Busti i Berishës shitet 1 mijë lekë si suvenir

Nëse do t’i dhuronit një Enver suvenir nga Shqipëria një miku që nuk e njeh këtë vend, siç ka nisur të ndodhë, bëni kujdes: kur të zgjidhni, vështrojeni mirë, sepse ai mund të jetë një Berishë, model në allçi i portretit të kryeministrit aktual të Shqipërisë, ish- president dhe kryetar i Partisë Demokratike. Figurina të këtij potreti, në përmasat 20 deri në 30 centimetër e lartë, ka dy javë që janë hedhur në qarkullim në dyqanet e suvenireve që shesin për remineshenca simbolike objekte që të kujtojnë detyrimisht diçka nga Shqipëria: flamuj me shqiponjë, bluza për tifozë po me shqiponjë të zezë, llulla, çifteli, ibrikë, torba leshi dhe dekoracione në hekur të rrahur me motive popullore si ato të ish-ndërmarrjes artistike “Migjeni” etj.

Portreti, bust në miniaturë i Sali Berishës ngjan siç ngjajnë dy pika uji me portretin e Enver Hoxhës. Dimensioni, bardhësia e allçisë, poza, flokët me pak dallgë, balli pak i përvjelë, qeskat poshtë syve, dhe ç’është më e pabesueshmja, u ngjan shumë ai profil që e kanë aq të ndryshëm. Duke tentuar ta japin me tipare të përsosura modelit i është hequr ajo që e ka më shprehëse të karakterit dhe temperamentit sanguin portreti i gjallë i Berishës: hundën fajkua. Por me sa duket, “duararti” që duhet të jetë ndonjë artist diletant ose ndonjë formator, ka thurur me apo dashje një Te deum laudamus në allçi. Duke e parë përballë, kemi një Berishë po ashtu si shfaqet në publik, buzëhollë e buzagaz, sypetrit e picërrues, mjekra e mprehtë e protagoniste e plastikës dhe mollëzat thuajse majuce shumë afër syve. Në bust kravata dhe jakat e këmishës mbyllur në xhaketë janë po njëlloj si në miniaturën e bustit të Enverit.

Është sa kurioze për syrin nëse ju rastis t’i gjeni pranë e pranë. Ndonjë mendje që tenton të bëjë një përqasje mes personaliteteve të të dyve mund t’i ketë vendosur ashtu enkas. Një kokë si kjo e Berishës kushton po aq sa e Enverit, 1 mijë lekë të reja. Ka dy javë që ato shiten në dy dyqane suveniresh në Bulevardin “Zogu I” dhe diku buzë Rrugës së Durrësit. Shitësja e njërit prej dyqaneve thotë se kokat janë realizuar me shumicë nga një person që e ka zanat këtë punë. Fillimisht po testohet tregu sa mund të shiten dhe si mund të pritet ngritja e një busti në miniaturë për një njeri në gjallje të tij.

Kjo ka ndodhur vetëm me Enver Hoxhën. Në kongreset e Partisë dhe në mbledhjet e Byrosë Enveri kishte pas shpine, veten e tij në derdhur në bronz, allçi a pluhur mermeri. Një pjesë e mirë e tyre me rënien e regjimit, kudo që ishin shpërndarë, në ndërmarrje, vatra kulture, kinema që shpërbenin dhe si salla gjyqi, u thyen, u hoqën zvarrë, u pëgërën. Këto vitet e fundit janë hedhur sërish në qarkullim bustet në miniaturë të Enverit.

Kjo “këngë” e popullit për kryeministrin Berisha (mbase është koincidencë ky qarkullimi në dyqane i miniaturës me ngjarjen e shënuar, firmosjen nga Berisha të marrëveshjes së Asociimit), nuk ka asgjë për t’u habitur në një këndvështrim. Klimën kur ajo ngrihet. Qeveritë që Sali Berisha dhe forca e djathtë politike kanë përfaqësuar kanë qenë iniciatore për ngritjen e shumë monumenteve të heronjve të demokracisë, historisë, dhe ndonjë qytetërimi në zanafillë në Shqipëri.