Opozita mbron "Faturën" e të burgosurve

-- nga Kleves Bitro, Gazeta TemA, 17.05.2003

Fatura e ish të burgosurve është më e vogël se abuzimet e socialistëve në dogana. Gati 500 vetë për t'u flijuar në Tiranë, Shkodër dhe Vlorë deri në rrëzimin e kabinetit Nano. Inkurajimi i opozitës ka rritur protestën.

Opozita ka bërë përllogaritjet dhe po mendon përfshirjen në programin e saj ekonomik, si prioritet kryesor, pagesën e faturës së ish të burgosurve politikë.

"PD, jo vetëm që i përgjigjet plotësisht faturës së kompensimit të ish-të dënuarve politikë, por edhe do të përdorë të gjitha mjetet legjitime për realizmin e të drejtave të tyre" tha dje kryetari i PD-së Sali Berisha. Ai ka theksuar se PD duhet të jetë e gatshme 'të përdorë të gjitha mjetet demokratike për rivendosjen e të drejtave të ish të përndjekurve'. Mbështetja ndaj tyre do të bëhet në disa plane ku përfshihen pjesëmarrja e strukturave të opozitës në protestat paqësore si dhe reagimi në Kuvend.

Nga ana e tyre të përndjekurit kanë bërë gati një listë me 500 vetë të gatshëm të hyjnë në grevë urie në Shkodër, Tiranë dhe Vlorë deri në rrëzimin e kabinetit Nano, nëse nuk njeh faturën e tyre.

Për mbështetjen institucionale, opozita ka parashikuar që të kërkojë futjen në axhendën e parlamentit të projektligjit për dëmshpërblimin e të përndjekurve, pavarësisht vonesave që po krijohen nga mazhoranca e majtë.

Në Kuvend parashikohet një debat i ashpër mes palëve për këtë çështje, gjë të cilën e ka konfirmuar edhe kryetari demokrat Berisha. Logjika e diskutimeve dhe hartimit të tekstit të projektligjit do të jetë arsyetimi se ish të përndjekurit janë shpallur të pafajshëm dhe i pafajshmi automatikisht duhet të dëmshpërblehet nga ata që e kanë fajësuar, në rastin konkret nga shteti. PD, në fillim do të kërkojë njohjen e faturës nga qeveria dhe në hapin e dytë, afatin kohor të pagesës.

Nga ana tjetër, Berisha ka paralajmëruar kryeministrin e vendit Fatos Nano se në rast të një mos angazhimi përfundimtar dhe pozitiv ndaj kërkesës së të përndjekurve, "do të përballet me një reagim shumë të fuqishëm mbarëpopullor për rivendosjen e të drejtave të tyre". Kryetari demokrat akuzoi Nanon dhe qeverinë e tij se po krijojnë atmosferën e gjoja diferencimit mes dëmshpërblimit të shtresës së të përndjekurve dhe klasave të tjera të shoqërisë shqiptare. Berisha kujtoi se as në kohën kur u shpërblye Byroja Politike dhe as në rastin e dëmshpërblimit të Nanos për vitet e burgut nuk pati ndonjë diferencim.
Për këtë ai theksoi se "Deklarata e qeverisë për pamundësi përballimi të faturës financiare është mashtrim. Shuma e faturës së të dënuarve politikë është më e vogël se sa vjedhja njëvjeçare që bëhet në taksat dhe doganat e Shqipërisë nga zyrtarët dhe qeveritarët, pa llogaritur vjedhjet e tyre në tenderat qeveritare etj.". Kryetari demokrat ka konfirmuar sërish dje qendrimin e PD-së kundër dhunës së ushtruar ndaj ish-të përndjekurve nga policia. Sipas deklaratave të Berishës, "shkopinjtë e gomës, shkelmat dhe zvarritjet e martirëve të gjallë të fjalës së lirë, para ndërtesës së kryeministrisë janë një atak i rëndë që kryeministri i papërgjegjshëm shqiptar nga pozita thellësisht klasore marksiste-leniniste i bën ndërgjegjes dhe idealeve të lirisë".