Bislim Ahmetaj, të rihapet dosja për Azemin!

-- nga Beqir SINA, Nju Jork

60 njerëz me uniformë policie morën pjesë në vrasjen e Azem Hajdarit

NEW YORK NY: Nëntë vite më parë, më 12 shtator 1998, u ekzekutua para selisë së PD-së Azem Hajdari, ish-deputeti i Partisë Demokratike, dhe lideri i lëvizjes se dhjetorit ‘90. Familjarë, liderë të PD-së, miq e simpatizantë të tij, çdo përvjotor zhvillojnë ritualin në kujtim të kësaj dite me një ceremoni në memorialin e ngritur për nder të tij, pranë selisë së PD-së.

Ndërkaq, Bislim Ahmetaj president i grupimit "Dhjetori 90', thotë se: "Në vëmendjen e shqiptarëve nuk duhet të shuhen kurrë kujtimet e trishta të viteve 1997-2003 kur gjithkush mund të vritej dhe keqtrajtohej, fyhej e poshtërohej vetëm se nuk i pëlqente fituesve të zgjedhjeve apo rrëmbyesve të tyre. Kulmin, vrasjet politike shënuan me vrasjen e liderit të Lëvizjes Studentore, deputetit Azem Hajdari dhe shëmbëlltyrës së besnikërisë njerëzore Besim Çerjes, 9-vjetorin e të cilës përkujtojmë sot. Ajnshtajni thotë diku, "që gjithkush që e ka projektuar një të ardhme e ka një të shkuar". Nëse e kemi projektuar të ardhmen për në Europë dhe në NATO është detyrë e të gjithë shoqërisë sonë, veçmas e strukturave përgjegjëse për të zbardhur të shkuarën.

Nisur nga ky konstatim ne përshëndesim inisiativat për reformim të sistemit të drejtësisë që artikulohen nga të gjitha kahjet e politikës dhe besojmë se ato reforma do të nisin së shpejti dhe do të jenë efiçente. Gjithashtu është inkurajues fakti që po çelen për rihetim shumë dosje, pas të cilave fshihen krime të tmerrshme siç ishte ajo e gardistëve të masakruar në Cërrik gjatë vitit të zi 1997.

Ne besojmë dhe do të kërkojmë me këmbëngulje se, dosja për hetimin e vrasjes së shekullit do të rihapet dhe do të hetohet në optikën e vërtetë të saj. Do të tingëllojë demagogji dhe propagandë politike krejt zhurma mediatike për reformë në sistemin e drejtësisë nëse nuk ka një zbardhje të plotë të atentatit që iu krye Azem Hajdarit dhe shoqëruesit të tij Besim Çerja natën e 12 shtatorit 1998.

Së paku 60 njerëz me uniformë policie morën pjesë në vrasjen e Azem Hajdarit, konstatim ky i grupit hetimor që u mor me çështjen Hajdari. Vetëm ky detaj i pranuar publikisht nga organet e drejtësisë e kompromenton plotësisht atë proces farsë, që duhet rihetuar nga fillimi. Pa drejtësi s'ka paqe sociale, s'mund të ketë reforma. Dhe pa reforma s'ka integrim.
Ne si grupim idealistësh "qënie të rrezikuara për zhdukje" në Shqipërinë komerciale nuk do të reshtim së kujtuari njerëz dhe ngjarje që na bëjnë të ndihe mi sadopak krenarë për qënien tonë shqiptarë. Prandaj, ne sot i ftojmë shqiptarët të nderojnë kujtimin e Princit të Mendjeve të Lira, Azem Hajdarit, me një qiri të ndezur në mënyrë që flaka e lirisë që ndezi Azem Hajdari në shpirtërat e shqiptarëve në dhjetor të '90 të mos shuhet kurrë.

Kush ishte Azem Hajdari

Azem Hajdari lindi më 11 mars 1963; vdiq më 12 shtator 1998, ishte një politikan shqiptar. Azem Hajdari është një nga figurat më të spikatura të politikës së viteve 1990 deri në 1998-ën. Ai ishte një ndër aktivistët kryesorë të lëvizjes studentore në ’90. Hajdari lindi më 11 mars të viti 1963. Ai ishte i martuar dhe kishte tre fëmijë. Azem Hajdari ishte një nga ndihmësit e kryeministrit të ri, Sali Berishës. Por, përveç jetës politike në vitin 1995, Azem Hajdari ka qenë edhe president i klubit sportiv Vllaznia. Madje, edhe president i Federatës së Arteve Marciale. Pas vdekjes, presidenti i vendit tonë e dekoroi me titullin “Nderi i kombit”. Ndërkohë, presidenti i Kosovës, Ibrahim Rugova, i dorëzoi familjes së tij medaljen e artë “Lidhja e Prizrenit”.

Veprimtaria politike, vrasja e Azem Hajdarit

Memoriali i Azem Hajdarit pranë PD-sëDeputeti i Partisë Demokratike të Shqiprisë, Azem Hajdari, është ekzekutuar mbrëmjen e 12 shtatorit të vitit 1998 pak metra larg selisë blu. Grupi me origjinë tropojane, i organizuar për vrasjen e Hajdarit, të kryesuar nga Fatmir Haklaj u gjend në Tiranë më datë 10 shtator, 1998.

Për dy ditë radhazi, grupi i përbërë nga Fatmir Haklaj, Jaho Mulosmani, Feriz Kërnaja, vëllezërit Ismet e Izet Haxhia e Naim Çangu, ka lëvizuar lirshëm në kryeqytet. Fatmir Haklaj, person në kërkim, nuk është arritur të ndalohet e njëkohësisht te zbulohet. Ky person, me ndihmën e shtetasve Fatmir Meta, ish-shefi i komisariatit të Tropojës, Astrit Muldaka, si dhe disa personave të tjerë, ka mundur që të gjejë materialet e nevojshme për të kryer vrasjen. Pasi ka siguruar gjithçka, Haklaj ka vënë në zbatim planin e tij.

Tre makina të pozicionuara në vende të ndryshme rreth selisë së Partise Demokratike /PD, kanë qenë gati për çdo të papritur të rastit. Pas dhënies së sinjalit nga Fatmir Haklaj, Izet Haxhia ka hyrë në selinë e PD dhe ka takuar Azem Hajdarin, duke e ftuar që të takonte një grup tropojanësh, që po e priste jashtë selisë. Deputeti, Hajdari në mirëbësim, ka dalë nga zyra e tij dhe iu ka drejtuar makinës. Pas kan dalë Besim Çera e Zenel Neza.

Ka qenë kohë e errët, për më tepër ka ndihmuar errësirën edhe koha e vrënjtur e me shi. Azem Hajdari është afruar makinës, targuar Vlora. Nga makina ka dalë fillimisht Fatmir Haklaj dhe më pas Jaho Mulosmani e Naim Çangu. Hajdari dhe ekzekutorët e tij kanë shkëmbyer disa batuta. Menjëherë pas kësaj Fatmir Haklaj ka nxjerrë automatikun e ka hapur zjarr në drejtim të Hajdarit dhe truprojave të tij. Të njëjtën gjë ka bërë edhe Jaho Mulosmani.

Si pasojë e të shtënave ka vdekur disa orë më pas deputeti Azem Hajdari. Njëkohesisht ka vdekur truproja Besim Çera, ndërsa Zenel Neza është plagosur rëndë. Plumbat e Haklajt kanë qëlluar pa dashje edhe mikun e tij Naim Çangun, i cili u dërgua disa orë më pas në spital nga Jano Mulosmani, e që nuk arriti të jetojë.

Më pas Haklaj i ka bërë thirrje bashkëpunëtorëve të tjerë që të largohen nga pozicionet e të drejtohen sërish për në Tropojë. Grupi i vrasësve ka arritur në Tropojë në orët e para të mëngjesit.

Të nesermen, me datë 13 shtator, Jaho Salihi duke folur nga zyra e tij sëbashku me shefin e rendit të Bajram Currit e me përfaqësuesit e Ministrisë së Rendit, mohon pjesemarrjen në vrasje. Ish Presidenti i Shqipërisë, Alfred Moisiu, në vitin 2002 dekoroi Azem Hajdarin me Urdhrin "Nderi i Kombit".

Mirënjohjet
Urdhrin "Nderi i Kombit" Shqipëri, 2002
Medalja e Artë e Lidhjes së Prizrenit, Kosovë