Obama mbështet pavarësinë e Kosovës

-- nga Ruben Avxhiu*), 20.09.2008

Në një deklaratë dërguar gazetës “Illyria” në New York, kandidati demokrat për president në SHBA, Barack Obama ka deklaruar se mbështet pavarësinë e Kosovës dhe do të punojë për forcimin e sovranitetit të plotë të saj.

Në një deklaratë dërguar gazetës “Illyria” në New York, kandidati demokrat për president në SHBA, Barack Obama ka deklaruar se mbështet pavarësinë e Kosovës dhe do të punojë për forcimin e sovranitetit të plotë të saj.

Deklarata është përpjekja e parë publike e senatorit nga Illinois për të komunikuar drejtpërdrejt me komunitet shqiptar në SHBA.

Vendosja e theksit te çështja e Kosovës, mund të ketë si synim qetësimin e shqiptaro-amerikanëve të cilët kanë ndjekur me nervozizëm deklaratat që senatori ka bërë lidhur me Serbinë. Ndonëse në asnjë prej tyre nuk vihej në dyshim pavarësia e Kosovës, deklaratat e Obama-s i kanë bërë shumë shqiptarë të dyshojnë se senatori nuk e njeh mirë historinë e viteve ‘90 të Ballkanit dhe se mund të jetë i ndikuar jo pak nga lobi serb, që në Illinois ka praninë e tij më të fortë në SHBA.

Megjithatë, deklarata që mbërriti dje në zyrën e gazetës “Illyria” nuk lë dyshime për angazhimin e kandidatit demokrat.

“Barack Obama e mbështet pavarësinë e Kosovës dhe dëshirën e saj për të ecur drejt sovranitetit të plotë”, thuhet në deklaratë. “Shtetet e Bashkuara duhet të punojnë për të ndihmuar në zhvillimin e një demokracie vibrante në Kosovë, të siguruar nëpërmjet pushtetit të ligjit e që garanton të drejtat e të gjithë njerëzve.”

Deklarata shkon edhe më tej duke shprehur mbështetjen për integrimin e Kosovës në institucionet euro-atlantike, duke ndërtuar një shoqëri të lirë e tolerante që nxit të drejtat e pakicave dhe mbron objektet kulturore e fetare.

Si president i Amerikës, Obama do të punojë për “zhvillimin e një ekonomie tregu të begatë në Kosovë, duke u përqendruar në zhvillimin ekonomik dhe hapjen e vendeve të punës, si dhe me ndihma për sektorët e infrastrukturës dhe energjisë”.

Në deklaratën e tij, Obama gjen rastin të duartrokasë “edhe arritjet e rëndësishme të Shqipërisë”. Ai mbështet hyrjen e Shqipërisë në NATO dhe shpreson që kjo ëndërr të bëhet sa më shpejt realitet.

Një numër shqiptaro-amerikanësh demokratë kanë mbështetur Obama-n që në hapat e para të fushatës së tij, ndonëse shumica ka qenë të tërhequr nga Hillary Clinton, për shkak të popullaritetit të presidentit Bill Clinton dhe të afërsisë me zonjën e tij si Senatore e Shtetit të New York-ut.

Nga ana tjetër, serbo-amerikanët kanë shprehur qysh në fillim përkrahjen e tyre për senatorin Obama, jo vetëm në Illinois por edhe në Ohio e Pennsylvania, ku Obama ishte shumë në vështirësi përballë rivales së tij të fuqishme. Në fakt, vota e shqiptarëve është shumë më e madhe e më vendimtare se ajo e serbëve dhe e tillë është edhe fuqia shqiptaro-amerikane për financime të fushatave.

Një letër shumë miqësore e Obama-s për një nga organizatat më të mëdha serbe në SHBA si dhe një letër për presidentin Tadiç pas fitores në zgjedhje dobësuan përkrahësit e senatorit në komunitetin shqiptaro-amerikan, duke bërë edhe një pjesë të demokratëve që të kthejnë kokën nga John McCain, kandidati i Partisë Republikane për President, i cili ka qenë i flaktë në mbështetjen e tij për hyrjen e NATO-s në Kosovë, qoftë edhe trupa tokësore si dhe ka folur në favor të pavarësisë së Kosovës përpara se kjo të bëhej realitet.

Deklarata e ardhur dje në gazetën “Illyria” nuk sjell ndonjë ndryshim qëndrimesh për Obama-n por shënon fillimin e vëmendjes së kampit të tij për faktorin shqiptaro-amerikan në SHBA.

Nuk dihet nëse kjo ka ardhur nga ndikimi i senatorit Joe Biden që është zgjedhur nga Obama si zëvendës i tij. Lëvizja mund të ketë të bëjë edhe me përpjekjen e Obama-s për të bashkuar partinë në prag të zgjedhjeve presidenciale të nëntorit. Shqiptaro-amerikanë janë me shumicë në shtete demokrate si New York e Neë Jersey, por ata i gjen edhe në shtetet vendimtare për zgjedhjet si Ohio, Pensylvania, Michigan, Florida etj.

Beteja mes dy rivalëve kryesorë është shumë e fortë dhe Obama do të ketë nevojë për çdo votë përfshi këtu edhe ato të shqiptaro-amerikanëve.

“Barack Obama dhe Joe Biden do të punojnë me komunitetin shqiptaro-amerikan për të rikthyer ëndrrën amerikane dhe për të ringritur figurën e Amerikës në botë”, thuhet veç të tjerash në deklaratën e dërguar në gazetën “Illyria”. “Së bashku me këtë komunitet ne do të ndërtojmë mbi themelet e lidhjeve dhe vlerave që i kanë bashkuar shqiptarët dhe amerikanët për më shumë se një shekull”.

Nuk dihet nëse kjo deklaratë do të mjaftojë për të qetësuar shqiptaro-amerikanët që deri tani e kanë parë me dyshim kandidaturën e Obama-s por ajo është sigurisht një hap në drejtimin e duhur.