Shtegtimi shqiptar dhe përçartja e Nanos

“Popull mbyll gojën e ul kokën”. Ky është koncentrati i fjalimit të djeshëm të kryeministrit, një nga fjalimet më të padenja që një shef ekzekutivi mund të ketë mbajtur ndonjëherë në një dekadë e gjysmë tranzicioni shqiptar.

Nën një breshëri “suksesesh” të arritura në luftën kundër trafiqeve, me një litani vetëkënaqësie për pritjen e fundit që i është rezervuar në Bruksel, ky kryeministër ka artin e pabarazueshëm për të shndërruar skandalin e 9 janarit në një pikënisje optimiste për “reformat madhështore” që e presin “popullin plangprishës shqiptar”.

Sipas kryeministrit tonë, nëse ka një faj në të gjithë atë që ndodhi, nëse ka diçka që po e sabotoka planin e strategut Nano për bashkimin sa më të shpejtë të Shqipërisë me familjen e madhe europiane, ky faj s’mund të jetë veçse i atyre shqiptarëve që pranojnë të lajnë banjot e Europës. “Në Europë, - ngre gishtin qortues markezi Nano, - nuk mund të lëvizim nëse vazhdojmë ....të demonstrojmë përkushtim për punët më të rëndomta të Europës, në vend të vlerësimit të punës në Shqipëri”. Ja pra që paska midis nesh një ushtri batakçinjsh, e mosmirënjohësish që pështyjnë mbi vendet e panumërta të punës që po u ofron tash e prej shtatë vjetësh parajsa socialiste në Shqipëri, dhe preferojnë t’ju merret erzi në metropolet e qytetërimit europian. Zor ta imagjinonte i ndjeri Konica se levantinanot do të mund t’i shtynin një ditë kaq larg kufijtë e cinizmit e të përbuzjes njerëzore.

“Gallata mbaroi”, - duket sikur jep kushtrimin Nano; “Boll me trafiqe, llafe të tepërta, opozitë gernjare e parazite”, na hakërrohet kryeministri, - ka ardhur koha e reformave europianizuese…”. Po kush e ka penguar zotërinë e nderuar t’i bëjë këto reforma në shtatë vjet e sipër monopolizim pushteti? Që keni monopolizuar pushtetin? 50 për qind e periudhës së demokracisë, që nga 1990-a historike, gjenden sot të arkivuara në CV-në e z.Nano. Mos e ka penguar vallë ai shqiptari që është detyruar të shkojë e të mbledhë domate në serat greke dhe që sot i premtohen shumë klone të tjerë me anë të “reformës së lëvizjes së lirë”? Mos e kanë penguar gjë “mafiozët” dhe “fashistët” që vetë u “çorri maskën”, e pastaj po vetë i bëri ministra? Apo barrikadë e pakapërcyeshme për “reformat largpamëse” paska qenë minoranca demokratike në Parlament?

Në fjalimin e djeshëm të z.Nano, në asnjë moment nuk u shpreh as më e vogla “mea culpa” për viktimat e politikës antikombëtare që ai drejton. Në asnjë moment nuk u analizuan shkaqet reale të shtegtimit të dëshpëruar të shqiptarëve që lidhet me bukën e gojës e jo me mungesën e asaj që F. Nano e deklaron përçart si “angazhimi i qartë i të gjithë aktorëve për një jetë normale demokratike, të shoqërisë civile dhe të aktorëve të tjerë të progresit”. Në asnjë moment nuk u shpall një reformë e saktë që ta meritonte këtë fjalë, një “kantier” i vërtetë pune, një lloj aleance kombëtare për mirëqenien midis investimeve publike dhe klasës së sipërmarrësve vendas, si e vetmja rrugë për t’u dhënë një shpresë shqiptarëve që ta shohin të ardhmen në vendin e tyre.

Në mënyrën më injorante e dëshpëruese për një burrë shteti, kryeministri shpalli një “reformë në gjendjen civile”, që për të na qenkësh pa asnjë diskutim “më e rëndësishmja për çdo politikëbërje të shtetit”. Ja u bë edhe kjo reformë “duke zgjedhur më të aftët” e duke nxjerrë në rrugë, bash në skelën e Vlorës pranë skafeve që janë gati ata “më të paaftët”! E pastaj çfarë do të dalë në dritë ? A logjikon z.Nano ndopak si burrë shteti apo ka kalibrin mendor të ndonjë primati king-kong ? Si do të motivohet kjo klasë e re e administratës civile? Me të njëjtat rroga e avantazhe qesharake si ato të së mëparshmes ? Por dhe sikur më të devotshmit, më patriotët, më supermenët të ishin këta administratorë të rinj civilë, a do të vazhdonin ata t’i rezistonin për një kohë të gjatë tundimit të korrupsionit? Po, aq sa ç’mund t’i rezistojë Nano tundimit të një ëeek-endi në ditë zie kombëtare…

Asnjë grimcë minute s’e ndjen ky kryeministër, që po vazhdon të reflektojë me të njëjtën mendësi komuniste? E njëjta që synon ndryshimin e virtyteve të njeriut përpara ndryshimit të rrogave ? A s’e ka kuptuar që reformat në drejtësi, në polici, në administratë, në doganë, në SHIK, e biles edhe në qeveri janë një vrimë në ujë, janë një shpenzim kriminal i kredive të huaja, nëse nuk u vjen radha pas reformave në ekonomi ? Apo e ka kuptuar dhe bën lojën e atyre që Shqipërinë e preferojnë shaluar gomoneve? “Eshtë e turpshme, të mos kesh turp” – lexojmë këtë shpërthim revolte tek i paqshmi Shën Augustin, martir i fillimeve të kristianizmit. “Do të jetë e pafalshme që tanët të falin”, - dëgjojmë murmuritjen e mjegullës së përjetshme mbi valët e Jonit.