KKSHA-ja organizon forum publik me zyrtarë të Departamentit të Shtetit Amerikan për të diskutuar të ardhmen e Kosovës

Washington DC, 12 maj, 2003: Këshilli Kombëtar Shqiptaro Amerikan (KKSHA) lëshoi këtë deklaratë për shtyp në lidhje me forumin që mbajti kohët e fundit me zyrtarët e departamentit të Shtetit Amerikan ku u diskutua e ardhmja e Kosovës.

Këshilli Kombëtar Shqiptaro Amerikan (KKSHA) mbajti forumin publik “E Ardhmja e Kosovës” më 9 maj 2003 në New York ku zyrtarë të Departamentit të Shtetit Amerikan dhe publiku shkëmbyen mendime mbi qasjet politike ndaj të ardhmes së Kosovës si dhe shqyrtuan sfidat para së cilave ndodhet Kosova sot, si ndërtimi i institucioneve demokratike dhe tranzicioni drejtë ekonomisë së tregut.

Folësit kryesorë ishin Donald Braum, zëvendësdrejtor për Kosovën pranë Departamentit të Shtetit Amerikan, dhe Joshua Black, zyrtar për Kosovën pranë Departamentit të Shtetit Amerikan. Forumi u drejtua nga kryetari i KKSHA-së Richard S. Lukaj, ndërsa kryetari i komunës së Gjokavës, Aqif Shehu, që ndodhet për vizitë në ShBA, foli për situatën në qytetin që ai drejton.

Duke iu referuar përparimit që është arritur qysh prej përfundimit të luftës gati 4 vjet më parë, z. Braum tha se tashmë Kosova ka një Asamble të zgjedhur me vota të lira, ka forcën e saj policore dhe Trupat Mbrojtëse të Kosovës që përbëhet kryesisht nga ish-luftëtarë të Ushtrisë Çlirimtare të Kosovës. Mirëpo, zyrtari amerikan vuri menjëherë në dukje se ende shumë ka mbetur për t’u bërë në mënyrë që të arrihet progresi i dëshiruar.

“Institucionet në Kosovë janë të ngadalta; në vend se të mendojnë për ide, ato grinden”, tha z. Braum, duke shtuar se institcionet qeveritare duhet të jenë më aktive në shqyrtimin e problemeve si papunësia tepër e lartë prej 70 për qind, kthimi i refugjatëve, mungesa e investimeve të huaja dhe produktiviteti i ulët.

E përbërë kryesisht nga individë shqiptaro-amerikanë dhe analistë amerikanë të interesuar në të ardhmen e Kosovës dhe çështjeve shqiptare në përgjithësi, të pranishmit e sfiduan qëndrimin zyrtar amerikan që kërkon plotësimin e standarteve para nisjes së diskutimit mbi statusin përfundimtar të Kosovës. Siç dihet, ndër listën e standarteve që kërkohen të plotësohen para përcaktimit të statusit afatgjatë të Kosovës përfshihen edhe kthimi i refugjatëve, lëvizja lirshëm e minoriteteve, formimi i institucioneve demokratike, mbizotërimi i rregullit dhe ligjit, etj.

Duke bërë të ditur se pavarësia është e vetmja zgjidhje për problemet e brendshme të Kosovës dhe mbarë gadishullit, anëtari i Bordit Drejtues të KKSHA-së, Harry Bajraktari, nënvizoi se njohja nga bashkësia ndërkombëtare e një Kosove sovrane do t’i hapte rrugën zhvillimit ekonomik dhe do të sillte një stabilitet rajonal tepër të nevojshëm.

Autori dhe gazetari Stephen Schwartz, artikujt e të cilit janë botuar shpesh nëpër revista dhe gazeta tepër të njohura, si “National Review” dhe “Weekly Standard”, shprehu shqetësim ndaj faktit se edhe pse Kosova ndodhet në Evropë populli i saj nuk ka ujë të pijshëm, rrymë elektrike, shtypit vendor i kanoset rreziku i censurimit nga UNMIK-u, ndërkohë që mësuesit kanë muaj që nuk janë pagur – duke u detyruar kështu të bëjnë edhe punë të dyta jashtë profesionit të tyre, si shitje në tregun e hapur, ndërtimtari, etj.

Z. Schwartz tha se ndenja duarkryq para këtyre probleme mund të shkaktjnë një krizë sociale në Kosovë.

Çfarë do të ndodhë, pyeti ai, nëse populli i Kosovës nuk duron të jetojë më pa ujë e pa drita e vendos të dalë rrugëve, dhe atëherë mësuesit – që nuk paguhen aq sa duhet për të përballuar jetesën – u bashkohen atyre dhe UNMIK-u në kundërpërgjigje të pasqyrimit të ngjarjeve vendos të mbyllë shtypin e lirë?

Pjesëmarrës të tjerë, si aktivisti i komunitetit Ahmet Zherka, sugjeruan se do të jetë më mirë sikur Kosova të administrohet nga SHBA-të dhe jo nga OKB-ja, sidomos kur merret parasysh se shumë anëtare të saj me të drejtë vote jo vetëm që vazhdojnë të jenë kundër pavarësisë së Kosovës por edhe kundërshtuan ndërhyrjen amerikane për të çliruar Irakun nga regjimi diktatorial i Sadam Huseinit.

Në përgjigje të komenteve të z. Zherka, Z. Black vuri në dukje se e ardhmja e Kosovës është me institucioent evropiane, amerikane dhe botërore, duke shtuar se për këtë arsye edhe OKB-së i takon të luajë një rol në arritjen e këtij qëllimi.

Duke theksuar se “shqiptarët janë ndër miqtë tanë më të mirë”, ai tha se përkrahja e shqiptarëve për ndërhyrjen amerikane në Irak është vënë re edhe nga zyrtarë të lartë në Shtëpinë e Bardhë dhe Departamentin e Shtetit.

I mbajtur në New York, ku është vendosur komuniteti më i madh shqiptar në Amerikë, ky forum i KKSHA-së dëshmon vazhdimin e përpjekjeve të organizatës për të afruar komunitetin shqiptaro-amerikan me qeverinë amerikane dhe për t’u dhënë atyre mundësinë që të shkëmbejnë mendimet në lidhje me të ardhmen e Kosovës. Forumi po ashtu ishte një shembull i ndkimit pozitiv që KKSHA-ja ka në Washington, D.C. ndërkohë që nxjerr në pah përpjekjet e kësaj organizate për të përmirësuar të ardhmen e të gjithë shqiptarëve në Ballkan.

Këshilli Kombëtar Shqiptaro Amerikan (KKSHA) është një organizatë jo përfituese dhe jo qeveritare e dedikuar ndaj përkrahjes së çështjeve shqiptare, promovimit të paqes dhe zhvillimit ekonomik në Ballkan për të forcuar politikat demokratike, për të inkurajuar respektin për të drejtat e njeriut nëpërmjet ofrimit të programeve të zhvillimit dhe edukative. Për më shumë informacion mbi KKSHA-në luteni të vizitoni këtë faqe Interneti: www.naac.org.