Besimtarët katolikë shqiptaro-amerikanë në New York dhe Detroit festuan Pashkët

-- nga Klajd Kapinova

HARTSDALE (New York)
Afrimi i Pashkëve, një festë tradicionale që përkujtohet nga besimtarët katolikë në të gjithë botën është shoqëruar me disa rite paraprake të besimit katolik, që praktikohen në të gjithë botën e krishterë.
Kështu të Enjtën e Madhe në ceremoninë përpara kishës ka qenë riti i shenjtë i themelimit të Eukaristisë, e cila shoqërohet në vigjilje të Pashkëve me larjën e këmbëve të besimtarëve në shenjë përvujtërie nga meshtari dom Pjetër Popaj, që simbolizon Jezu Krishtin, i cili u ka larë këmbët 12 apostujve të vet. Ndërsa ditën e shtune në mbrëmje në orën 9 të darkës filloi mesha e shenjtë për kremtimin e vigjiljes të festës së Pashkëve. Në fillim të meshës, të gjithë besimtarët katolikë shqiptaro-amerikanë ishin mbledhur përpara kishës "Zoja e Shkodrës" në Harsdale New York dhe pranë zjarrit të madh filluan lutjet të udhëhequr nga dom Pjetër Popaj. Më pas meshtari filloi të bëj bekimin e zjarrit, dhe qiriut të Pashkëve Besimtarët me qirinj të nderuar ndër duar hynë në kishë dhe më pas meshtari filloi me ritin e vigjiljes së Pashkës. Ceremonia zgjati 3 orë, mbasi për herë të parë mbi 30 besimtarë merrnin sakramentin e pagëzimit dhe më pas krezmoheshin për të qenë antar të denjë të familjes së madhe të kishës katolike. Arsyeja pse bëhet ky rit është se në fillimet e krishtërimit të Enjtën e Madhe, ka qenë dikur traditë pranimi i Ekumenëve në fenë katolike...
Mbas meshës, u bë bekimi i ushqimeve të Pashkëve, për të gjithë besimtarët e pranishëm. Ditën e diele kisha e "Zojës së Shkodrës" në New York, ka qenë e mbushur me mijëra besimtarë, për të marrë pjesë në celebrimin e meshëve të orës 9 dhe 12 paradite dhe meshën e orës 3 mbasdite.
Gjatë meshës së madhe të orës 12 ditën e diele, kisha ishte e mbushur si në një ditë feste të përbotshme brenda dhe jashtë saj. Shumë besimtarëve, që nuk kanë mundur të futën në kishë, për arsye të numërit të madh, e kanë ndjekur meshën e shenjtë të udhëhequr nga meshtari i nderuar dom Pjetër Popaj në bashkëcelebrim me dom Viktorin në Qendrën Kulturore "Nënë Tereza", përmes një monitori të madh me ngjyra. Atmosfera ka qenë edhe më e bukur, sepse disa të rinj dhe të reja ishin të veshur me kostumet popullore kombëtare dhe veshjet tradicionale qytetare shkodrane. Më pas besimtarët kanë uruar njeri tjetrin ‘Për shumë mot Pashkët’, ‘Aleluja, Aleluja, Krishti u ngjall, vërtetë Krishti u ngjall’, suksese e mbarësi në jetën e përditshme dhe sa më shumë paqe e dashuri për njeri tjetrin.

ROCHESTER HILLS (Detroit)

Mbi 4500 besimtarë bashkëatdhetarë tanë në Detroit morën pjesë në festën e Pashkëve pranë kishës katolike shqiptaro-amerikane të shën Palit në Rochester Hills në shtetin e Michigan-it. Ceremonia e kremtimit të Pashkëve, ka qenë e jashtëzakonshme sivjet, duke qenë një ngjarje e shënuar për të gjithë besimtarët. Ajo ka filluar me disa rite tradicionale të besimit katolik roman. Në fillim në ditën e të Enjtës së Madhe, meshtari i famullisë kleriku i nderuar dom Anton Kçira ka filluar në shenjë përvujtërie të Krishtit, që të bëjë larjën e këmbëve të besimtarëve. Në orën shtatë të mbrëmjes ka filluar mesha e shënjtë. Pas orës tetë të mbrëmjës kisha e mbushur plot me besimtarë ka qëndruar e hapur deri në orën pesë të mëgjesit, të cilët kanë pritur në radhë për t’u rrëfyer, e cila ka vijuar deri në orën pesë të mëngjesit. Ndërsa në ditën e të Premtës së Madhe ka filluar në orën dy mbasdite Udha e Kryqit si dhe ceremonia e meshës e udhëhequr nga bariu shpirtëror dom AntonKçira. Ditën e të Shtunës së Madhe ka pasë një eceremoni edhe më të bukur. Kështu mesha me praninë e mijëra besimtarëve ka filluar në orën tetë të mbrëmjes, ka filluar nën drejtimin e dom Anton Kçirës riti e bekimit të zjarrit, qiriut të Pashkëve dhe elementë të tjerë të rëndësishëm të ritit të festës së madhe të Pashkëve. Në mbrëmjen e vigjilies së Pashkëve ka pasur pesë pagëzime të të rriturve, bashkëatdhetarët nga Tropoja, Mirdita, Lezha, Shkodra dhe Malësia e Madhe. Të gjithë familjet shqiptare, kanë ardhur për të marrë pjesë sëbashku. Ndërsa gjatë të dielës së Pashkëve kanë qenë dy meshë. Mesha e parë është mbajtur në orën 10:00 paradite, ndërsa tjetra në orën 12:30, ku kisha ka qenë e mbushur plot e përlot në të gjithë ambientet e saj në holl dhe koridorin e madh të kishës. Në ndihmë të administratorëve të kishës, kanë ardhur policia rrugore amerikane, për të orientuar makinat e shumta që vinin nga zona të ndryshme të shtetit të madh të Michigan-it. Dom Antoni, i pyetur nga "Illyria" në lidhje me atmosferën e festimit të Pashkëve në kishën e shën Palit në Detroit thekson se "Dua të falënderoi nga zemra drejtuesit e Xhamisë, që na erdhën në ndihmë, për të parkuar makinat e shumtë të shqiptarëve, që vinin për të marrë pjesë në ceremoninë e Pashkëve." Meshtari dom Anton Kçira, falënderon të gjithë përsonalitetet e njohura të komunitetit shqiptaro-amerikan, të vendlindjes dhe komuniteteve të tjera fetare në Amerikë, që e kanë uruar për festën e Pashkëve famullinë e që udhëheq shpirtërisht.

Presidenti Rugova uroi Papa Gjon Pali II, popullin shqiptar dhe ipeshkëvin e Kosovës imzot Mark Sopin

Presidenti i Kosovës, Dr. Ibrahim Rugova, me rastin e festës së Pashkëve ka përgëzuar Atin e Shenjtë, Papa Gjon Pali II. Në këto përgëzime thuhet: "Ju lutem pranoni urimet e mia të përzemërta dhe të popullit të Kosovës për festën e madhe të Pashkëve. Në ditën e Pashkëve të sivjetme, në ditën e ringjalljes së Krishtit Kosova - Dardania antike ndihet më e ringjallur dhe më e lumtur. I dashuri Ati i Shenjtë.
Në këtë ditë të Pashkëve, lutuni për Kosovën dhe për njohjen formale të Pavarësisë së saj". Presidenti i Kosovës, me rastin e festës së Pashkëve, ka përgëzuar imzot Mark Sopin, ipeshkv i Ipeshkvisë së Kosovës, me urimet e tij më të ngrohta dhe të popullit të Kosovës. "Gjithnjë e çmojmë lart veprën Tuaj për mirëkuptim dhe dashuri midis nesh si dhe për njohjen formale të Pavarësisë së Kosovës.
Me fat Pashkët dhe paçit shëndet të mirë!", thuhet në urimin e Presidentit Rugova dërguar imzot Mark Sopit. Dr. Ibrahim Rugova, ka përgëzuar sot të gjithë besimtarët dhe qytetarët e Kosovës për Festën e Pashkëve. Në urimin e Presidentit Rugova thuhet: "Dita e Pashkëve është ditë e bardhë, ditë e ringjalljes së Krishtit dhe forcimit të besimit në Zotin.
Dhashtë Zoti që Pashkët e ardhshme t'i festojmë me njohjen formale të Pavarësisë së Kosovës nga miqtë tanë. Urime të mira u shprehim UNMIK-ut dhe përfaqësive diplomatike në Prishtinë. Urime të përzemërta u shprehim ushtarëve të NATO-s, KFOR-it dhe gjeneralit Mini", thuhet në urimin e Presidentit Rugova.