Reflektim për vizitën e Bushit

-- nga Ndue Ukaj

Në mbamëndjen e shëndoshë të një populli gjallojnë data e ngjarje, të cilat e bëjnë të ndjehet krenar për qenësinë e tij, por, çfarë është më e rëndësishmja, në mbamëndjen e kombeve, zakonisht datat dhe ngjarjet e rëndësishme, janë momente për të reflektuar për qasje më pozitive në perspektivat e kohës.

Ndër instrumentet e shumta që përdorin kombet, për të gjallëruar dhe unifikuar gjymtyrët e shkapërderdhura (kjo ndodh sidomos në raste krizash), është reflektimi ndaj ngjarjeve dhe datave me rëndësi, të cilat, bëhen apo janë pjese e memories historike, prandaj edhe e identitetit historik. Kombi ynë, edhe pse me histori tragjike, ndarje e pushtime nga më tragjikët, ka data, ngjarje dhe fenomene të kënaqshme, madje po të jemi të vetëdijshëm të lakmueshme, që mund të hyjnë në konkurrencë me kombe të mëdha - e të cilat duhet të ndikojnë si të këtilla që të reflektojnë pozitivisht ndaj së ardhmes.

Më tej, ngjarjet e datat duhet të ndikojnë për të mirë, në eliminimin, (kur është e nevojshme) e divergjencave destruktive, drejtë qëllimeve dhe objektivave të përbashkëta. Madje, nga këto elemente duhet krijohet paradigma që tejkalon tendencat dytësore dhe vë në funksion mendjet dhe zemrat për një të ardhme më të mirë, e më të shëndoshë kombëtare. Nga këndej, mund të themi se vizita e Presidentit të Amerikës Xhorxh W. Bush, me dhjetë qershor në Shqipëri (vizitë kjo që koincidon me tetë vjetorin e çlirimit të Kosovës dhe ditët e pavarësimit të saj), është një model i shkëlqyeshëm që duhet të ndihmojë çdo njërin që merret me punët e kombit të reflektojë. Kjo vizitë do të hyjë në analet e memories historike shqiptare, për përmasat dhe rëndësinë e saj të jashtëzakonshme, në kohën më të duhur, pavarësimin e Kosovës dhe përgatitjen së Shqipërisë për të përmbyllur tranzicionin në rrugë për rikthim të dinjitetshëm në Familjen Perëndimore.

Por, përveç tjerash, kjo vizitë duhet të reflektojë, apo të themi më thjeshtë, duhet të na mësojë që të tejkalojmë vetveten dhe të rreshtohemi tok për të mirat dhe qëllimet e përbashkëta si komb, sepse në ketë rrugë kemi mik kombin dhe kombet që mbrojnë dhe luftojnë për liri, përparim, zhvillim e paqe pozitive.

Vizita e parë e Presidentit të Shteteve të Bashkuar të Amerikës në Shqipëri, është thënë nga gjithë njëzëri e politikës, mediave, dijës, qytetarët e shumtë, se është historik. Dhe jo vetëm kaq, ajo është përtej, është zgjatim i historisë dhe lidhje e fuqishme me ardhmërinë. Kjo vizitë duhet kuptuar, interpretuar dhe përjetuar si një moment reflektimi, ku qendrat tona të politikëbërjës, elitat intelektuale e mediat, të orientojnë idetë, mendjet dhe qëllimet kombëtare drejtë unifikimit, në gjëra të përbashkëta. Kjo është rruga e vërtetë, është e vetmja alternativë që proceset tona të marrin kaheje edhe më pozitive kështu që kombi shqiptar të përmbyll kapitullin e gjatë të vuajtjeve dhe tragjedive.

Nga kjo vizitë, duhet të mësohemi të këndellemi, që të flakim shpirtngushtësinë, inatet e kapriçet e vockla, kundruall idealeve të mëdha, sepse idealet e mëdha jetësohen vetëm me punë, veprime e ide të përbashkëta. Për të ndihmuar në këtë synim, duhet të reflektoj, në përmasa të thella, vizita e njeriut që prin në botë, jo vetëm në ruajtjen e demokracisë, por edhe në përhapjen e saj në vendet jodemokratike, totalitare e tiranike, ashtu siç na ka ndihmua ne dhe na ndihmon tash. Kjo vizitë, duhet të reflektoj në gjitha hapësirat shqiptare, për të zgjuar ndërgjegjen e shëndoshë, nga sëmundjet e viruset e kohës, nga zvarritjet dhe fragmentimet, të cilat na janë bërë në të shkruarën, që të jemi, ashtu siç proklamohemi, të sinqertë me vetën, e nga këndej me SHBA-të dhe Perëndimin, pjese e mirëfilltë e demokracisë dhe vlerave të qytetërimit perëndimor, të luftojmë për to, t'i mbrojmë ato dhe t'i avancojmë ato. Kështu i bëjmë nder vetë, kështu i nderojmë miqtë tanë dhe kështu hapin rrugë për një jetë më të mirë për gjithë shqiptarët në të ardhmen. Kjo vizitë duhet të na ndihmoj për të "zbuluar" edhe më shume vetveten, për t'i kuruar plagët dhe të metat tona dhe për të gjetur, hapur shtigje drejtë së ardhmes.

Pa dashur të hyjmë në analiza e qëllimit të vizitës së Bushit në Shqipëri, ajo që duhet shtresuar në memorien tonë kombëtare dhe duhet ruajtur si një ngjarje me rëndësi, është fakti i pakontestueshëm se rrugëtimet tona kombëtare janë të lidhura dhe i detyrohen, për shumë arsye këtij kombi; se janë pikërisht vlerat euro-amerikane, ato që na mbajnë gjallë si komb, na kanë shpëtuar nga gllabërimet dhe shpërdorimet e kohës dhe na subvencionojnë në gjitha drejtimet për të arritur në stadin e nevojshëm kombëtar, sendërtimit të aspiratave për të jetuar të lirë, në paqe e perspektivë.
Prandaj, që të tejkalojmë këtë tranzicion të stërzgjatur, është e vetëkuptueshme që kahëjet dhe qëndrimet tona duhet të nuancohen më ide e vizione më pragmatike, të cilat, pa asnjë herezi, do të luftonin, për përafrimin e vlerave dhe kulturës sonë së cunguar, drejtë shtratit të atyre universale: perëndimore.