KKSHA-ja përshëndet refuzimin e presidentit Moisiu për të ratifikuar marrëveshjen ushtarake Shqipëri-Greqi

Washington DC, 12 maj, 2003: Këshilli Kombëtar Shqiptaro Amerikan (KKSHA) lëshoi këtë deklaratë për shtyp në lidhje me refuzimin e presidentit Moisiu për të firmosur ratifikimin e marrëveshjes ushtarake Shqipëri-Greqi për riparimin e bazës ushtarake të Bishtit të Pallës në veri të Durrësit.

Këshilli Kombëtar Shqiptaro Amerikan (KKSHA) përshëndet refuzimin e presidentit Alfred Moisiu për të firmosur ratifikimin e marrëveshjes ushtarake Shqipëri-Greqi për Rindërtimin e Bazës Ushtarake në veri të Durrësit, shkruhej në një deklaratë zyrtare që KKSHA-ja nxorri më 12 maj, 2003.

KKSHA-ja e përkrah plotësisht miqësinë dhe bahskëpunimin e sinqertë ndërmjet Shqipërisë dhe Greqisë. KKSHA-ja mendon se marrëdhëniet dypalëshe duhet të bazohen në parimet themelore të ligjeve ndërkombëtare, si për shembull të barazisë dhe dinjitetit kombëtar, bashkekzistencës paqësore, mbrojtjes së të drejtave të minoriteteve në secilin vend, etj.

KKSHA-ja vëren se qysh prej vitit 1987 presidentët dhe parlamentet greke kanë refuzuar të abrogojnë Ligjin e Statusit të Luftës me Shqipërinë, i miratuar në vitin 1940. Në një takim me përfaqësues të KKSHA-së në New York, Ministri i Jashtëm Papandreu pranoi se Ligji i Statusit të Luftës ekziston dhe se ai duhet të anullohet e abrogohet nga parlamenti grek në mënyrë që të bëhet i pavlefshëm. Në vazhdim, ai premtoi që do të punonte për zgjidhjen e kësaj çështjeje dhe të çështjeve të tjera që nuk janë zgjidhur ende. Deklarata politike që kryeministri shqiptar dhe ai grek kanë bërë kohët e fundit në lidhje me “pavlefshmërinë” e Ligjit të Statusit të Luftës nuk mjaftojnë për të kapërcyer pengesat e vërteta ligjore dhe historike që qëndrojnë në rrugën e bashkëpunimit të vërtetë ndërmjet këtyre dy vendeve.

KKSHA-ja mendon se si parakusht për thellimin e marrëdhënieve ushtarake dypalëshe ndërmjet Shqipërisë dhe Greqisë nevojitet të bëhet abrogimi i menjëhershëm dhe i pakushtëzuar i Ligjit të vitit 1940 mbi Statusin e Luftës me Shqipërinë, ndryshimi rrënjësor i doktrinës ushtarake greke që e vendos Shqipërinë Jugore nën ombrellën e mbrojtjes greke, si dhe zhdukja e qëndrimit shovinist dhe anti-shqiptar që ka zënë rrënjë në Ministrinë e Mbrojtjes Greke, sikurse është dëshmuar në një sërë botimesh zyrtare.

KKSHA-ja i bën thirrje parlamentit shqiptar që të përkrahë plotësisht presidentin Moisiu në veprimin e arsyeshëm dhe ligjor që ai ndërmorri kohët e fundit.

Këshilli Kombëtar Shqiptaro Amerikan (KKSHA) është një organizatë jo përfituese dhe jo qeveritare e dedikuar ndaj përkrahjes së çështjeve shqiptare, promovimit të paqes dhe zhvillimit ekonomik në Ballkan për të forcuar politikat demokratike, për të inkurajuar respektin për të drejtat e njeriut nëpërmjet ofrimit të programeve të zhvillimit dhe edukative. Për më shumë informacion mbi KKSHA-në luteni të vizitoni këtë faqe Interneti: www.naac.org.