VARGJE SUBLIME DHE ANA TJETËR E NJË POEZIE

Shefqet Dibrani: "ËNDËRR E NJËJTË, TOKË TJETËR", poezi, botoi "Qendra e Kulturës e Podujevës", Podujevë 2007, faqe 160. ISBN 978-951-87199-1-4

Çdo popull ka nevojë për libra të mirë. Të shkruash një libër, është një mund i madh. Shefqeti Dibrani shkroi nëntë libra me vlera kapitale. Kjo pasuri tani nuk është vetëm e Shefqetit është e gjithë njerëzimit.
Fëmijët shqiptarë në diasporë dihet mirë se janë të eksponuar nga rrethi ku ata jetojnë, dhe të rrallë janë ata fëmijë të "gastarbajterëve" që e dinë mire kulturën dhe gjuhën shqipe.

Shqiptaret fjala vjen ku vepron shkrimtari Shefqet Dibrani e flasin gjermanishten, frëngjishten, italishten e fare pak gjuhën shqipe. Kurse, gjermanishtja flitet në qytetin St.Gallen të Zvicrës, ku jeton prej vitesh poti ynë tashmë i mirënjohur! Fëmijët tanë janë ekspozuar dukurive devijante të cilat dukuri mund ta shpiejnë fëmijën tonë në një ekstrem të padëshirueshëm… Nuk merret dituria duke mësuar libra e shkronja arabe në stilin aziatik përmendësh. As nuk merret dija duke lexuar libra apo revista mbi jetën private dhe intime te dinastive të ndryshme në Evropë e Azi, ta zëmë për kurorëzimet apo shkurorëzimet e princave e princeshave, për llojin dhe çmimin e veshjeve të brendshme apo llojin e shamponit me të cilin i lajnë flokët apo trupin. Kjo dije e fëmijëve tanë (bile edhe këtu në Kosovë), lirisht e quajë "devijim kulerësh" që po rrezon më sjellje të tyre devijante në mediat e shkruara dhe elektronike (në televizionet private e publike), me seritë e mërzitshme alla braziliano-meksikane si dhe nga vetë misionarët fetarë që paguhen nga burime te dyshimta.
Viteve të fundit te ne në Kosovë, po na servohen edhe libra të dyshimtë, qoftë në formate xhepi apo në forma të revistave të ndryshme pornografike, që dosido janë virus i së keqes.

Ditë më pare më ranë në dorë librat e Shefqet Dibranit. Si fjala vjen "Libra dhe mbresa", "Zhgënjim ballkanik 1 - 2" si dhe libri i tij i fundit që u botua këto ditë, falë përkrahjes së z.Nexhmi Balaj nga Qendra e Kulturës në Podujevë, më titull "Ëndërr e njëjtë, tokë tjetër", më bënë të mishërohem më fatin e venerimeve të autorit sepse librat e Dibranit janë antologjikë dhe lexuesi ynë ka rastin të mësoj se si shkruhet poezia, eseu, komenti politik etj.
Shefqet Dibrani, ka stilin e vet si një individualitet që përkon me bëmat e kolektivitetit, e që prekë dhe bën xëx në historinë dhe realitetin tonë. (Poezitë: "Në një zyrë integrimi"; "Zjarret dhe mërgimtarët", 'Me fytyrë të kthyer nga atdheu" etj. përfaqësojnë bindshëm mendimin e theksuar më lartë). Ligjërimi poetik i tij ka sentenca humanizmi dhe njerëzoreje, element që e ndeshim sidomos te poema "Shekulli në mes inicialeve "V. ZH.", kushtuar shkrimtarit dhe mikut të tij Visar Zhiti.

Sh. Dibrani thotë:
"I vyer je miku im vetëm
Atëherë kur nuk je në mesin tonë
A kur të kalosh në amshimin tënd, të tjerë
Gëzueshëm mortojnë, madje do të ngritin dhe dolli
Sepse sado që mbolle pemën e dashurisë
Hija jote pengonte rrezatimin e së keqes
Vetëm vdekja, miku im, të bën të afrueshëm
Dhe shumëfish të pranueshëm…"
(Nga poema: "Shekulli në mes inicialeve "V. ZH.", faqe 89)

Pra, çdo varg i Shefqet Dibranit gjakon drejt dhembjes personale e cila shkallëzohet dhe të bën për veti, duke ta shkund ndërgjegjen në perceptimin e realitetit jetësor të poetit.
Një pohim i tillë i gjejmë edhe në këto vargje:
"Dheu më tha: S'më kujtohet fytyra juaj
Kur trup e ndjenja i ke në vend të huaj"
Ndërsa nostalgjia e poetit shihet nga vargjet:
"Ngado shkoj e treti
Mbaj fytyrën kah At-Dheu"
(Poezia: "Me fytyrë të kthyer kah At-Dheu", faqe 19).
Publicisti, gazetari dhe shkrimtari Shefqet Dibrani me librin e tij "Ëndërr e njëjtë, tokë tjetër" i hap vetes rrugën drejt një krijimtarie shumë kualitative.

Me siguri se një hise krenarie nga ky libër, bie edhe mbi profesorin Sadik Rrustemi, (një mik i autorit), që Shefqetit "ia shtoi frymën" për frymimin dhe venerimin shul - shqip të tij edhe ne diasporë.
Nga Shefqeti dhe nga gjithë krijuesit Shqiptar presim libra të mirë, të cilët dosido duhet ta mbrojnë e drejtojnë gjeneratën e re nga asimilimi dhe nga antivlerat që kanë vërshuar me bollëk. Po ashtu, presim edhe nga të rinjtë Llapjanë qe të shkruajnë libra më vlera kombëtare e njerëzore nga fusha e dijës dhe te humanizmit.
E përmbyll këtë shënim me porosinë: "Të mësojmë nga librat e Shefqetit se si shkruhet recensioni (shih qindra recensione të botuara në librin e tij "Libra dhe mbresa", apo si shkruhet poezia që nga libri parë "Larg pikon hëna", Tiranë 1994, që i ka hapur udhën poetit për t'u prezantuar në antologjinë "Pema e ëndrrave", në Bari të Italisë,1995), te libri "Strehët e gjakut" (Prishtinë, 2000), e deri te "Ëndërr e njëjtë, tokë tjetër" (Podujevë, 2007), ose te esetë e komentet politike të botuara në dyvëllimëshin "Zhgënjimi ballkanik 1 dhe 2" (Prishtinë 2005 / 2006), që mund t'i mësojë bukur shumë edhe VIP-at tanë në politikën kombëtare dhe globale.
Shefqetit i dëshiroj sukses ne jetë dhe në veprimtari krijuese, dhe padyshim pres nga ai që në venerimet e tija të ardhshme të ketë parasysh edhe "rastësinë" e një ndëshkimi nga një proces i kurdisur gjyqësor i cili ishte patologjik, e aq më keq më ndërskamcat e "patriotëve me bateria" që e inskenuan pseudoletrarët - shqipfolës.