Nëntori i Thaçit dhe vera e thatë e LDK-së

-- nga Jeton Kelmendi, Bruksel

Qytetarët e Kosovës tanimë të sterlodhur nga premtimet boshe, kanë humbur besimin në faktorin ndërkombëtar dhe faktorin e brendshëm politike. Derisa një pjesë kanë filluar të radikalizohen dhe të mbështesin Lëvizjen Vetëvendosje të Albin Kurtit, pjesa më e madhe është pasivizuar dhe vazhdon jetën të tërhequr nga krahët politikë, që ishte në vitet e pas luftës.

Të sprovuara, të gjitha partitë në vend dhe rezultatet e punës së tyre mjaft të vogla, por gjithashtu duke parë korrupsionin dhe nepotizmin nëpër institucionet publike, mbi gjashtëdhjetë përqind e qytetarëve të Kosovës, me 17 nëntor nuk morën pjesë në zgjedhje. Duke ditur se në "Kosovën e Lirë", çdo gjë zhvillohet me do farë rregullash te UNMIK-ut, kurse ligji është një shkallë e lartë që qytetaret mund vetëm ta shohin në shtetet tjera. Madje për vite me radhë edhe mënyra e të ushqyerit duket se zhvillohet me këso farë rregulloresh, e lëre më tjetër gjë. Forcat politike në Prishtinë, për disa parë zgjedhje me radhë premtuan pavarësi, ngritje të standardit të jetës, premtuan tepër shumë, mirëpo e vërteta ishte krejt e kundërt, madje edhe përtej çdo kufiri.

Nga ana tjetër Bashkësia Ndërkombëtare për disa vite me radhe qe e përgjumur dhe nuk lëvizi asnjë hap drejt zgjidhjes së Statusit të Vendit. Pas trazirave të Marsit, ndërkombëtaret panë se duhet ndryshuar ky realitet, ose do të shohin pamje që çorodisin të ardhmen.
Filluan negociatat Prishtinë-Beograd, me ndërmjetësues Ahtisarin, por u shtynë deri tani, e tutje të shohim...

Nëntori i Thaçit
Kjo vjeshtë si duket ishte bereqetshme për Partinë Demokratike të Hashim Thaçit. Ndonëse Thaçi e kishte premtuar vetën, që do të bëhet kryeministër tetë vite më parë, çdo zgjedhje deri tani, por ai nuk arriti t'i dalë vetës në fjalë e të bëhet shef i qeverisë. Dhe kur bie fjala për kryeministër, duhet ditur se duhet të fitosh në zgjedhje për t'u bërë i shef qeverie.

Pas vdekjes se ish-presidentit Rugova, partia e tij u nda ngase pasardhësi i Rugovës, zori Fatmir Sejdiu, nuk diti ta udhëheqë atë parti aq të madhe, si ja kishte lënë ai. Nëntori ishte i PDK-së dhe i Thaçit, ku rreth tridhjete e katër përqind të votave i shkuan atij, duke e bërë fitues. Është për t'u habitur se PDK në këto zgjedhje mori rreth tre mijë vota më pak se ne zgjedhjet e 2004-it që kishte 28 përqind. Dhe tani duel fituese me dallim gjashtë përqind, në përqindje. Ndoshta edhe pse më pak vota kësaj radhe, këto ishin më të vlefshme???
Sido qe të jetë, me rregulloren e UNMIK-ut, tridhjetë e tetë përqind kanë votuar, por zgjedhjet janë krejt në rregull dhe tash duhet qeveria e re. Kjo është loja e rregulloreve demokratike.

Do t'i ftoj të gjithë për biseda, për ndërtimin e koalicioneve dhe formimin e qeverisë, deklaroi Hashim Thaçi, por shihet qartë se është nxënë pick. Ka shumë mundësi për koalicion por shefat e zyrave të huaja në Prishtinë, i kanë teket e veta dhe duhet përfillur mendimin e tyre. Në ketë kontekst shihet edhe kjo, se Thaçit i konvenon një kalkulim pak më ndryshe, si t'ja bënë sa vet se din.

Një koalicion me partitë e Nexhat Dacit dhe Behxhet Pacollit dhe minoritetet do t'i shkonte më së miri përshtati, ngase tani ju kanë rritë apetitet edhe për marrjen e postit të presidentit të Kosovës dhe për ta bërë këtë, ai i ka dy të tretat e votave. Zyrat e vendeve perëndimore në Prishtinë, nuk i kanë në qejf as Nexhat Dacin, që ju pat thënë disa fjalë kur ishte kryetar parlamenti, as Pacollin që ka miqësi të mirë me Rusinë dhe ka histori kontraverze. Koalicioni me LDK-n e Presidentit Sejdiu, që ka 25 ulëse në parlament, do t'i japë më pak Thaçit sot, por në të ardhmen do t'ia ulë edhe më shumë elektoratin. Pasi që këto dy parti njihen si kundërshtare të mëdha.
Si do që të jetë, vjeshta e sivjetme dhe nëntori janë, të Hashim Thaçit.

Vjeshta e thatë e LDK-së
Të mësuar pa çarë kokën dhe pa punuar fare, të jenë fitimtar në të gjitha zgjedhjet deri sivjet, falë autoritetit që kishte Ibrahim Rugova, partia e Fatmir Sejdiut, këtë verë e kishte të thatë, humbi rreth dy të tretat e votave nga sa kishte me 2004. Konkretisht nga mbi treqind mijë votat e 2004-it, me shtatëmbëdhjetë nëntor mori mbi njëqind mijë vota. Temperaturat e larta gjatë verës së sivjetme më së shumti kishin ndikuar për të keq, tek ky subjekt. Edhe për së vdekuri Rugova ua siguroi do vota, por tani jo më ashtu sikur ishte në këtë botë.

Pas verës së thatë LDK, të korrat vjeshtore i mori si i mori, por tani problemi është se po të hyjë në koalicion me partinë fituese të Hashim Thaçit, do ta ulë edhe më shumë besimin tek qytetarët. Ketë madje e pranon edhe kryetari i parë i partisë Eqrem Kryeziu. Rrezikon ta humbë edhe postin e presidentit që sipas një marrëveshje jo publike me Thaçin në grupin famoz "Grupi i Unitetit", janë marrë vesh ta mbaj deri me 2009.

Vetë sherifi i LDK-së Fatmir Sejdiu, kohë më parë deklaroi se pavarësisht nga koalicioni unë do të mbes president. Për këtë edhe intervenoi që ta largojë nga diskutimi në parlament ligjin për presidentin Ibrahim Rugova, duke menduar që, në atë ligj ta përfshijë edhe veten.