D E K L A R A T Ë

Kemi ndjekur me interes të veçantë e me shqetësim të thellë gjëndjen tejet të ndërlikuar dhe të rrezikshme në të cilën është zhytur Shqipëria si pasojë e lojës së paprinciptë e destabilizuese e një grushti politikanësh në Shqipëri.

Me brengosje vërejmë se kjo lojë meskine e këtij elementi destruktiv po kalon tashmë rrezen dhe efektin e kafeneve e salloneve politike të Tiranës dhe po shndërrohet në një faktor që rrezikon të bllokojë zhvillimet demoktatike në vënd dhe rrjedhimisht të dëmtojë procesin e integrimit të Shqipërisë në strukturat euroatlantike si NATO e BE dhe të godasë mbas shpine në këto çaste kritike realizimin e aspiratave të kahershme kombëtare.

Mosgjetja e një kompromisi mes politikanëve shqiptarë është dëshmi e mbivendosjes së interesave egoiste personale nga ana e disa politikanëve të korruptuar, apo, më keq akoma, vënja e tyre në shërbim të interesave antishqiptare.

Loja me zgjedhjet, përpjekjet për sabotimin dhe bojkotimin e procesit zgjedhor, është një atentat që kryhet kundër demokracisë. Mospranimi i rotacionit paqësor e normal politik, i cili qëndron në thelbin e pluralizmit dhe demokracisë, ushqimi i ëndrave dhe iluzioneve për përmbysje politike të dhunshme, që evokojnë hijen e zezë të 1997-ës, janë dëshmi e ruajtjes së kujtesës diktatoriale e terroriste nga sundimi famëkeq komunist 50-vjeçar në Shqipëri.

Çdo krizë, tension dhe destabilizim i Shqipërisë në këtë kohë, është një thikë mbas shpine ndaj shqiptarëve të Kosovës, të cilët tashmë i ndajnë vetëm javë nga realizimi i ëndrës shekullore për pavarësi. Destabilizimi i Shqipërisë që synojnë të arrijnë një shpure e papërgjegjshme politikanësh në Tiranë është dhurata më e madhe që mund t’u bëhet sot qarqeve shoviniste e antishqiptare serbe.

Populli shqiptar, një ndër më të lashtët dhe krenarët e Europës, nuk meriton sot, në agimin e mijëvjeçarit të ri, të njolloset e të përbaltet nga ajo shpure renegatësh. Historia do t’i dënojë ata përjetësisht.

“Vatra” mbështet fuqimisht deklaratat e faktorit ndërkombëtar – Departamentit të Shtetit Amerikan, Bashkimit Eurioian, institucioneve si OSBE dhe ODHIR dhe gjithashtu kërkon nga klasa politike shqiptare përgjegjshmëri, dinjitet dhe qëndrime politike konstruktive.

Në emër të shqiptarizmit për të cilin “Vatra” është njohur që nga themelimi i saj 95 vjet më parë, i bëjmë thirrje popullit shqiptar, pavarësisht nga bindjet dhe përkatësitë politike – të majta a të djathta qofshin, të jenë sa më të bashkuar, sa më tolerantë ndaj njëri-tjetrit dhe të kenë parasysh se këto janë çaste tepër kritike për të ardhmen e kombit shqiptar.

Zhvillimi dhe fuqizimi i demokracisë është rruga e vetme e integrimit të vendit dhe e realizimit të aspirateve tona të drejta kombëtare. Mbajtja e zgjedhjeve të ardhshme vendore në kohë dhe konform me ligjet e shtetit demokratik është kusht i domosdoshëm për të shmangur pasoja me dëme të pallogaritshme.