NjJË KRIMINEL, KANDIDAT PËR KRYETAR KOMUNE NË VITI

-- nga AGRON BERISHAJ

Të bësh një portret të kandidatit pretendent për fronin e Kryetarit të Vitisë, Skënderbe Hebibit, të duhet vetëm një fjalë: kriminel. Ky është emëruesi i përbashkët i të gjitha veprimeve të tija. Prandaj, kjo është arsyeja që me të nuk guxon, më mirë të themi nuk dëshiron të mirret as policia në Viti (disa prej tyre të afërm të Skënderbeut, të inkriminuar edhe ata ose fëmijë të tyre në vepra kundërligjore). Për të mos i rradhitur të gjitha me rend, mjafton të përmendet fakti që ai së fundi po terrorizon AKM-në zyrën në Gjilan. Sipas një zyrtari të AKM-së, i cili dëshiron të mbetet anonym, Skënderbe Hebibi, ka një sjellje të tillë që le të kuptosh arrogancën dhe pasojat e mundshme për të gjithë ata që ia turbullojnë ujin.

E kam fjalën, në lidhje me tenderin për privatizim të fabrikës së tekstilit në Letnicë. Ne kemi njohuri që ky zotëri, ka ofruar tre oferta, me të afërm të tij, për fabrikën e Letnicës. Ndonëse kishim droje, ne megjithatë u përcaktuam, sipas kritereve që kemi në fuqi dhe tenderin e ka fituar Nue Deda nga Stublla, i cili ka dhënë mbi 100.000 euro më shumë se S.Hebibi. Pas shpalljes së fituesit dhe pagesës fillestare nga Nue Deda, tensionet janë rritur dhe ky i fundit deklaron se është i detyruar të tërhiqet, sepse ka presinone dhe kërcënime nga Skënderbe Hebibi, por që këtë nuk guxon ta publikojë nga ky i fundit. Nue Deda ka rrëfyër se sa njerëz (edhe të atillë që janë në administratën komunale) e kanë kërcënuar në shtëpi dhe nëpërmes telefonit. Neve na vjen keq, shprehen në konfidencë, zyrtarë të AKM-së, nëse Nue Deda tërhiqet definitivisht, sepse ky njeri kishte dashur të investoj në këtë fabrikë, të hap vende pune për bashkëqytetarët e tij, të cilët pothuajse tërësisht gati kanë lëshuar vendin.

Unë kam ardhë nga Gjermania duke menduar se mund të bëjë diçka të mirë për vendasit e mi, që Stublla të mos zbraset, por tipat si Skënderbe Hebibi, nuk lejojnë gjëra të mira. Për më keq, ky zotëri dëshiron që përmes formave të ulëta ta spastrojë Stubllën. Ç'është e vërteta, Nue Deda është vetëm njëra nga shumë të terrorizuarit e kësaj ane. Ky gangster, më herët, ka kërcënuar disa stubllas të tjerë që të mos provonin as të paraqiteshin në tender për ta marrë fabrikën e Letnicës. Më herët, në këtë rajon, ka uzurpuar mjaft prona, duke përfshirë këtu edhe prona të kishës së Letnicës, të pjesëtarëve të komunitetit kroat etj. etj.

E çfarë bën policia e çfarë bën gjyqësori?! Nuk bëjnë sehir, por përfitojnë nga këto "projekte" të Skënderbe Hebibit, ose edhe ata janë të terrorizuar nga ky i vetëshpallur komandant i UÇK-së. E vërteta është se edhe policia edhe gjyqësori i njohin veprat e Hebibit. E keqja është se Nue Dedaj, nuk është e para viktimë. Sa stubllas, pas lufte, janë detyruar t'i lëshojnë pronat e tyre dhe t'iu "shesin" tipave si Skënderbe Hebibi, të tjerë as nuk guxojnë të hyjnë në pronat e tyre Kjo është arsyeja pse stubllasit, sipas disa burimeve anonime, dhe të tilla që mund të lexohen në faqe interneti, gjithnjë e më shumë e lëshojnë Stubllën dhe ikin në Perëndim. Thjesht pushteti as ligji nuk i mbron ata. Kjo e ka edhe të keqën tjetër: a po terrorizohen këta njerëz për shkak se si katolikë që janë, janë më të butë dhe më pak konfliktuozë. Nëse vazhdon kështu, situata mund të eskalojë, sepse stubllasit kanë përvojën e tyre me pushtuesit otoman e serb dhe dinë se deri në ç'masë mund të durohet.

Proceset nëpër të cilat po kalon Kosova, mund të disfavorizohen për shkak të veprimeve të këtilla, prandaj është momenti i fundit i ndërhyrjes së mekanizmave ligjorë për të mbrojtur jetën dhe pronën e qytetarëve, pamarrë parasysh etninë, përkatësinë fetare a politike.