PËR PAVARËSINË E KOSOVËS, KOHA ËSHTË TANI

-- nga Beqir SINA, Nju Jork

“PËR PAVARËSINË E KOSOVËS, KOHA ËSHTË TANI.”
Presidenti G.W.BUSH

Tani që takimi i Londrës dhe ai i Nju Jorkut, përfundoi, u duk qartë se qëndrimi i pandryshuar i palës ruso - sërbe që kërkon ta shtyjë procesin pafund, fshiu çdo shpresë se në mbarim të periudhës 120 ditore do të gjënden mundësitë për ta zgjidhur çështjen e Kosovës nëpërmjet bisedimeve. U kuptua se në këtë mënyrë komuniteti ndërkombëtar vetëm humbet kohën e çmuar që i duhet për zgjidhjen e këtij procesi të tejzgjatur, Pas Londrës, 28 Shtatori takimi i New York-ut, mendohet të ketë qënë ai takim i cili do të mbyllëte çdo shteg për kompromis të mundshëm, sepse është e pamundur të bisedohet mbi tezat që parashtroi pala sërbe. Autonomia substanciale e Kosovës brënda Sërbisë, që kërkon pala sërbe, është politikisht regresive dhe një përpjekje për të rrëmbyer me bisedime atë që Kosova, pagoi me çmim shumë të lartë, me sakrificat e një populli dhe me gjakun e shumë bijve të saj dhe jo vetëm gjatë luftës 1998-1999 por për shumë vite me radhë.

Përfaqësuesit e Grupit të Kontaktit do ta kenë të vështirë, që pas opcioneve që parashtroi pala sërbe të gjejnë mundësi për të afruar qëndrimet e palëve. Ruso-sërbët treguan me kokëfortësi se politika e tyre është e pandryshueshme dhe se realiteti social e politik në Kosovë, është i papranueshëm për për ta. Në këto bisedime sërbët po bëjnë përpjekjet e fundit të dëshpëruara që kosovarët të humbasin gjithçka që kanë arritur deri tani sëbashku me faktorin ndërkombëtar.

Qëndrimi i fundit sërb kërkon të krijojë destabilizim në rajon e më gjërë dhe tentativa e komunitetit ndërkombëtar për t’i ulur palët në bisedime do të sjellë radikalizimin e më tejshëm të qëndrimeve. Sërbët kërkojnë rikthimin në realitetin e hidhur të para viteve të ’90, por që tani i interpretojnë nga pozita të tjera. Ajo që kërkon Sërbia është e pamundur të arrihet sepse ajo zhvleftëson të gjitha përpjekjet e deritanishme të popullit të Kosovës por edhe të vetë faktorit ndërkombëtar që ka investuar politikisht dhe ekonomikisht atje. Nuk ka kohë për të pritur. Shpresat se do të ndryshojë qëndrimi sërb kanë marrë fund, prandaj koha për njohjen e pavarësisë së Kosovës është pikërisht tani. Kosova, me elemetët e saj të shtetësisë, e ka të plotë profilin e një shteti që prêt njohje ndërkombëtare. Ajo është faktor stabiliteti në rajon dhe kërkon të integrohet shpejt në të gjitha institucionet euroatlantike.

Siç dihet, vetoja ruse në Këshillin e Sigurimit pengoi përpjekjet amerikane dhe europiane për të miratuar planin Ahtisari i cili kërkonte që Kosova të fitonte pavarësinë nën mbykqyrjen e Bashkimit Europian, duke garantuar të drejtat e pakicës kombëtare sërbe. Nën presionin rus, komuniteti ndërkombëtar duket se po i shmanget mbështetjes për pamvarësinë e Kosovës. Po i bëhen konçesione Beogradit dhe Moskës. Treshia ndërkombëtare duket se është pajtuar me kërkesën e Sërbisë që plani Ahtisari të mos jetë bazë për bisedime. Kjo gjë po zëmëron së tepërmi shqiptarët në Kosovë dhe kudo në botë, që kërkojnë të jetojnë të lirë në atdheun e tyre.

Propaganda Ruso-Sërbe e kërcënon vazhdimisht kosovën me luftë. Këto kërcënime përsëriten çdo ditë. Ato i ka bërë Koshtunica edhe në Kosovë. Në këto kushte Grupi Negociator kosovar duhet t’u qëndrojë fort kërcënimeve për luftë. Përgjigja kosovare duhet të jetë e qartë dhe e prerë: “Në doni paqe, ne jemi një vend paqësor. Në doni të luftoni që të rrëmbeni një vënd që kurrë nuk ka qënë i juaji, ne me luftë do ta mbrojmë vëndin dhe lirinë tonë.”

Zëri i diplomacisë së Tiranës duhet të dëgjohet më shumë e më fort në arenën ndërkombëtare për çështjen e Kosovës. Ajo duhet të marrë përsipër përgjegjësitë e saj. Shqipëria është i vetmi shtet në botë që duhet e që ka mundësi të plota të luftojë për Kosovën. Në qoftë se Sërbia lufton fort për Kosovën të cilën e kish pushtuar e masakruar gjatë shumë qindra vjeçarëve, Tirana duhet t’i dalë zot vëndit të saj shumë më fort.

Ne mbështesim deklaratën e Ambasadorit amerikan në Tiranë John Withers kur tha: “Ne jemi dakord me një parim themelor që pavarësia për Kosovën është e paevitueshme. Ky është parim i politikës amerikane dhe ndjej që zgjidhja e këtij problemi të madh është në interes të të gjithëve, në interes të rajonit dhe vonesat nuk ndihmojnë.”

Sot më shumë se kurrë është bërë aktuale deklarata e Presidentit amerikan G. W. Bush në Tiranë: ”Për pamvarësinë e Kosovës KOHA ËSHTË TANI!”

Akademia Shqiptaro-Amerikane e Shkencave dhe Arteve, New York