SHBA, Këshilli i Evropës dhe OSBE kryqëzojnë Berishën

-- nga Armand Maho, TemA, 24.12.2008

Shtetet e Bashkuara shprehën dje shqetësim për miratimin e ligjit për “Pastërtinë e Figurave të Zyrtarëve” nga parlamenti i Shqipërisë. Vetëm pak orë pas deklaratës së ambasadës amerikane, se ligji ngre probleme serioze ligjore dhe qeverisëse, ka reaguar edhe Departamentit i Shtetit përmes zëdhënësit, Shon McCormack. Gjatë konferencës së rregullt për shtyp ai tha se shqetësimet për këtë ligj ia ka ngritur qeverisë shqiptare ndihmëssekretari i shtetit, Daniel Fried.

Siç raporton Zëri i Amerikës, zëdhënësi Shon McCormack tha se procesi i ndjekur për miratimin e ligjit për “Pastërtinë e Figurave” ka dhënë arsye për shqetësime nga pala amerikane. Shtetet e Bashkuara, tha ai, ia kanë shprehur këto shqetësime qeverisë shqiptare dhe pikërisht ndihmëssekretari i Shtetit për Çështjet e Evropës dhe Euroazisë, Daniel Fried bisedoi me kryeministrin e Shqipërisë për këto shqetësime.

Zoti McCormack tha se ky është një nga ato procese që Shtetet e Bashkuara po e ndjekin nga afër. Është me rëndësi shtoi ai, që në çdo demokraci qeveria të udhëheqë në një mënyrë të tillë që të gjithë njerëzit të kenë mundësi të marrin pjesë në përcaktimin e së ardhmes së vendit. Shtetet e Bashkuara, tha zëdhënësi i Departamentit të Shtetit, e kanë të qartë se Shqipëria është duke u ballafaquar me historinë e saj, por ajo duhet të sigurojë që në këtë proces të mos i përjashtojë njerëzit nga jeta e përditshme në vend.

Vetëm disa orë më përpara ishte ambasada amerikane ajo që reagoi ndaj ligjit duke shprehur shqetësim të thellë për të dhe duke e quajtur një ligj që do ngrejë shqetësime serioze ligjore dhe kushtetuese. “Ambasada e ShBA ndoqi nga afër votimin e mbrëmshëm në parlamentin shqiptar që miratoi ligjin për “Pastërtinë e Figurës” me shumicë të thjeshtë. Ne jemi thellësisht të shqetësuar. Ky ligj ngre pikëpyetje serioze ligjore, qeverisëse dhe kushtetuese te partnerët ndërkombëtarë përfshirë Shtetet e Bashkuara. I bëjmë thirrje qeverisë së Shqipërisë të marrë hapa të menjëhershme në konsultim me ekspertët kombëtarë dhe ndërkombëtarë për të siguruar që ky ligj do të përmbushë standardet ndërkombëtare.”

Pak ditë më parë, Berisha mohoi një bisedë më zotin Fried. Më pas ai e konfirmoi që ka patur një bisedë për këtë çështje, por nuk e ka pasur ditën që ka dhënë konferencën, por një ditë më parë.

OSBE: Qeveria të marrë masa që ligji të përmbushë standardet ndërkombëtare

Prezenca e OSBE në vendin tonë reagoi dje sërish në lidhje me ligjin e lustracionit. Ata kanë kërkuar që ligji të përmbushë standardet ligjore dhe të ketë konsulencën e ndërkombëtarëve. Alex Finnen, zv/kryetar i Prezencës së OSBE në Shqipëri, tha:

“Ligji për “Pastërtinë e Figurës”, i miratuar nga Kuvendi, duhet të përmbushë kërkesat e një vendi që bazohet mbi shtetin ligjor. Në veçanti, duhen respektuar plotësisht dispozitat përkatëse të Kushtetutës dhe standardet e pranuara ndërkombëtare. Për këtë qëllim, nga qeveria shqiptare pritet që të ndërmarrë hapa të menjëhershëm në konsultim me ekspertë kombëtarë dhe ndërkombëtarë për të garantuar që ky ligj përmbush standardet ndërkombëtare, dhe në këtë mënyrë do të sigurojë partnerët ndërkombëtarë për angazhimin e saj ndaj këtyre standardeve.”

“Prezenca e OSBE ka ndjekur debatin në parlamentin shqiptar, ku u miratua ligji për “Pastërtinë e Figurës” me shumicë të thjeshtë, të 77 anëtarëve të pranishëm. Ne gjithashtu vërejmë shqetësimet e shprehura sot nga disa shtete pjesëmarrëse të OSBE dhe nga Sekretari i Përgjithshëm i Këshillit të Evropës. OSBE mbetet e gatshme të ndihmojë, në rast se kjo gjë i kërkohet nga qeveria shqiptare”, - vijoi më tej Finnen.

Disa orë përpara se të lëshonte këtë deklaratë, Finnen pati një takim me kryetaren e Kuvendit, Jozefina Topalli.

Kjo e fundit i bëri të ditur se ligji është një detyrim ndaj popullit shqiptar. “Dje parlamenti votoi ligjin mbi pastërtinë e figurës së zyrtarëve të lartë. Personalisht, e konsideroj këtë një arritje dhe një borxh, ndonëse pak të vonuar, ndaj vuajtjeve dhe kalvarit çnjerëzor që populli shqiptar kaloi për gjysmë shekulli. Parlamenti votoi një ligj të standardeve, model i ligjit çek. Ligji çek është shqyrtuar dhe miratuar dy herë nga Gjykata Kushtetuese çeke dhe nuk është vënë kurrë në dyshim nga Gjykata Evropiane e të Drejtave të Njeriut në Strasburg.

Ajo që është kushtetuese për Gjykatën Evropiane të të Drejtave të Njeriut dhe për Çekinë, vend anëtar i BE, nuk mund të jetë jokushtetuese për Shqipërinë që ka kaluar kalvarin më të egër diktatorial.

Nuk ka Kushtetutë në vende të lira që mandatet t’i mbajë mbi krimin apo të veshë krimet me imunitet”, - tha Topalli.

Këshilli i Evropës, Davis: Ligji mund të shkaktojë më shumë padrejtësi

Sekretari i Përgjithshëm i Këshillit të Evropës, Terry Davis, reagoi dje në lidhje me ligjin e lustracionit, duke theksuar se ai do shkaktojë më shumë padrejtësi se sa do i rregullojë ato. Sipas Davis, faktori kohë është i mjaftueshëm për të gjykuar se ligji lë vend për shqetësime. “Ligji për lustracionin u kalua në parlamentin shqiptar me një shpejtësi të madhe. Kjo nuk u la shumë hapësirë mbështetësve të tij për të shpjeguar se pse ishte i nevojshëm një ligj i tillë rreth dy dekada pas rënies së regjimit komunist. Vetëm faktori kohë është një arsye për t’u shqetësuar se ligji mund të shkaktojë më shumë padrejtësi se sa do i rregullojë ato. Për sa i përket përmbajtjes së ligjit, do ta bëj të qartë pozicionin tim, pasi ekspertët e Këshillit të Evropës të kenë analizuar tekstin”, - tha Davis. Reagimi i tij vjen një ditë pasi kryeministri, Sali Berisha, u përpoq të bënte një ndarje mes Amerikës dhe Evropës për sa i përket çështjes së dënimit të komunizmit. Ai përdori madje Këshillin e Evropës për t’iu referuar faktit se evropianët kanë më shumë eksperiencë në këtë drejtim.