MISS ALBANIA, FITON "TRUPI ME I BUKUR NE BOTE"

Nuk mendoj që të jetoj në Amerikë apo Evropë, për të mos u kthyer më në Shqipëri

-- nga Klajd Kapinova, Manhattan, New York

Intervistë me "Miss Albania 2003" Denisa Kola dhënë gazetës "Illyria" në New York

Denisa Kola:
Ditëlindja: 4. 12. 1982, Peshkopi
Gjatësia: 1.76 cm
Pesha: 55 kg.
Arsimi aktual: Studente (në vitin e dytë Fakulteti Ekonomik në Tiranë)
Shenja e oroskopit: Shigjetari
Sytë: Ngjyrë kafe
Flokët: Gështenjë
Kuzhina: ushqimi shqiptar dhe italian
Hobby: Sporti dhe muzika
Idhulli: Nëna e saj
Aktualisht: Zonjushë
E dashuruar: Jo
Fanse e këngëtarëve: Eli Fara, Aurela Gaçe, Celin Dion
Koha e lirë: Plazhi, shoqëria, librat dhe muzika.
Adhuron aktorët: Jenifer Anista, Georg Cloom
Kafshët që adhuron: Qeni
Udhëtimet: Vendet ekzotike, Panama, Karaibet, Hawai, Egjipt, vendet antike; Venecia, Roma, Paris, Londra, Varshava
Gjuhët që zotëron: Italisht, anglisht
Sportet që ushtron: Volejboll, not
Shkenca që preferon: Biologji, matematikë
Deshira të tjera: Muzika klasike, poezia, moda evropiane e amerikane

Denisa Kola, qysh në moshën 10 vjeçare i ka ndjekur konkurset e bukurisë mbi pasarela. Ajo nuk ka menduar se një ditë do të fitojë konkursin e bukurisë dhe se jeta e saj do të marrë një rrjedhë tjetër. Por ajo thotë se i ka ndjekur gjithnjë miss-et shqiptare, me syrin e një spektatore që të shuaj kërshërinë, për vajzat pjesëmarrëse. Por ditët e vitet kaluan shpejt dhe Denisa Kola në moshën 20 vjeçare bëhet fituese e "Miss Albania 2003". Ajo me modesti thotë se asnjëherë nuk i ka shkuar ndër mend se do të jetë pjesëmarrëse në "Miss Albania" deri në çatet që mori guximin e vendimin t’i bashkohet konkurenteve. Denisa tregon: "Që të mund të isha një fituese e "Miss Albania" asnjëherë nuk më ka shkuar ndër mend dhe gjithçka ka qenë surprizë për mua. Mbaj mend vetëm kur dëgjova emrin tim kur drejtuesi i spektaklit Ardit Gjebrea tha: "Miss Albania" është... Denisa Kola! Kaq mbaj mend. Edhe vajzat e tjera ishin shumë të bukura".
Denisa Kola prej disa ditësh ndodhet në ShBA në "Studion Berisha" në Manhattan New York. Edicioni i fundit i revistës "Jeta" (Tiranë) në ballinë kishte foton e "Miss Albania 2003" Denisa Kola, e cila sapo kishte mbërritur në studion e fotografit shqiptar. Denisa ishte në valën e punës gjatë momenteve të grimit, ku parukierja po e përgatiste për disa seanca pozimi për aparatin e mjeshtrit Berisha. Ndonëse e zënë me punë, me shumë mirësjellje pranoi që të zhvillojë një bashkëbisedim për gazetën "Illyria".
Ajo këto ditë po përgatitet për të marrë pjesë dhe përfaqësuar Shqipërinë në një nga pasarelat më të njohura të konkursit "Miss Universi 2003", që këtë vit zhvillohet në Panama City të Panamasë nën organizimin ShBA-së.

Pyetje: Me fitimin e titullit "Miss Albania" a do të vendoseni në Tiranë si të gjithë artistët e tjerë apo do të vijoni studime të tjera jashtë atdheut?
Përgjigje: Dua të përfundoj studimet e larta. Më pas kam dëshirë që të ndjek magjistraturën jashtë shtetit, por gjithmonë me qëllimin që të kthehem në Shqipëri. Unë nuk do të lë asnjë mundësi që më ofrohet nga kompanitë e reklamave në Evropë e Amerikë. Nuk mendoj që të jetoj në një vend, për të mos u kthyer më në Shqipëri.

Pyetje: Çfarë ndjetë kur drejtuesi i spektaklit Ardit Gjebrea përmendi emrin tuaj si fituese e kurorës së bukurisë shqiptare?
Përgjigje: Kisha një emocion shumë të fortë, sepse edhe katër vajzat e tjera ishin shumë të bukura dhe nuk besoja se do të shqiptohej emri im. Nuk e dija se çfarë të bëja e të thoja para shumë gazetarëve që më rrethuan me blice e pytje të shumta. Mbeta për disa çaste e habitur. Të afërmit e mi përpiqeshin që të depërtonin mbi njerëzit e shumtë që më uronin e fotografonin papushim. Ky çast ishte shumë prekës për mua.

Pyetje: Diçka të veçantë nga ditët kur keni qenë të grumbulluar për t’u përgatirur për spektaklin e madh.
Përgjigje: Rreth një muaj kemi bërë prova. Ka pasur raste që bënim dy herë në ditë prova. Kam njohur e lidhur miqësi të re, që për mua ka qenë gjëja më e bukur. Gjithmonë kam menduar që vajzat që merrnin pjesë në spektakle, nuk kishin ndonjë qëllim në jetë apo nuk i kishin venë vetës një objektiv. Por në fakt të gjitha vajzat ishin shumë të zgjuara e kërkonin që të jepnin më tepër nga vetja e tyre. Disa nga shoqet e reja janë: Drenusha, Qendresa, Niada, Jonida, Eralda, Eugerta, etj.

Pyetje: Në konkursin e bukurisë a janë respektuar të gjithë pavarësisht nga qyteti apo shteti nga ata kanë ardhur?
Përgjigje: Unë kam ndjekur universitetin dhe qëndroja në Qytetin e Studentit, për të vijuar leksionet. Aty nuk kishte asnjë lloj dallimi. Të gjitha vajzat ishin njësoj në sytë e jurisë dhe të gjithë ekipit që punon me ne.
Pjesëmarrja ishte shumë e gjërë, sepse kishte 40 vajza nga Gjirokastra, Bulqiza, Vlora, Puka, Saranda, Lezha, Fieri, Kukësi, Skrapari, Laçi, Berati, Korça, Pogradeci, Durrësi dhe Peshkopia. Morën pjesë gjithashtu "Miss Mjelma" e Maqedonisë, "Miss Kosova" në Diasporë dhe "Miss Diaspora" e Zvicrës, Gjermanisë. Mungonte vajza shqiptare nga ShBA e Kanadaja.

Pyetje: Edhe pa grim ju jeni shumë e bukur. A do ta ruani freskinë apo do të veproni sikurse të gjithë të tjerat me zbukurimin e pamjes së fytyrës?
Përgjigje: Në radhë të parë falëminderit për komplimentin. Mendoj, se është më e shëndetshme për fytyrën, që të mos përdoret shumë kozmetika. Por në rastet kur ti duhet të japësh një paraqitje të mirë është e natyrshme një grim i lehtë është mëse normale. Ajo është një pjesë që i nevoitet femrës dhe është njerëzore. Sigurisht që kjo nuk do të thotë se duhet tepruar me vetvetën.

Pyetje: Ju do të jeni pjesëmarrëse në "Miss Univers", ku do të marrin pjesë 76 vende të botës. Si e ndieni vetën disa ditë para konkurimit?
Përgjigje: Kam shumë emocione dhe më kanë përfshirë ethet, sepse përgjegjësia është shumë e madhe. Atje unë do të përfaqësoj Shqipërinë dhe në një farë mënyre do të shihet përmes meje një mendim mbi popullin dhe atdheun tim.
Përballë kësaj, dua të jem e kujdeshme që gjithçka të jetë përfekte. Jam shumë e emocionuar, por ky emocion më jep forcën për të përballuar sfidën që kam përpara në konkursin "Miss Univers 2003" në Panama.

Pyetje: Sa informacion keni për Panama City-n?
Përgjigje: Me sa jam informuar, spektakli do të zhvillohet më 3 qershor 2003. Të gjitha vajzat do të qëndrojnë në një hotel të bukur. Ata do të jenë shumë të kontrolluara, të mbrojtura që të mos krijohen incidente dhe gjatë gjithë ditës do të kemi prova për spektaklin. Më të rëndësishme do të jenë takimet e mbrëmjeve me Presidenten e Panamasë, përsonalitet më të shquar të vendit, artiste, kompozitorë e figura të shquara që do të vijnë nga bota dhe ShBA.

Pyetje: Nga kush do të jeni e shoqëruar në Panama?
Përgjigje: Në fillim do të nisem vetëm, më pas do të vijë fotografi i mirënjohur në botën shqiptare dhe në qarqet e elitës kulturore në New York z. Fadil Berisha.

Pyetje: A mendoni se do të futeni në finale, duke besuar në freskinë dhe origjinalitetin e bukurisë tuaj natyrale?
Përgjigje: Shpresoj që të futem në finale, në "TOP 10", por nuk e di sa do të arrijë synimin. Në konkurs do të jem Denisa Kola, duke qenë sa më e përgatitur përpara jurisë botërore. Nuk e di, por këtu ndikon shumë edhe fati.

Pyetje: A do të ndihmojë fati?
Përgjigje: Gjykimi i jurisë ndërkombëtare është relativ, sepse vetë gjykimi mbi bukurinë është relative. Diçka që mua më duket e bukur, nuk i duket dikujt tjetër e bukur. Sigurisht se këtu është edhe pak shans në mes. Por gjithë puna është që ti të japesh maksimumin tënd atje. Megjithastë pjesa më e madhe nuk e njohin Shqipërinë, sepse nga vetë ne shqiptarët bëhet pak në fushën e medias elektronike në gjuhët më të folura në botë përmes internetit dhe shpesh pamjet për Shqipërinë janë të deformuara.

Pyetje: Fotografi i mirënjohur Fadil Berisha është shprehur për bukurinë dhe inteligjencën fine që zotëroni. Ky vlerësim a do t’ju shtojë interesimin për të pozuar për faqet e para të revistave evropiane dhe amerikane nëse ju ofrohen kërkesa?
Përgjigje: Sigurisht që syri i z. Fadil Berisha është syri i një artistit, që e njeh shumë mirë zanatin e vet. Dhe e thashë edhe më parë se nëse një shans i tillë do të më jepej unë do ta respektoja dhe assesi ta refuzoja. Këtu është Fadili në mes, që është profesionist në punën e tij dhe gjithashtu është një shqiptar model me zemër të madhe. Ai më ka ndihmuar mua dhe shumë shqiptarë të tjerë dhe i jam shumë mirënjohse për këtë.