McCain shpall kandidaturën për president i SHBA - Liga Qytetare Shqiptaro-Amerikane e mbështet atë

-- nga Beqir SINA, Nju Jork, SHBA

T'a kemi Amerikën si forca më bindëse në botë, për pavarësinë e Kosovës

BIG APPLE - NEW YORK: Senatori republikan amerikan, John McCain, thotë se ai po hyn i bindur në garën për të fituar kandidaturën republikane për presidencë. Ky lajm u njoftua gjatë një interviste televizive mbrëmë në Nju Jork, në njërin prej emisioneve televizive nga më të shikueshmet në SHBA-ës, ai i mesënatës "Late Show with David Letterman". Njoftimi nuk ishte i papritur, pasi shenjat ishin dhënë qysh më parë, megjithëse vendi ku u bë ky deklarim zyrtar ishte i pazakontë - një emision bisedor natën vonë që drejtohet nga David Letterman dhe titullohet"Late Show with David Letterman".

"Herën e fundit, që isha në emisionin tuaj më thatë të kthehesha nëse do të bëja lajmërimin," tha senatori McCain, ndërsa qëndronte i ulur në kolltuk para mikpritësit të tij, David Letterman."Pra," tha ai në mesin e duartrokitjeve të fuqishme, "do të bëhem kandidat për presidencën" pohoi McCain. Letterman, e pyeti nëse ai ishte serioz apo jo?, McCain i kërkoj bandës muzikore të luante një marsh ushtarak "Marshi i Fitimtarëve" -"March To Victory", duke e shoqëruar atë mr një tundje gishti si dirigjent, çka po tregonte sipas tij se po konfirmonte më së fundi edhe kandidaturën zyrtare të presidencës.

Veterani i luftës dhe ish-i burgosur lufte në Vietnam, McCain, ka qenë për shumë kohë një figurë e lartë politikë. Shtatë vjet më parë ai humbi një betejë të ashpër për të fituar kandidaturën republikane ndaj George W Bushit.

Më parë ai ka qenë kritik i mënyrës se si është menaxhuar lufta në Irak, por kohët e fundit, ai ka dalë si mbështetës i fuqishëm i strategjisë së presidentit për të dërguar trupa shtesë. Zoti McCain tha se ai do ta bënte njoftimin zyrtar në prill, por, mbrëmë në zemër të Nju Jorkut, para një numri të madh gazetarësh amerikan dhe të huaj, mbështetësve dhe përkrhasve të tij republikan, shpalosi hapur ambicjen tij për t'u bërë president me parrullën: "McCain Exchange of Ideas".

Në hotelin me pesë yje "The Millennium Broadway Hotel" sallën - "The Hudson Theatre" në forumin e organizuar për mbledhje parash, ose siç thirret këtu në Amerikë, "Found Rising", kësaj fushate tipike amerikane, iu bashkëngjiten edhe një grup shqiptaro ameriaknësh, anëtarë aktivë këta nga bordi i Lidhjes Qytetare Shqiptaro Amerikane, të udhëhequr nga presidenti i saj ish-kongresmeni republikan Joseph DioGuardi dhe bashkëshortja e tij Këshilltare e Çështje Ballkanike znj. Shirli Cloyes – DioGuardi.

Në grupin e shqiptaro - amerikanëve, bënin pjesë biznesmen të suksesëshëm, veprimtar të njohur këta të çështjes shqiptare, si; Gjergj e Gjon Dedvukaj, Arian Marku, Luan Bukolla, Mark Gjonaj, Murtezan Jonuzi, Sami Jonuzi,Gazmend Lita e Mitch Thomas e të tjerë. Në forumin e Nju Jorkut, me kandidatin e presidencës së SHBA-s, John McCain, ishte edhe ish sekretari i shtetit Henry Kisinger dhe senatori Phill Graham e dy amerikanët, fituesit e çmimit Nobel për mjekësi.

Ky grup shqiptaro amerikanësh i udhëhequr nga Liga Qytetare, ka shumë besim tek mbështetja që po i bënë senatorit republikan John McCain. Një gjë të tillë ata e bënë edhe 11 shkurt 2000 kur ndihmuan edhe monetarisht fushatën e senatorit J. McCain për mbledhje fondesh, në një protestë në Mahattan.

Shqiptaro - amerikanët, kanë zgjedhur këto mënyra të mbështesin kandidatët e të dyja partive, si republikanët dhe demokratët, për president të SHBA-s, për të perdorur më pasë lidhjet me ta si shumë të rëndësishme. T'a kemi Amerikën si forca më bindese në botë, për pavarësinë e Kosovës, thonë shqiptarët e amerikës. Shqiptaro amerikanët, i shohin SHBA-s, si shteti flamurtar, për demokraci, për liritë e të drejtat e popujve (vendi ku dihet se lobet e popujve luajnë këtu një rol të madh).

Ne si shqiptare i jemi përjetë mirënjohës faktit, që ishte presidenti Widrow Wilson, ai që shpëtoi Shqipërinë nga coptimi i viti 1920, ashtu siç ishte presidenti tjetër William Jefferson Klinton, ai që shpëtoi Kosovën nga pushtimi. Bushi i vjetër premtoi se do ndërhynte në Kosovë, në prag të Kërshendellave, nëse sërbet do të masakronin kosovarët, dhe vendosi të ashtuquajturën "Vija e Kuqe", të cilën e vuri në jetë Klintoni.

Me këtë prezantim të parë zyrtar Senatori 70- vjeçar nga Arizona, John McCain, mbrëmë ka hedhur hapin e tij të parë drejt kandidimit për presidente të SHBA. Dhe ashtu si kandidatja demokrate gruaja e ish-Presidentit amerikan Bill Clinton, Hillari Klinton, ku në një deklaratë të publikuar në faqen e saj të internetit, thoshte, se po themelon një komitet për fushatën presidenciale, dhe filloj mbledhjen e parave, dhe ai ne faqen e internetit www.johnmccain.com bëri të njëjtën gjë.

Deri tani kundërshtarët e tij për kandidimin brenda partisë republikane, janë ish-kryetari i bashkisë të Nju Jorkut, Rudi Giuliani, dhe guvernatori i Masaçusetsit, Mitt Romney. Ajo që mund të shihet si dobësia më e madhe e tij zgjedhore, thonë analsitët e këtyre çështjeve në SHBA-ës, mund të jetë vetëm mosha. Në moshën 70-vjeçare në këtë moment, ai do të jetë, nëse zgjidhet, presidenti më i vjetër në moshë ndonjëherë.