori tjetër në letërsinë shqiptare.
Libri, që është botim i revistës letrare shqiptare "ars", ka 152 faqe, format 13 x 20, ISBN 99927-632-6-4 821.18-32 821.19 dhe gjendet në shitje në të gjitha libraritë kryesore të Shqipërisë dhe Kosovës.