Fletërrufeja e Majkos dhe Lëvizja "Mjaft"

Në fillim të Dhjetorit 1990 në sallonet e Fakultetit të Inxhinierisë u shfaq një fletërrufe rinie kundër mungesës së dritave, të cilën dikush e zhduku menjëherë. Më pas sekretari i rinisë i njërit prej grupeve, i cili quhej Pandeli Majko, u thirr në Komitet të Rinisë dhe u udhëzua ta vendosë përsëri fletërrufenë, se ishte udhëzim për të shfryrë protestat e rinisë. Dhe fletërrufeja u vu përsëri në vendin e vet. Disa ditë më pas pasuan protestat reale të studentëve dhe historia e fletërrufesë "me gjasme" u harrua, por Pandeli Majko mbeti në politikë.

Ky detaj m'u kujtua dje ndërsa shikoja rebelimin e studentëve për drita para kryeministrisë. Të irrituar me papërgjegjësinë e qeverisë ndaj fatit të tyre, ata hodhën mes të tjerash parrulla të qarta politike kundër Kryeministrit, qeverisë, KESH-it si dhe u bënë thirrje qytetarëve të Tiranës për mbështetje. Megjithëse të paorganizuar dhe spontanë në protestë, oratorët që morën fjalën duket që ishin më të orientuar drejt protestës reale.

Por ajo që më bëri përshtypje ishte mbërritja e disa të rinjve të Lëvizjes "Mjaft" mes protestuesve. Me magnetofon në dorë dhe me sllogane të gatshme të lëvizjes së tyre, ata tentuan të bëhen oratorët e protestës, duke kthyer në lajtmotiv kryesor të protestës, faktin që ajo protestë nuk ishte politike. Një orator i Lëvizjes ishte aq i vendosur të përmendte këtë fjali pas çdo fraze, sa duket se kishte vajtur aty për të shmangur ndonjë keqkuptim të madh të studentëve me qeverinë. Oratori u ngjir së thëni se kjo protestë nuk është politike, se ata nuk janë aty për politikë e të tjera dokrra si këto, saqë policët që kishin dalë për t'u siguruar se mos prekej kryeministria, më ngjanin më afër studentëve sesa ky djalurçinë, i cili duke vjedhur protestën e studentëve, ishte duke u kujdesur për të mos iu shkaktuar asnjë dëm qeverisë prej saj.