GJENERATA E RE SHQIPTARE I DËRGON PETICION AUTORITETEVE NDËRKOMBËTARE PËR DËNIMIN E DHUNËS GREKE MBI EMIGRANTËT SHQIPTARË

I pyetur nga gazetari i Gazetës Bota Sot, Nënkryetarja e Degës Qëndore te New York, New Jersey dhe Connecticut Zj. Alma Uldedaj u shpreh se "Ky përbën një sukses të plotë. Kemi gjetur përkrahjen e të gjithë shqiptarëve si në diasporë dhe në Shqipëri, të cilët na kanë përgëzuar për këtë iniciativë". Në emër të Trupit Drejtues të Gjeneratës së Re Shqiptare dua të falenderoj të gjithë nënshkruesit e peticionit dhe t'i siguroj se Gjenerata e Re Shqiptare do të vazhdojë punën e nisur në drejtim të realizimit të qëllimeve që i kemi vënë vetes. Kohët e fundit kemi marrë kërkesa nga shumë shqiptarë, të cilët kërkojnë përpilimin e një peticioni edhe për çështjen Çame. Jemi të gjithë të vetëdijshëm për rëndësinë e kësaj çështje madhore, e cila do të mbajë peng marrëdhëniet ndërmjet dy popujve fqinjë"

Nënshkrimi i peticionit nga më shumë se 1200 persona nga vende të ndryshmë të botës është dëshmi e forcës dhe vitalitetit të Gjeneratës së Re Shqiptare, e cila nuk po njeh kufi. Kjo për faktin se shqiptarët janë zhgënjyer nga tranzicioni i gjatë dhe i ashpër të cilat kanë rrënuar shpresën e shqiptarëve për një shtet demokratik, zhvillim ekonomik dhe dinjitet në arenën ndërkombëtare. Nga burime zyrtare pranë kësaj organizate mësohet se tashmë Gjenerata e Re Shqiptare është përfshirë në një bashkëbisedim të gjerë me shumë shqiptarë në diasporë dhe Shqipëri si dhë ne trojet e tjera ku jetojnë shqiptarë. Shumë nënshkrues të peticionit kanë dhënë edhe mendimet e tyre për ndihmesën që mund të japin për rritjen e rolit të Gjeneratës së Re në Shqipëri dhe për çështjen shqiptare në përgjithësi.

Bashkatdhetari Tahir Veliu me banim në Kanada shprehet gjatë nënshkrimit të peticionit se: "Qeveria greke duhet të mësohet, që menjëherë të ndalojë fushatën e vrasjeve dhe torturave kundër shqiptarëve për të mënjanuar një konflikt të mundshëm ndërmjet popullit shqiptar dhe atij grek."

Z. Devis Agaraj, Student Shqiptar në Britaninë e Madhe shprehet se: "Studion që t'i japë Shqipërisë një klasë të vërtetë shkollare, duke ndihmuar në zhvillimin e traditave të vjetra dhe të një Shqipërie ashtu siç i ka edhe hije". Ai shprehet se ka kënaqësinë që të ndihmojë në këto projekte të rëndësishme.

Z. Kushtrim Gashi ështe një nga nënshkruesit e peticionit nga Shqipëria. Ai shprehet se e përkrah këtë iniciativë për të drejtat e Shqiptarëve. Ai shton se "pakica greke në Shqipëri i ka të gjitha të drejtat dhe liritë si të gjithë shtetasit e tjerë".

Greqia si vend i Bashkimit Europian ka treguar ksenofobizmin e pashpjegueshëm ndaj emigrantëve shqiptarë, duke mos u njohur atyre asnjë të drejtë ekonomike, politike dhe shoqërore. Z. Hasan Metuku, Nënkryetar i Përgjithshëm i Gjeneratës së Re Shqiptare theksoi se "Emigrantët shqiptare në Greqi nuk kanë asnjë të drejtë. Bëhet fjalë për më shumë se 500 mijë emigrantë shqiptarë atje. Shumica e tyre kanë të drejtë qëndrimi dhe të marrin pjesë në jetën politike greke. Ajo që të bën çudi është fakti se Greqia nuk njeh të drejtën e emigrantëve shqiptarë të kenë organizatën e tyre politike dhe t'u njihet e drejta si pakicë kombetare në Greqi".

Nënshkrimi i peticionit vijon protestën paqësore të organizuar nga Gjenerata e Re Shqiptare me datë 24 Janar 2004 përpara selisë së Kombeve te Bashkuara. Ky aktivitet u mbështet nga të gjithë organizatat dhe shqiptarët e diasporës. Qëllimi i kësaj proteste ishte dënimi i dhunës greke mbi shqiptarët dhe sidomos vrasjes së të ndjerit Vullnet Bytyqi.

Dr. Saimir Lolja, drejtues i Gjeneratës së Re Shqiptare në Toronto i pyetur u shpreh "se ka ardhur koha që shqiptarët të mos presin që të tjeret të bëjnë mrekullira. Nga njëra anë autoritetet greke keqtrajtojnë mizorisht dhe përdhosin dinjitetin e tyre dhe nga ana tjeter qeveria e Tiranës nuk bën asnjë hap për të dënuar këtë dhunë. Fakt për këtë është edhe turpi i rradhës i Kuvendit Popullor, i cili i ndodhur përballë ndërhyrjes greke, nuk miratoi rezolutën mbi çështjen Çame, ndërkohë që OKB ka një rezolute të tillë UNPOGA4/1995/12. Si vend i Bashkimit Europian, Greqia duhet të jetë e hapur për çeshtjen e të drejtave të njeriut".

Peticioni do i dërgohet Sekretarit të Përgjithshëm të Kombeve të Bashkuara, Qeverisë Amerikane, (Presidenti Amerikan George Bush, Sekretari i Shtetit Colin Powell), Komisionit të Marrëdhënieve me Jashtë të Kongresit Amerikan, Senatorëve të Shtetit të New York, Hillary Clinton dhe Charles Schummer. Human Rights Watch, Helsinki Organization, Grupi i Krizave Ndërkombëtare (International Crisis Group), Amnesty International, Komisionit dhe Parlamentit të Bashkimit Evropian, Qeverisë dhe Parlamentit Shqiptar, Qeverisë dhe Parlamentit Grek.