Rrënimi i edukatës fizike

I motivuar vetëm nga një detyrim njerëzor dhe profesional, nëpërmjet këtij shkrimi dëshiroj të parashtroj disa mendime, për t'i pasur në konsideratë dhe për t'i përkushtuar vëmendje përmirësimit të politikave qeverisëse për sektorin shumë të prapambetur, por me vlera, të kulturës e edukatës fizike dhe sportive. Me keqardhje jam i detyruar të informoj, se gjendja e nivelit e edukatës në të ushtruarit e popullatës me aktivitet fiziko-sportiv gjatë kohës së lirë, në funksion të mirëqenies për një jetë aktive dhe të shëndetshme, është në shifrat e 3-4%. Ky nivel është shumë i ulët që duhet të jetë shumë shqetësues për të gjithë, i papranueshëm dhe që nuk korrespondon aspak me arritjet e mira progresive që po bëhet në sektorët e tij të qeverisjes, që kontribuojnë për mirëqenien e popullit. Të ushtruarit e popullatës në vendet e tjera ballkanike, është në nivelet 25-35%, në vendet evropiane është 45-50%, vendet skandinave mbi 60%, Amerika rreth 50%.

Prapambetja e lëvizjes masive në të ushtruarit me aktivitet fizik e sportiv, e përfaqësuar tashmë me sloganin e unifikuar në mbarë botën, "Sport për të gjithë", kanë pasqyruar politikat jorezultative që janë zbatuar e të trashëguara prej vitesh tek ne. Por, më shqetësuese është fakti, se akoma nuk po vihet as edhe një tendencë ndryshimi, vlerësimi dhe përmirësimi të gjendjes aktuale, si pasojë e së cilës fatkeqësisht po kemi një regres progresiv në shumë probleme sociale, veçanërisht në atë të përgatitjes dhe edukimit të rinisë, në problematikat e shumta mbi shëndetin publik, profilaksi, zhvillim e kurim shëndetësor në vetë nivelin masiv e cilësor të sportit, infrastrukturës sportive etj. Të ushtruarit me aktivitet fizik e sportiv, është një nga të drejtat bazë dhe një nevojë e domosdoshme jetësore për çdo njeri, mbasi ajo përbën një parakusht për mirëqenien dhe cilësinë e jetës së çdo individi e të familjes, dhe si i tillë përfaqëson një burim vlerash të gjithanshme me ndikim të fuqishëm, në dobi të mirëqenies së jetës për të gjithë shoqërinë.

Përmirësimet e lëvizjes "Sport për të gjithë" duhet të vlerësohen edhe tek ne si një problem i rëndësishëm kombëtar, mbasi ai do të luajë një rol të rëndësishëm në jetën shoqërore të vendit, duke ndikuar fuqishëm në përmirësimin e shumë problematikave e shqetësimeve sociale, edukative, ekonomike, shëndetësore, mjekësore, sportive etj. "Sporti për të gjithë" përfaqëson nivelin e kulturës sportive dhe edukatës fizike të një populli, është aktiviteti më madhështor në mbarë njerëzimin. Sporti duhet të jetë i të gjithëve mbasi për të kanë kërkesa, interesa dhe nevoja jetësore i gjithë populli. Përmirësimet në sportin për të gjithë, do të shërbejnë si kusht dhe mundësi reale, që çdo njeri të përfitojë vlerat e gjithanshme jetësore nëpërmjet të ushtruarit fizik, do të jetë një mundësi reale e gjithë përfshirjes në këtë veprimtari të të gjithë kategorive të njerëzve, nga fëmijëria, deri në pleqërinë e thellë, pa dallim moshe, gjinie, gjendjes ekonomike, kulturore, edukative, fizike apo shëndetësore. Sporti për të gjithë, nëpërmjet shumëllojshmërisë së aktiviteteve fizike e sportive që afron, do t'i japë mundësinë çdo individi që të inkuadrohet në këtë veprimtari për të plotësuar sa më mirë dëshirat, kënaqësitë, pritjet dhe veçanërisht nevojat e gjithanshme për të siguruar një jetëgjatësi sa më aktive, të lumtur e të shëndetshme.

Janë këto disa nga arsyet më kryesore që duhet të na bindin të gjithëve, se të ushtruarit e popullatës me aktivitete sportive-fizike domosdoshmërisht, duhet të vlerësohet dhe të menaxhohet jo vetëm si një veprimtari prioritare në politikat e strategjisë kombëtare të sektorit sportit, por në gjithë përfshirjen e detyrimisht të saj edhe në politikat komplekse të strategjive të sektorëve të tjerë, që kontribuojnë për mirëqenien e jetës së popullit, të shëndetësisë, arsimit, edukimit, kulturës, ndërtimit, transportit, ushqimit etj. Që të mundësohet ky objektiv, është domosdoshmërisht e nevojshme që, së pari, të përmirësohet vizioni, vlerësimi dhe përkushtimi për ndryshim nga vetë institucionet e qeverisjes qendrore. Nuk ka se si të pretendohet për arritje më të mira të këtij sektori, me këtë nivel kaq të ulët, nënvlerësues e injorues të përfaqësimit në strukturat institucionale të qeverisjes qendrore e vendore, kur dihet edhe fakti, që drejtuesit kryesor që kanë pasur në dorë fatet e sportit, kanë qenë tradicionalisht me emërtesa politike e me një vizion jo të mjaftueshëm sportiv. Prej shumë vitesh, aktualisht edhe sot, strukturat drejtuese të sporteve kanë menaxhuar vetëm cilësinë sportive, vetëm atë kontigjent shumë të vogël prej 1%, të 3-4% të popullsisë, që vetushtrohet me aktivitet sportiv, ndërsa masa e madhe e popullsisë që ka interesa, dëshira, veçanërisht kërkesa e nevoja jetësore për të përfituar nga kjo veprimtari, janë lënë në harresë pa asnjë menaxhim institucional, gjithçka është spontane dhe formale, që gjithmonë jemi vetëkënaqur vetëm me organizimin e ndonjë aktiviteti sporadik, që në të shumtën e rasteve ata janë çedukuese dhe jo me efektivitetin që duhet të përfitohet nga këto lloje aktivitetesh.

Struktura institucionale e sportit duhet të përmirësohet, për të siguruar një menaxhim sa më të mirë e kompleks, për të gjithë strukturën piramidale me bazë sa më të gjerë që duhet të ketë bota sportive, për të mundësuar kështu përfitimin e madhështisë së vlerave të shumta për jetën e gjithë popullit, ku sporti cilësor, si zakonisht përbën vetëm 1% të këtyre vlerave, ndërsa 99% do të përfitohen vetëm nëpërmjet përmirësimit të lëvizjes mbarë popullore, "Sport për të gjithë". Vetëm atëherë kur të kemi përmirësuar ndërtimin e piramidës sportive, atëherë do ta kemi shumë më të lehtë për të pretenduar përmirësime edhe në shumë sektorë dhe tregues të tjerë të rëndësishëm me karakter social, edukativ, shëndetësor, ekonomik etj. E gjithë kjo madhështi vlerash që përfitohen nga "Sporti për të gjithë", nuk mund të realizohen vetëm nga strukturat sportive.

Sporti duhet të jetë i të gjithëve, nga ai përfitojnë të gjithë, prandaj është domosdoshmërisht e nevojshme për një përmirësim të bashkëveprimit ndërmjet institucioneve të tjera shtetërore, të mbështetura fuqimisht edhe nga një shumëllojshmëri strukturash vullnetare, për të ndërtuar së bashku strategjinë kombëtare qeveritare, që do t'i shërbejë jetës sa më aktive e të shëndetshme të popullit. Z. Kryeministër! Po jua kërkoj edhe si mjek dhe si prind, që të bëni pak përpjekje për të gjithë sado pak kohë, për t'iu përkushtuar edhe këtij problemi me rëndësi e vlera kombëtare. Kam shumë besim, se me mundësitë tuaja do të kontribuoni shumë më tepër, për të dalë nga prapambetja edhe të këtij sektori të rëndësishëm për mirëqenien e popullit