Më 03.06.2007, hapet Biblioteka e parë shqiptare në Zvicër

Në këtë aktivitet marrin pjesë shumë personalitete nga atdheu dhe diaspora, si Drejtori i Depertamentit të çështjeve jo rezidente Mr.Naim Dedushaj, Ambasadori i shtetit amë Shqipërisë në Bern Prof.Mehmet Elezi, Akademik Esat Stavileci, Drejtori i Bibliotekës Kombëtare dhe Universitare Prof.Dr.Sali Bashota, Shkrimtari Jonuz Fetahaj,aktori çun Lajçi, Lule Elezi pianiste e mirënjohur, intelektualë zvicerian dhe disa media zviceriane, etj.

Njoftojmë të gjithë bashkatdhetarët kudo që ndodhen në katër anët e Zvicrës dhe nga katër anët e atdheut, se me datë 03.06.2007, do të hapet Biblioteka e parë shqiptare në Zvicër. Pas një pune disa vjeçare më në fund do të promovohet kjo Bibliotekë, ku ka marrë përkrahje nga të gjitha institucionet tona kombëtare nga atdheu, me këtë rast prezenca Juaj do na madhështoj këtë eveniment të rëndësishëm.

Gjatë këtij promovimi do marrin pjesë personalitete shqiptare, si të politikës, Ministrive përkatëse ashtu edhe intelektual që veprojnë në Zvicër.Në program është paraparë, që të bëhet hapja solemne e Bibliotekës dhe prezentimi i programit, kokteji, hapje ekspozite të pikturave të piktorit Akademik Nexhemdin Jonuzit, promovim libri të Akademik Esat Stavileci, program argëtues, konferencë për shtyp dhe darka për musafirët e ardhur nga atdheu. I gjithë ky aktivitet do të mbahet më 03.06.2007 në Karstlernstrasse 14 Zürich, duke filluar nga ora 14.30.

Ndërsa programi i dytë rreth promovimit të Bibliotekës pjesa artistike, do të vazhdoj në restaurant "Rozafa" nga ora 17.00 në Embrach, me një program të pasur kulturo artistik. Në këtë promovim marrin pjesë edhe mediat shqiptare, si gazeta Kombëtare "Bota sot", "Zëri", "Fakti", TV DIASPORA në RTK, RTK, TV21, TVM, TV Aldi etj. Edhe aktori i meritave të veçanta çun Lajçi, me një program enkas kushtuar kësaj date të rëndëishme për mërgatën tonë, ka përgatitur një pjesë artistike, më pastaj shkolla e muzikës "Jehona" Roschah St.Gallen me mësuesin Murat Avdiu, do të prezenetohet me një program të shkurtër kulturo artistik, i gjithë ky program do që mbahet në Restaurant "Rozafa" në Embrach.

Ju mirëpret me zemër dhe respekt të lartë drejtori i Bibliotekës Prof.Skender Rexhepi dhe personeli i kësaj iniciative. Për info: 079-6347314 dhe 076-3843232 dhe 0444800351. Ju mirëpresim në këtë eveniment të rëndësishëm kulturo-arsimor.

Për këshillin organizativ, Dashnim Hebibi

Në mënyrën më solemne u hap Biblioteka e parë shqiptare në Zvicër

Karstlernstrasse 14 në Zürich do kujtohet si udha e shkronjave shqipe

Tre qershori, do të kujtohet dhe do të mbetet në pjesën e historisë më të re të mërgatës dhe do të shërbejë si shembull i gjithë diasporës, se tani në këtë kohë të pakohë, kur faktori parazit është i përzier kudo, kur edhe marrëzirat vlerësohen, kur në këtë kohë që libri pak lexohet, kur libri ndërrohet nga vetë autorët, na sinjalizon që të mos vonohemi më shumë, që të luftojmë për librin edhe më seriozisht, sepse libri është ushqim i vetëm i dijes sonë. Tre qershori, po nga kjo rrugë e shkronjave, trumbeton lehtas, ëmbëlsisht, se tash e tutje, në Zvicër është një Bibliotekë e mbështetur përpos nga instucionet shtetërore të atdheut edhe nga Akademia e Shkencave të Kosovës, nga poetë dhe dashamirës të librit.

Rreth sofrës së dijes shumë larg atdheut, ishin mbledhur për ta mbështetur edhe shpirtërisht me pjesmarrjen e tyre edhe shumë personalitete, si: Ambasadori i shtetit shqiptar në Bern, publicisti Mehmet Elezi, Përfaqësuesi i Ministrisë së Kulturës, sporteve dhe çështjeve Jorezidente z.Veli Bytyqi, Drejtori i Bibliotekës Kombëtare dhe Universitare të Kosovës Prof. Dr. Sali Bashota, Drejtori i Depertamentit të çështjeve Jorezidente të Kosovës Mr. Naim Dedushaj, Akademik Esat Stavileci, Anëtari i realizimit të projektit të Bibliotekës Shqiptare në Zvicër Mr. Nehat Hyseni, shkrimtari Jonuz Fetahaj, Pianistja e mirënjohur Lule Elezi, aktori i merituar çun Lajqi, veprimtari i dalluar Astril Lekaj, shkrimtari çerkin Bytyqi, publicisti Muharrem Blakaj, mësues, intelektualë të profileve të ndryshme, si nga atdheu ashtu edhe nga e mbarë Zvicra, Gjermania dhe Franca, si dhe mediat e shkruar dhe ato elektronike nga Kosova dhe diaspora, si TV Diaspora, gazeta kombëtare "Bota Sot", RTK, TV 21, presheva com dhe TV Aldi.

Nga të pranishmit e shumtë, u vlerësua se pas Skulpturës së Gjergj Kastriot Skënderbeut që e kemi në Gjenevë, pas varrit të të madhit babait të filmit botëror Aleksandër Moisiut dhe bashkëshortes së saj në pjesën italiane, që i kemi në këtë shtet mik të kombit tonë, tash do ta kemi me Bibliotekën kombëtare shqiptare në Zvicër, e përkrahur nga Institucionet e Kosovës, Shqipërisë, Maqedonisë, Kosovës Lindore dhe intelektualëve të varur e të pavarur nga atdheu dhe diaspora. Drejtori i kësaj Biblioteke, njëherit edhe donatori kryesor i gjithë këtij evenimenti të rëndësishëm në Zvicër z. Skender Rexhepi, ishte i entuziazmuar me prezencën e një numri të madh të bashkatdhetarëve që morën pjesë në këtë ngjarje të madhe të të gjithë diasporës e në veçanti të mërgimtarëve në Zvicër.

Edhe pse, nuk iu dha aq shumë jehonë kësaj ngjarjeje nga mediat tona të shkruara dhe elektronike, pra kësaj veprimtarie sa shumë të nevojshme aq edhe historike për diasporën e re, ky lajm i vonuar nga vetë bashkëinicuesi i këtij projekti dhe njëri nga organizotorët e mbarëvajtjes së programit të përgjithshëm D.H., do të njoftojë të gjithë bashkatdhetarët, se Biblioteka është hapaur dhe është në shërbim të mërgimtarëve pa dallim nga cili qytet i atdheut vjenë.