SHQIPTARËT NË MAL TË ZI - PARTNER E JO DEKOR I QEVERISË

Mendoj se ka ardhur koha qe të ndryshojë mënyra e veprimit politik, si të subjektëve politike shqiptare në mënyrë të veçantë, apo koalicionit "Shqiptarët bashkë", e jo duke u marrë me vetvehtën, sepse me sjelljet e tilla ka filluar të humbet rejtingu politik, qe do të jetë fatale për shqiptarët ne këtë mjedis multinacional

Siç është njoftuar opinioni i gjërë javën qe shkoi, pikërisht më 16 shkurt me propozim te kryeministrit M. Gjukanoviqi, ne parlamentin republikan u bë verifikimi i mandatit të disa ministrave ne kabinetin qeveritar. Një lajm i tillë nuk paraqet diçka të jashtëzakomshme, duke marrë parasysh veprimtarinë rutinore të këtij kabineti. Por, është për të habitur qendrimi refuzues i kryeministrit ndaj kërkesës së koalicionit "Shqiptarët bashkë" për pjesëmarrje ne qeveri, përmes disa ndihmës ministrave.

Shqiptarët (nuk) janë pjesëtarë të koalicionit
Ne zgjedhjet e fundit parlamentare te cilat janë mbajtur më 20 tetor të vitit 2002, siç dihet vendvotimet shqiptare kanë dhënë katër deputetë, ku nga ky numër koalicioni i subjektëve politike shqiptare me emrin "Shqiptarët bashkë", fitoi dy deputetë. Por, ky numër nuk ishte i mjaftueshëm qe të jetë kushtëzim për koalicionin e dy partive DPS-SDP, sepse këto kishin fituar më tepër së gjysmën e deputetëve të parlamentit. Andaj ne një situatë të tillë koalicioni qeveritar nuk kishte nevojë për deputetet e koalicionit "Shqiptarët bashkë".
Për elektoratin shqiptar dhe opinionin e gjërë është shumë irrituese plogështia e koalicionit "Shqiptarët bashkë", sepse nuk kanë dëshmuar se disponojnë më ndonjë strategji politike, e cila do të ishte ne favor të shqiptarëve.

Tashmë dihet se nga viti 1997, shqiptarët janë pjesëmarrës ne qeverinë republikane, ku pothuaj e kanë pasur vazhdimisht të rezervuar Ministrinë e popujve pakicë. Ne qeverinë e mëparshme nga subjektët politike shqiptare përveç UDSH qe merrte pjesë me një ministër, pjesëmarrës ne qeveri ishte edhe LDMZ, më një ndihmës ministër në Ministrinë e arsimit, dhe më një ndihmës sekretar ne Sekretariatin republikan për informata. Pa hyrë ne elaborimin e veprimtarisë së tyre, sepse një çështje e tillë meriton një trajtim të veçantë, pjesmarrja ne qeveri është e domosdoshme, por duhet një strategji e veçantë, e cila duhet të jetë ne interes të shqiptarëve, e jo te individëve apo klanëve të ndryshme.

Ne takim te kryeministri si ne dasëm
Me të drejtë pritej qe edhe ne Qeverinë e re, të dalur pas zgjedhjeve të 20 tetorit të vitit 2002, shqiptarët jo vetëm se do te kenë ato poste qe i kishin më parë, por ai numër të rritej, duke marrë parasysh se tash kemi te bëjmë jo me subjekte politike të veçanta, por me një koalicion "Shqiptarët bashkë", i cili ka edhe simboliken e vet. Siç bëhët e ditur ne mes pjesëtarëve të koalicionit "Shqiptarët bashkë" është arritur marrëveshtja qe ministri i Ministrisë së popujve pakicë të jetë nga UDSH, ndërsa nivelet tjera të ndihmës ministrave do të shqyrtohen më vonë, ne saje të ofertës nga qeveria.

Por, ne vend qe të përgatitej një kërkesë ne mënyrë urgjente për takim me kryeministrin, në lidhje mbi kërkesat e shqiptarëve për pjesëmarrje ne Qeveri dhe çështje të tjera, pjesëtarët e koalicionit "Shqiptarët bashkë", nuk treguan interesimin e duhur athua së çdo gjë është ne rregull, duke harruar premtimet e dhëna ne fushatën parazgjedhore. Madje ne takimin qe kanë pasur me kryeministrin M.Gjukanoviqi me 14 maj 2003, kanë shkuar të pa konsultuar dhe të përgatitur fare, qe thënë më së buti, i ngjason shkuarjës si ne dasëm, qe dëshmohet edhe nga kumtesa për opinion e kabinetit të kryeministrit pas këti takimi, e cila çuditërisht iu ngjason kumtesave nga periudha e monizmit.

Qasje jo serioze për çështje shumë serioze
Ndërsa është dashur të kaloj një vit nga zgjedhjet parlamentare, dhe ne muajin nëntor të vitit të kaluar opinioni është informuar, se koalicioni "Shqiptarët bashkë" ka përgatitur kërkesen ne lidhje mbi pjesëmarrjen ne qeveri ne nivelin e ndihmësministrave ne disa resore, qe janë më interes për shqiptarët dhe ate do t ia dërgoj kryeministrit. Me të drejtë bëhët pyetja, pse kaq plogështi dhe jo seriozitet për këto çështje shumë serioze. Ku qendron defekti i mos angazhimit serioz për këto çështje, qe janë më peshë për shqiptarët ne lidhje mbi pozitën dhe statusin e tyre ne këtë republikë.

Por, ne ndërkohë kur opinioni njoftohet më një kërkesë të tillë, edhe ndihmësministri i vetëm shqiptar ne Ministrinë e turizmit, shkarkohet nga funksioni dhe subjekti politik qe e ka dërguar ate (UDSH), nuk reagon në momentin e duhur, qe paraqet skandal të llojit të vet. Për momentin, shqiptarët janë të përfaqësuar ne Qeveri vetëm më një individ, pra ministrin e ne Ministrinë e popujve pakicë. Me parë edhe LDMZ, kishte përfaqësuesit e vet ne Qeveri, por me rastin e vdekjës së ndihmësministrit në Ministrinë e arsimit ne gusht të vitit 2001, ky vend i mbetur zbrazët nuk u plotësu me ndonjë kandidat tjetër, qe është dobësi e pajustifikueshme e këtij subjekti politik, sepse ai vend tash ne këtë ministri është zënë nga përfaqësuesi i boshnjakëve. Ndërsa nga viti i kaluar, ne saje te riorganizimit të tij shuhet Sekretariati republikan për informata dhe përfaqësuesi i LDMZ, mbetet pa punë duke u vetëpunësuar ne një organizatë ndërkombëtare.

Duke pritur ofertën e Qeverisë
Ne saje të gjendjës aktuale dhe efikasitetit të veprimtarisë së qeverisë republikane nuk do te jetë befasi nëse përgjigja nga qeveria koalicionit "Shqiptarët bashkë" do t'i vijë pas disa muajve. Eshtë çështje tjetër se çka do të ofrojë Qeveria, duke marrë parsysh se kryeministri iu ka lënë duart e lira ministrave qe ato vetë të vendosin për të zgjedhur bashkëpunëtorët e tyre. Megjithatë, duhet pritur oferta dhe pastaj duhet parë se si do te jetë veprimi praktik i koalicionit "Shqiptarët bashkë", qoftë në pranimin e ofertës së tillë, por edhe ne lidhje mbi përcaktimin e kuadrave përkatëse. Mendoj se ka ardhur koha qe të mendohet mirë se shqiptarët nuk kanë nevojë qe të jenë dekor i Qeverisë. Ata duhet të angazhohen maksimalisht qe të jenë partner, sepse vetëm me një qendrim të tillë mund të ruajnë nivelin dhe pozicionin e subjektivitetit politik.

Koha të ndryshojë taktikat e veprimit politik
Mendoj se ka ardhur koha qe të ndryshojë taktika e veprimit politik, si te subjektëve politike shqiptare ne mënyrë të veçantë, apo si koalicion "Shqiptarët bashkë", sepse me sjelljet e tilla ka filluar të humbet serioziteti i veprimit politik. Dhe nëse vjen deri rënia e rejtingut politik pasojat do të jenë të mëdha, sepse nuk do te jemi më faktor serioz politik, qe do të ishte fatale për shqiptarët në këtë mjedis.
Shqiptarët kanë kapacitet të mjaftueshëm profesional, intelektual dhe politik, por duhet të ekzistojë një bashkëorganizim, i cili është më së i nevojshëm ne momentin e tashëm për avansimin e pozitës dhe statusit të shqiptarëve në Mal të Zi. Eshtë koha e fundit për bashkërëndim të veprimit me një angazhim konkret ne këtë drejtim, duke lënë anash ambiciet lideriste, bajraktarizmin dhe atavizmin politik. Idetë, të cilat janë në favor te avansimit te pozitës dhe statusit të shqiptarëve ne këtë mjedis duhet te përkrahen, sepse statuskuoja politike dhe marrja me vetvehten nuk është ne favorin tonë, sepse çështja kombëtare është mbi interesat personale dhe klanore.