ZGJEDHËSIT PËRBALLË PARASË DHE MORALIT

Pasiguria elektorale ka pushtuar individin, shoqëria jonë po pret të zbardhi drita. Askush nga të intervistuarit e rradhës nuk arrin akoma të shohë qartë se si mund të dalë nga tuneli ku e kanë futur (ata).

Ndërkohë makina elektorale e PS ka filluar të shpërndajë në territor fitimin plus të prodhuar enkas për fushatën e saponisur. Po ku i gjetën tërë këto para? Mos vallë po kërkojnë të na blejnë me paratë që na vodhën duke “qeverisur”?!

Ata nuk kanë ndërmend të ballafaqohen politikisht, vëllazërisht me opinionin publik sepse janë kryekëput në defiçit me premtimet që kanë dhënë këto 8 vjet. Veç kësaj kanë edhe përgjegjësi të vjetra për të hequr nga kurrizi, si:

lufta e klasave që vazhdon akoma nëpërmjet pengmarrjes së pronës;

lufta represive që i bëhet prej kohësh ligjit dhe shtetit në mënyrë që të lulëzojë krimi dhe paratë e pista, nëpërmjet të cilave po pasurohen dhe po komandojnë pretendentët për pushtet;

Ata nuk do t’i hyjnë avazit të analizave dhe shifrave sepse do t’u duhej vetëm të inkasonin sharje dhe vendime gjyqi për abuzimet, vjedhjet, dizorganizimin e organizuar të shtetit dhe korrupsionin që vjen si pasojë e këtij dizorganizimi. Ata thjesht do të vënë në shërbim paratë tona që u bënë të tyret nëpërmjet mashtrimit dhe kështu, do të mundohen të blejnë sa më shumë vota.

Në këtë kontekst, zëri i besimit dhe i arsyes na thotë se dinjiteti dhe vota nuk shitet për pesë lekë. Pra nuk mund t’i rijepet vota të lashtëve PS dhe PD për një vend pune që vlen 150 dollarë, sepse vota vlen sa e ardhmja e fëmijëve, sa e ardhmja e vetvetes, sa e ardhmja e kombit.

Dinjiteti dhe vota e dhënë në drejtimin e duhur do të prodhonte shumë më tepër se një shpërblim nën dorë, se një kafe nëpër takime elektorale, apo sa një vend pune provizor. 500 eurot që premton të lëshojë përkundrejt një vote një kandidat për deputet, s’janë asgjë përballë forcës së votës e cila mund të të japë ty pronën tënde, vendin e punës, shërbimin mjeksor, rendin dhe shtetin për të cilët ti ke aq shumë nevojë.

Dinjiteti dhe vota jonë do të prodhonin një rend të ri shoqëror, do të prodhonin trasparencë me fondet publike dhe investimet, të cilat do shërbenin për të ringjallur istitucione të shëndosha, ekonominë tonë të rrënuar.

Këto terma nuk janë retorika e përditshme e konsumuar nëpër forumet sterile të pseudo-intelektualëve apo nëpër kafenetë partiake. Këto terma janë objektivi i vërtetë ku duhet të orjentohet shoqëria shqiptare me votën e saj. Këto terma janë detyra dhe programi politik i Lëvizjes për Zhvillim Kombëtar.

Prandaj, të dashur ABSTENUES, që me sa duket jeni anëtarët e panumërt të partisë më të madhe në vend, pra PARTIA E ATYRE QE NUK VOTOJNE, të bëjmë të mundur që vota jonë të ketë peshë dhe rëndësinë që meriton, në mënyrë që e ardhmja jonë të fillojë të ndërtohet pozitivisht. Të bëjmë të mundur që pasaportës shqiptare t’i rikthehet vlera e merituar e viteve 30-44 kur popullin e udhëhiqte një politikë moderne, kombëtare dhe sociale si ajo e strategut dhe liderit më të madh të kombit, Mbretit Ahmet Zogu I.

Modeli i Bullgarisë është aty dhe po na thërret ta ndjekim pas. Ky model politik i Mbretit Simeon, dha rezultatet më të shkëlqyera që mund të prodhonte në një kohë kaq të shkurtër politika e rëndomtë ballkanike. Nuk na duhet të bëjmë shpikje dhe dizertacjone shkencore të modelit Nano-Berisha, apo MJAFT-iste dhe KOP-iste. E kemi të thjeshtë dhe të prekshëm modelin e Bullgarisë fqinje.

Pra, orientimi i vizionit tonë, si në qytet ashtu dhe në fshat nuk duhet drejtuar nga ngjyrat dhe interesat e ngushta të momentit, por nga vlerat dhe mundësia për të gjetur rrugën e daljes nga tuneli i errët ku na ka futur politika e djallëzuar dhe perverse post-komuniste e dy strukturave të dështuara dhe përgjegjëse PS-PD. Në fakt kjo makinë politike ogurzezë me dy koka është një e vetme. Ajo punon për vetveten dhe kur kërkon votën nga zgjedhësit, ka për qëllim vetëm ruajtjen e pushtetit dhe të status quo-së, pra ruajtjen e privilegjeve të fituara me mashtrim. Ne duhet t’ua heqim monopolin e grabitjes së pushtetit dy kokave të së njëjtës kuçedër, duhet të zgjedhim alternativën LZHK-së për të ndërtuar të ardhmen e shtetit ligjor, të shtetit social. Duhet të pasurojmë dhe ristrukturojmë Istitutin e Sigurimeve Shoqërore dhe aspak militantët e hyzmeqarët e kryetarëve bajraktarë.

Duhet të fillojmë të asistojmë prindërit dhe të moshuarit tanë që kanë nevojë për kurim, për ndihmë sociale dhe për pak respekt që s’po e gjejnë kërkund. Duhet të fillojmë të ngjallim shpresën tek rinia jonë vitale që po kalon periudha depresioni nga “tranzicjoni”, pra nga errësira e krijuar dhe droga që është bërë ngushëllimi i vetëm. Duhet të shpëtojmë familjet nga katastrofa ekonomike dhe konfliktet që lindin si pasojë e varfërisë. Duhet të sjellim në shoqërinë tonë besimin dhe energjitë e mëdha të diasporës që vazhdon dhe jep kontribute të vyera nëpër botë. Shumë djem dhe vajza drejtojnë sot nëpër botë katedra mendimi dhe struktura universitare. Kemi patriotë dhe biznesmenë të shkëlqyer. Ata janë dashamirës dhe të gatshëm të japin kontributin e tyre për ndryshim cilësor të shoqërisë. Pra, duhet të biem ringjalljen dhe zhvillimin kombëtar.

Këtë do ta bëjmë nëpërmjet votës tonë, armës tonë më të fortë. LEVIZJA PER ZHVILLIM KOMBETAR me në krye Mbretin Leka ZOGU I, duhet të jetë shpresa jonë, objektivi i votës tonë. Mendimi akademik, eksperiencat perëndimore dhe energjitë më vitale të vendit janë bashkuar dhe po orjentohen dita-ditës me parimet dhe trasparencën e kësaj Lëvizjeje. Të gjithë ne shohim tek Mbreti figurën morale dhe dashurinë që i ka munguar këtij kombi për 60 vjet. Shohim tek Mbreti Europën, perëndimin, drejtësinë, dinjitetin dhe të ardhmen e shqiptarëve.

Natyrisht nuk mjaftojnë vetëm analizat por duhen edhe angazhimet. Çdokush prej nesh mund të japë kontributin e tij në gjallërimin e kësaj alternative, në nxjerrjen e shqiptarëve nga errësira. E mira duhet të triunfojë. Eleganza dhe sharmi i njerëzve fisnikë që i janë bashkuar kësaj lëvizjeje duhet të na shërbejë si garanci për të gjetur besimin tek vetja jonë, tek të afërmit dhe tek bota që na rrethon.

Himni ynë i bukur kombëtar citon:

“Kush është burrë nuk frigohet,
por vdes por vdes si një dëshmor”

Natyrisht dhe për fat të mirë sot, Kombi, Atdheu, nuk i kërkon askujt të flijohet dhe të vdesë për idealet e larta, por i kërkon të jetë pjesë e ndryshimit, i kërkon ndihmën, kontributin, dashurinë kombëtare dhe rreshtimin qytetarisht me Lëvizjen për Zhvillim Kombëtar.

Ndryshimi jemi ne të gjithë, individët, familjet, miqtë tanë, idetë dhe bindjet tona, sakrificat, kursimet dhe energjitë tona. Vetëm në këtë këndvështrim të emancipuar mund të arrijmë t’i ndryshojmë gjërat, mund të largojmë të keqen dhe të dalim nga tuneli i errët ku na kanë futur ata të kuçedrës me dy koka.