Kryetarja Topalli takon Senatoren Hillary Clinton dhe Kreun e Kongresit Amerikan Denis Haster

Clinton: “Qenia e një gruaje në krye të Parlamentit shqiptar nderon Shqipërinë dhe i shërben përmirësimit të imazhit të saj si shprehje e një dimensioni të ri të demokracisë në Shqipëri.”

WASHINGTON D.C.: Shtetet e Bashkuara mbështesin plotësisht Shqipërinë në klimën e re politike dhe inkurajojnë qeverinë në reformat e nisura për të luftuar krimin dhe korrupsionin. Kjo u nënvizua në takimet që Kryetarja e Kuvendit Topalli zhvilloi në Washington në Kongres, në Senat dhe në Departamentin e Shtetit. Ndër takimet e njëpasnjëshme, një takim i veçantë iu rezervua Kryetares së Kuvendit nga senatorja Hillary Clinton e cila theksoi se zgjedhja e znj. Topalli në krye të Parlamentit i shërben përmirësimit të imazhit të Shqipërisë.

Axhenda e Kryetares së Kuvendit në Washington nisi në Kongresin Amerikan me një takim me Kryetarin e Komisionit të Ndihmës për Demokraci, David Dreier. “Jam një admirues i vendit tuaj dhe i juaji personalisht si kryeparlamentare grua, tha në fillim të bisedës z. Dreier. Unë jam një mbështetës i Shqipërisë dhe mbetem i vendosur për forcimin e marrëdhënieve me vendin tuaj dhe për bashkëpunimin mes dy institucioneve tona.”

Si drejtues i Komisionit të Asistencës për Demokraci ai i bëri Kryetares së Kuvendit një prezantim të shkurtër të projekteve të realizuara me Shqipërinë prej 15 vjetësh, që në fillimet e demokracisë dhe e siguroi znj.Topalli për intensifikim të bashkëpunimit në klimën e re politike. “Si Kryetare e Kuvendit të Shqipërisë, tha znj. Topalli, i konsideroj mjaft të rëndësishme marrëdhëniet mes institucioneve tona dhe jam e vendosur t’i ridimensionoj ato.”

Znj.Topalli shpjegoi shkurtimisht situatën politike në Shqipëri pas fitores së Partisë Demokratike në zgjedhjet e 3 korrikut 2005. “Qevera e re është e angazhuar seriozisht për të luftuar krimin, korrupsionin dhe trafikun e paligjshëm, tha znj.Topalli. Ajo është e vendosur të realizojë reforma që do të mundësojnë integrimin e saj në BE dhe anëtarësimin në NATO. Me përpjekjet e saj Qeveria po hap një kapitull të ri për të kthyer Shqipërinë në rrugën e duhur dhe për të mbajtuar premtimet.

Nga ana e tij z. Dreier tha se vendi i tij është i ndieshëm për vullnetin e treguar nga Qeveria shqiptare ndaj e bëri pjesë të Sfidës së Mijëvjecarit, për t’i krijuar asaj burime në luftën kundër krimit dhe korrupsionit. Ai e siguroi Kryetaren e Kuvendit se do të përfshijë Shqipërinë në Projektin e Asistencës për Demokraci.

Znj.Topalli nga ana e saj u shpreh se si Kryetare e Kuvendit është tërësisht e angazhuar për të inkurajuar nisma në luftën kundër korrupsionit, konfliktit të interesave dhe çdo fenomeni pengues të reformave. Në vijim të takimit z.Dreier e ftoi znj Topalli të merrte pjesë në sesionin dëgjimor të komisionit që ai drejton, i cili do të trajtonte pikërisht problemin e korrupsionit dhe të transparencës. Kongresmeni Dreier e shoqëroi personalisht znj.Topalli duke e prezantuar me të gjithë kongremenët e pranishëm e, më pas ai e ftoi të ulej në vendin e miqve të nderit. Në nisje të sesionit ai i informoi të pranishmit për takimit të cilin e konsideroi mjaft interesant dhe të dobishëm me Kryetaren Topalli.

“Unë, tha ai përpara anëtareve të komisionit, mbetem i vendosur që në klimën e re politike në Shqipëri të intensifikoj projektet”.
Sesioni u fokusua në çështjen e korrupsionit dhe skandaleve si dhe në transparencën si instrument të domosdoshëm për parandalimin dhe shmangien e këtyre fenomeneve.

Senatorja e New York-ut Hilari Clinton i rezervoi një takim të veçantë Kryetares së Kuvendit në zyrën e saj. Znj Clinton e përgëzoi znj.Topalli për zgjedhjen në krye të Parlamentit.
“Kjo ështe një sfidë, tha ajo, po ne gratë dimë t’ia dalim mbanë. Qënia e një gruaje në krye të Parlamentit Shqiptar nderon Shqipërinë dhe i sherben përmirësimit të imazhit të saj si shprehje e nje dimensioni të ri të demokracisë në Shqpëri.”

Znj.Topalli e falendëroi përzemërsisht senatoren për pritjen e rezervuar. “Shqiptarët u janë përjetë mirënjohës për mbështetjen që Ju dhe Presidenti Klinton i keni dhënë forcimit të demokracisë në Shqipëri dhe në mënyrë të veçantë për ndalimin e genocidit në Kosovë.”
Të dy bashkëbisedueset u ndalën në momentin vendimtar që po kalon Kosova, duke shprehur bindjen se gjithçka është në rrugë të mbarë. Meqenëse takimi u zhvillua pa praninë e medias, znj. Clinton e ftoi znj.Topalli për një foto në kujtim të vizitës, jo vetëm me znj.Topalli por edhe me delegacionin që e shoqëronte.

Duke u përshëndetur, senatorja Klinton i shprehu Kryetares Topalli kënaqësinë për të vendosur kontakte të drejtpërdrejta me të. Më pas takimet vijuan në Departamentin e Shtetit, së pari me Asistentin e Sekretares së Shtetit z. Daniel Fried dhe shefin e zyrës për Shqipërinë Mitchell Benedict.

“Së pari, tha z. Fried do të doja t’i përcillnit Kryeministrit shqiptar urimet e mia më të mira. Personalisht jam i kënaqur që z. Berisha fitoi në zgjedhjet e fundit dhe ishte një fitore e drejtë.”
Kryetarja e Kuvendit bëri një prezantim të përpjekjeve të qeverisë Shqiptare për të përballluar vështirësitë veçanërisht në luftën kundër korrupsionit, krimit të organizuar dhe trafikut të paligjshëm.
Nga ana e tij z. Fried e cilësoi rezultatin e zgjedhjeve si një fitore të merituar. “Por Shqipërisë i duhet të bëjë reforma, tha ai, ju duhet të ndërtoni institucione të forta. Qeveria shqiptare ndodhet përpara sfidave të mëdha, por kam bindje se z. Berisha do t’ia dalë mbanë me sukses.”
Z. Fried shprehu përgëzimet e tij për siglimin e Marrëveshjes së Stabilizim-Asociimit.

“Ju keni mbështetjen e Shteteve të Bashkuara për anëtarësimin në NATO, por Shqipërisë i duhet të punojë fort për të realizuar kërkesat në mënyrë që të marrë ftesën për anëtarësim në samitin e 2008-ës.”
Kryetarja e Kuvendit u ndal në ecurinë e reformave në të cilat është angazhuar Qeveria shqiptare por dhe rezistencës që kjo qeveri has në institucione të ndryshme, si prokuroria apo drejtësia, në këtë luftë. Ajo kërkoi që administrata amerikane të inkurajojë dhe të mbështesë qeverinë në reformat në kuadër të luftës kundër krimit dhe korrupsionit.
Z. Fried e vlerësoi Shqipërinë si një faktor aktiv stabiliteti në rajon duke nënvizuar mbështetje të plotë për Shqipërinë.
Pasdite znj.Topalli takoi z.Bert Braun, drejtor i Europës Juglindore në Shtëpinë e Bardhë.

“Shqipëria, theksoi z.Braun probleme të saj kryesore ka krimin dhe korrupsionin. Qeverisë së re shqiptare i duhet të angazhohet tërësisht për të zgjidhur këto probleme dhe për të ndryshuar imazhin e Shqipërisë. Vetëm kështu ajo do të ketë mbështetjen e Shteteve të Bashkuara dhe Bashkimit Europian.” Kryetarja Topalli tha se Qeveria e vetme nuk mund të luftojë këto probleme. Duhet që të gjithë institucionet të funksionojnë në këtë drejtim.
Në vijim Kryetarja Topalli u takua me kongresmenin Eliot Engel të cilin e cilësoi si një mik të palëkundur të Shqipërisë dhe pavaresisë së Kosovës. Z.Engel nga ana e tij vlerësoi përpjekjet e qeverisë shqiptare dhe nënvizoi se Shtetet e Bashkuara duhet ta mbështesin Shqipërinë. Lidhur me çështjen e Kosovës ai u shpreh se ka qenë dhe mbetet mbështetës i pavarësisë së saj si e vetmja zgjidhje për stabilitet dhe paqe.

“Uroj, tha ai që pavarësia e plotë e saj të realizohet këtë vit.”
Të premten, Kryetaja Topalli pritet të ketë të tjera takime të rëndësishme në Washington.

Kreu i Kongresit Amerikan uron Kryetaren Topalli për reformat e ndërmarra nga Parlamenti dhe Qeveria

Dennis Hastert: Mbështetje maksimale për anëtarësimin e Shqipërisë në NATO Kryetarja e Kuvendit, Jozefina Topalli ndodhet në Washington ku do të zhvillojë vizita të rëndësishme në Kongresin Amerikan, në Senat dhe në Departamentin e Shtetit.
Ndërkohë, një ndër takimet më të rëndësishme të Kryetares Topalli ishte takimi i zhvilluar të enjten me Kryetarin e Kongresit Amerikan, Dennis Hastert.

Kryetari i Kongresit Amerikan Dennis Hastert, priti në një takim të veçantë Kryetaren e Kuvendit, Jozefina Topalli.
Është hera e parë në 10 vitet e fundit që një Kryetar i Kongresit Amerikan pret një Kryetar të Parlamentit shqiptar.
Z. Hastert shprehu urimet e tij më të mira për znj. Topalli në krye të Kuvendit të Shqipërisë, si dhe i uroi sukses për reformat e ndërmarra nga Parlamenti dhe Qeveria e re, reforma që, sipas kreut të Kongresit Amerikan, kërkojnë kurajo.