"Mafja e tokave" dhe kryeministri

Kryeministri ulëriti, i shau rëndë ca nga grabitësit e tokave, atë pjesën e "mafjes së tokave" që ai nuk e do. Ulërimat e tij i kemi stërdëgjuar, deri në bezdi, por kur do të shohim zbatimin e ligjit njësoj për të gjithë, e jo në vartësi të skemave politike të kryeministrit?! Le të rreshtojmë troç ca të vërteta, duke u kufizuar vetëm tek "mafja e tokave", si për ata që kryeministri i "urren", si dhe për ata që i "ka xhan dhe po e shpërblen" me paratë tona, natyrisht të popullit shqiptar-leksionin është që ligji dhe morali varen nga ç'i jep Atij.

Grabitësit e parë të tokës, të "urryerit" nga kryeministri
Mafjozët e parë janë ata që grabitën tokat në "Golem e gjetkë", ata që u arrestuan këto ditë. Është e vërtetë që ata nuk i kishin dhënë gjë kryeministrit, nga vjedhja e kryer, të gjitha i kishin mbajtur për vete. Kryeministri i përgëzoi organet e luftës kundër krimit, bile aludoi se do të vazhdojnë arrestimet e fajtorëve të tjerë, edhe të qeveritarëve të tjerë, si të para, si dhe të pas 3 korrikut 2005. Edhe ne themi se vërtetë që është një nga punët më të mira që po bëhet, kjo goditja kundër grabitësve të tokës.

Këta kriminelë, e meritojnë gjithë atë duf, edhe të stilit të kryeministrit aktual, sepse janë grabitës toke! Kishin tjetërsuar, grabitur, tokën e shtetit, duke e kthyer në tokë private, duke përfituar me miliona dollarë, të marrë nga prona jonë, e shqiptarëve. Të gjithë ata, në bashkëpunim dhe veç e veç, kanë marrë tokën që ishte e ruajtur, me ligj, për kompensimin e pronarëve të vjetër. Ky ligj është sigluar nga vetë kryeministri aktual, kur ai ishte president i vendit. Ja dhe një herë se çfarë shkruhet në këtë ligj (ligji Nr.7980, datë 27.7.1995, "Për Shitblerjen e Trojeve", në nenin 3 të tij):

Derisa të përfundojë kompesimi fizik i ish-pronarëve, kalimi i trojeve të lira nga pronë shtetërore në pronë private bëhet vetëm në rastet që vijojnë: a- Për ndërtimin e banesave me qëllim të lirimit të banesave të ish-pronarëve si dhe për të pastrehët, të ndërtuara nga Enti i Banesave apo persona të tjerë. b- Me vendim të Këshillit të Ministrave, për shitje, për investime shumë të rëndësishme për vendin. Pra, praktikisht, askush nuk lejohet ta tjetërsojë tokën shtetërore, derisa të përfundojë kompensimi fizik i ish-pronarëve.

Grabitësit e dytë të tokës, të mbrojturit nga kryeministri
Mafjozët e dytë janë ata që grabitën tokat në "Bathore, në Kënetën e Durrësit e gjetkë", "informalët", ata që tani po u falet toka. Kryeministri "sot" po i përkëdhel e po i përqafon, po i mbron, duke paralizuar me ligj organet e luftës kundër krimit, duke krijuar dy lloje grabitësish toke: të dënueshëm dhe të padënueshëm, sipas qejfit të tij?! Para "dhjetë vjetëve", po këto organe të luftës kundër krimit, policia e shtetit etj., u patën ndërsyer kundër po këtyre të Bathores, po nga vetë kryeministri aktual kur ai ishte kryetar i të gjithë shtetit (presidenti i Shqipërisë).

E fundja kishte të drejtë që drejtoi shtetin kundër tyre, sepse ata, "informalët", kishin pushtuar tokat e të tjerëve, pra tonat, po ato toka që kanë edhe sot! Por sot, po ai, ky kryeministri aktual, po u legalizon grabitjen e madhe që i bënë pronës sonë të përbashkët, tokës. Po çfarë ndryshoi që po këta grabitës, fillimisht u dërmuan nga polica e z. Berisha, dhe tani po meritojnë gjithë këtë përkrahje antiligjore dhe anti perëndimore, po të z. Berisha?! Ata bile na kanë grabitur më shumë, me miliarda dollarë, e jo me miliona si mafjozët e parë?! Të gjithë ata, në bashkëpunim dhe veç e veç, edhe ata, njësoj si të parët, po tjetërsojnë tokën që ishte e ruajtur me ligj për kompensimin e pronarëve të vjetër, me po atë ligjin e cituar më lart për "mafjozët e parë"!

Ndryshimi në mes dy llojeve të grabitësve
Ndryshimi i vetëm qëndron tek pazarllëku mes të dytëve dhe kryeministrit aktual: ata i shitën votën më 3 korrik 2005, dhe kryeministri po i "paguan" duke u falur tokën që patën grabitur. Ata i dhanë pushtetin, atë që ai dëshiron më shumë se çdo gjë dhe se këdo në botë (në fakt ata e bënë kryeministër, se as megadushku, e asgjë tjetër nuk i bënte dot derman, nuk e riciklonte dot, pas asaj që u pati bërë shqiptarëve).

Leksioni
Leksioni është i qartë dhe i vajtueshëm: po i dhe pjesën e vet kryeministrit, në Shqipëri je i lirë të thyesh ligjin si të duash e kur të duash.