Derri i inatit i kryeministrit, gjoba

Nuk ka si shpjegohet ndryshe: e ka kapur "derri i inatit", kryetarin Berisha, derisa bëri gafën që gjobiti rëndë një televizion, vetëm e vetëm sepse i përplasi një të vërtetë që me pak fjalë mund të përmblidhet si vijon: "po ia fut kot, plako". Gjoba ishte në kundërshtim me teorinë dhe praktikën hipokrite me masmedian në periudhën berishiste: "gënjeni, shpifni sa të doni, se nuk ju hiqet një qime; po thatë të vërteta, nuk jua var njeri". Kjo gjobë vjen kundër kësaj teorie dhe praktike, dhe mund të shpjegohet vetëm me "derrin e inatit", pra me një gjendje psikike të trazuar shumë të kryeministrit tonë. E pra, ajo që i thanë, me spotin e tyre, ata të rinjtë simpatikë të G 99, nuk ishte as gënjeshtër, por ishte një e vërtetë e pastër.

Kryeministri tradhton veten

Me këtë gjobën, ndodhi si ajo fjala e urtë, "Ç'ka barku, i nxjerr bardhaku". I vetmi ndryshim në këtë rast është se nuk ishte "bardhaku" (pija), por ishte "derri i inatit", që e bëri kryeministrin të tradhtojë veten, të nxjerrë "ç'ka barku i tij", urrejtjen e pamasë ndaj masmedias së lirë, ndaj lirisë dhe demokracisë.

Z. Berisha, gjobiti sa i hëngri krahu, televizionin "News 24", sepse i bëri një kritikë me vend: ironizohet ai, z. Berisha, për thirrjet e tija hipokrite për luftë kundër korrupsionit, që synojnë shpëlarjen e trurit të shqiptarit. Që nga fakti që thërret kundër korrupsionit ai, ai, njeriu më i korruptuar në Shqipëri, mund të mbyllesh çdo analizë. Po, po, më i korruptuari, sepse, e para, është korrupsioni më i madh vjedhja e votave. Nuk dihet njeri në historinë post-komuniste shqiptare, që të ketë vjedhur më shumë vota, sesa ka vjedhur z. Berisha, me megadushkun e tij, atë të zgjedhjeve të vitit 2005.

E dyta, është korrupsioni më i madh, kur një kryeministër i babëzitur pas pushtetit personal, "nuk e ditka" që në mes të vendit të tij, ka mbledhur aq municion, saqë vriten 26 vetë e plagosen mbi 300 të tjerë.

Vetëm këto dy shembuj që sapo i thamë më lart, vjedhja e votave dhe shpërthimi i Gërdecit, do të dilnin dhe të tepronin për të vërtetuar katërçipërisht korrupsionin e çdo kryeministri në botë.

Nëse kryeministri Berisha (i gjithë sistemi shtetëror i kryesuar nga ai), do të kishte minimumin e qëndrimit demokratik ndaj shtypit, nëse do të kishte minimumin e sensit të kryerjes së detyrës, ai duhet të "gjobiste", të dënonte veprimet e padrejta, dhe të mos të rrinte indiferent ndaj të vërtetave. Po rreshtojmë edhe tri grupe "gjobitjesh" që kryeministri nuk i ka kryer.

"Gjobitje" të pakryera

1-Duhej "gjobitur" vetë kryeministri Berisha, sepse nuk ka vepruar fare kundër shkeljeve urbanistike të miqve të tij të fshehtë, edhe brenda opozitës (PS-së, apo partisë ilegale të z. Fatos Nano etj.). Ky mosdënim i ndërtimeve abuzive, është një ushqim i korrupsionit.

2-Duhej "gjobitur" kryeministri, sepse nuk ka bërë e nuk po bën asgjë (veç llafe boshe) për shitjen e tokës shtetërore. Shumë nga këto abuzime janë bërë që në kohën e z. Fatos Nano, dhe janë denoncuar publikisht që "në kohën e z. Nano", e në vazhdim në "kohën e z. Berisha". Tani, "në kohën e tij", z. Berisha duhet t'i kishte goditur këto tre vjet që është kryetari i çdo gjëje. E kemi fjalën për tokën shtetërore "të shitur në pronësi private" pas vitit 1995, kur hyri në fuqi neni 3, i ligjit Nr.7980, datë 27.7.1995, "Për Shitblerjen e Trojeve", i cili dhe sot akoma është në fuqi. Ja dhe një herë se çfarë shkruhet në këtë ligj: "Derisa të përfundojë kompensimi fizik i ish-pronarëve, kalimi i trojeve të lira nga pronë shtetërore në pronë private bëhet vetëm në rastet që vijojnë [...]".

Praktikisht ky ligj ndalon shitjen e tokës shtetërore. Askush nuk lejohet ta shesë tokën shtetërore, derisa të përfundojë kompensimi fizik i ish-pronarëve, i cili pothuaj nuk ka nisur. Nuk lejohen ta shesë njeri, as me gjoja "kompensimet klienteliste të ish-pronarëve" e pastaj "blerjen e tokës së kompensimit", që z. Berisha i di mirë se janë të gjitha abuzive.

Nuk godet korrupsionin as të pushtetarëve nanoistë të para vitit 2005, sepse z. Berisha ata i duhen për kolonën e pestë në radhët e opozitës aktuale.

3-Duhej "gjobitur" kryeministri, sepse organizoi legjitimimin e vjedhjes së pronës shtetërore, duke ua dhënë tokën e grabitur, falas "informalëve". Këtë falje "të pronës sonë", ai e bëri që t'u blejë votën "informalëve". Kjo votë e pruri atë në pushtet, e po vota e tyre shpresohet se do ta mbajë në pushtet edhe në 2009 e prapa-mos e thëntë Zoti.

Një Vlerë që kryeministri e lë pa e vjelë

Po të mblidhen të gjitha vlerat e vjedhjeve dhe abuzimeve të mësipërme, që z. Berisha i ka në dorë t'ia kthejë buxhetit të shtetit, ajo shumë rezulton disa dhjetëra miliarda Euro. Këto janë shumë më tepër se lista mashtruese e spotit të kryeministrit. E ç'është dhe më kryesorja, këto euro janë të vërteta, jo si ato eurot (apo dollarët) e spotit të kryeministrit, ku rreshtohen si "para të marra korrupsionit", edhe paratë që në fakt u janë marrë biznesmenëve në Shqipëri, por edhe njerëzve të thjeshtë, si rezultat i rritjes së ngarkesës fiskale reale të tyre: në Shqipërinë e z. Berisha, njerëzve po u merret nga xhepat, gjithnjë e më shumë para. Nejse, kemi shkruar gjatë për hipokrizinë e "uljes së taksave", dhe nuk është vendi ta zgjasim këtu.

Gjobitja e drejtë

Normalisht, shteti duhet t'i heqë atë gjobë "News 24", dhe t'ua vërë dhjetëra dhe qindra mashtruesve dhe gënjeshtarëve që kanë mbushur masmediat, dhe që ushtrojnë profesionin e tyre të lirë dhe të paprekur, bile të mbrojtur dhe të inkurajuar nga shteti i sotëm shqiptar.

Fatmirësisht, opinioni shqiptar tashmë ia ka hequr gjobën "News 24".