Veprimtari apolitik që di të bëjë politikë të mirë për vendin e tij

-- nga Esmeralda Carvalho Castro

Nënkryetari i partisë në pushtet - Léo Burguês (Leonardo S. de Castro Pires), i cili është edhe kryeasesor i guvernatorit (pozitë e kryeministrit në sistemin tonë administrativ-institucional), pasi që ka shprehur interesimin e Qeverisë së Shtetit Minas Gerais për fillimin e një bashkëpunimi të gjithëmbarshëm me Kosovën, i ka premtuar z. Koliqit një takim me guvernatorin e këtij shteti - Aécio Neves, në vazhdën e përgatitjes së vizitës së një delegacioni kosovar, në nivel ministrash, në vendin tonë, për të filluar me marrëveshjet e para të bashkëpunimit midis dy vendesh.

Engjëll Koliqi, në mesin e politikanëve mikpritës

Belo Horizonte, 2 qershor 2007 - Organizuar nga Organizata Ndërkombëtare CAN (organizatë për planifikim dhe implementim projektesh ndërkombëtare, ushtrime e planifikime ligjëratash, organizime konferencash dhe shoqërim misionesh nga jashtë), nën drejtimin e presidentes së saj - Dr Vera Lucia Alves Neves, dhe bashkë me miqt e dashamirësit e Kosovës - Ana Lucia Souto Maior dhe Sergio Fontoura Rezende de Oliveira, të premten në mbrëmje, kanë shoqëruar veprimtarin dhe shkrimtarin e mirënjohur kosovar në vendin tonë - Engjëll Koliqi, i cili është pritur në Selinë Qendrore të Partisë Braziliane Social-Demokrate për Shtetin Minas Gerais, parti e pozitës në pushtet, nga nënkryetari i saj e kryeasesor i guvernatorit (pozitë e kryeministrit në sistemin tonë administrativ-institucional), Léo Burguês (Leonardo S. de Castro Pires) dhe Ricardo Moura (drejtor i partisë për Belo Horizonte).

Engjëll Koliqi, në mesin e politikanëve mikpritës

E para në këtë takim ka folur presidentja e Organizatës CAN - Dr Vera Lucia Alves Neves, e cila që në fillim ka thënë se bashkëpunimi midis dy vendeve tona dhe dy popujve tanë, veç është i filluar, që nga marsi i kaluar, kur këtu ishte në vizitë delegacioni kosovar në përbërjen: Musa Misini (kryetar i Komunës së Vitisë, Sarë Gjergji (këshilltar i KK në Viti dhe administrator i Stubllës) dhe Engjëll Koliqi (veprimtar dhe gazetar i akredituar në Itali), me ç'rast janë nënshkruar tri binjakëzime midis qytetesh - Belo Horizonte-Viti, Ouro Preto-Gjilan dhe Itabirito-Stubëll, si dhe janë përmendur shumë nisma, të cilat do të jetësohen pas nënshkrimit të marrëveshjeve zyrtare, në nivel ministrash, për çka pritet që në vendin tonë së shpejti të vijë një delegacion kosovar, i zgjëruar e në nivel ministror (Lutfi Haziri - zëvendëskryeministër e ministër i pushtetit lokal dhe Astrit Haraqia - ministër i kulturës, sportit, rinisë dhe çështjeve jorezidente). Ajo ka thënë se bashkëpunimi në lëmenjtë kulturo-artistik veç ka filluar, sepse këtu veç po punohet në organizimin e Javës së Kulturës Kosovare, kurse Kori i Fëmijëve "Canarinhos" (Kanarinat), nga Itabirito, veç kanë marrë ftesën për pjesëmarrjen në Festivalin Ndërkombëtar "Ylberi i Prishtinës", në shtator të këtij viti. Ajo ka folur edhe për përgatitjen e një agjende shumë të ngjeshur për delegacionin kosovar, në organet e larta shtetërore të Minas Gerais-it, të Rio De Janeiro-s, si dhe në ato federative, në Brazilia, ku janë aranzhuar takime me tre ministra dhe me Komisionin e Politikës së Jashtme të Senatit Federativ të Brazilit.

Engjëll Koliqi, në mesin e politikanëve mikpritës

Pastaj fjala i është dhënë mysafirit nga Kosova - Engjëll Koliqit, i cili, meqë ka filluar me publikime poezishë në gjuhën portugeze, tashmë po llogaritet edhe si poet i Belo Horizontes. Ai, pasi ka falënderuar mikptitësit për interesimin e denjë dhe të jashtëzakonshëm për Kosovën, ndër të tjera ka thënë se ia vlen ky bashkëpunim, sepse populli shqiptar dhe në veçanti ai në Kosovë, edhepse një popull shumë i vogël numerikisht, krahasuar me popullin brazilian, ka vlera të larta të civilizimit dhe të dashurisë univerzale, deri në falje dhe në mosdije për urrejtje, gjithnjë sipas mësimit dhe amanetit të Bijës Kosovare, që mbarë Bota e thirri Nënë, Gonxhe Bojaxhiu - E Lumturuara Nëna Tereze, e cila së shpejti do të shpallet Shenjtëresha e Dashurisë. Mandej Z. Koliqi i ka njoftuar mikpritësit me zhvillimet aktuale në Kosovë, ku është një gjendje krejtësisht normale e sigurisë, megjithë pazarllëqet shumë të mëdha dhe me kompromiset misterioze që - siç ka thënë - po përgatiten në KS të OKB-së, ku së shpejti pritet vendimi historik për njohjen e pavarësisë, ka thënë se në Kosovën e vogël gjeografikisht, ka hapsira të mëdha dhe shumë të sigurta të bashkëpunimit edhe për investime të kapitalit, sepse vendorët, me marrjen e të gjitha kompetencave shtetërore, do të garantojnë investimet dhe Kosova shumë shpejt do të zëjë vendin e merituar, në familjen e madhe europiane - në BE.