“Marie Kraja” në duart e Martin Andresë

Dje në mesditë, dirigjenti anglez, Martin Andre ka shkelur sërish në Tiranë. Edhe këtë herë vjen për të njëjtin qëllim që erdhi një vit më parë… për “Marie Krajën”. Në prillin e vitit që shkoi, dirigjenti nuk dinte asgjë për Shqipërinë, edhe për festivalin “Marie Kraja” kishte në mendje një ide të përgjithshme të cilën e krijoi mbi të dhënat që i kishte dhënë producentja e këtij festivali, Zana Çela. Në atë prill, dirigjenti anglez erdhi dhe e shkeli vetë skenën shqiptare, i dëgjoi nga afër instrumentistët e orkestrës shqiptare dhe në një konferencë për shtyp, pak ditë më parë se të niste edicioni i katërt i festivalit “Marie Kraja”, ai u shpreh se kishte mbetur i mahnitur nga ata artistë.

Martin Andre iku me përshtypjet më të mira nga ky vend. Shumë shpejt ai e tregoi se ato fjalë të mira që kishte lënë pas ikjes, nuk kishin qenë “fjalë të bukura sa për t’i bërë qejfin dikujt”. Shumë shpejt, Martin Andre u kthye sërish në skenën e Teatrit të Operas dhe Baletit, për të punuar sërish me artistët shqiptarë. Tashmë e dinte se në ç’vend po shkelte. Në ardhjen e tij të dytë Martin Andre drejtoi orkestrën e TOB-it për baletin “Hirushja”. Ishte maji i 2002-shit. Dirigjenti anglez ishte në krye të kësaj shfaqjeje në të katër netët 25, 26, 31 maj dhe më 2 qershor.

E më pas, në Tetor të po këtij viti, Martin Andre do të shënonte ardhjen e tij të tretë në Shqipëri, sërish për “Hirushen”. Por jo vetëm për të. Në 5 dhe 7 nëntor, ai dirigjoi dhe koncertin simfonik të orkestrës së Tob-it ku soliste ishte violinistja Suela Piciri. Brenda këtij koncerti ishte dhe simfonia e 9-të e Dvorzhak. Dje, dirigjenti anglez shënoi ardhjen e tij të katërt në Shqipëri. Rikthehet në Teatrin e Operas së Tiranës, edhe një herë për të drejtuar festivalin operistik ndërkombëtar “Marie Kraja”. E ka pranuar me kënaqësi edhe këtë herë ftesën e producentes së këtij festivali, Zana Çelës.

Të dhënat për Martin Andrenë
Ka studiuar për muzikë në Universitetin e Kembrixhit. Në po këtë universitet drejtoi për herë të parë. Është një nga dirigjentët më të suksesshëm në Britaninë e Madhe. Karriera e tij arstike përfshin të gjithë titujt e operave italiane të shekullit të 19-të, të cilat ai i luan në skenat më prestigjioze britanike në Teatrin Mbretëror të Operas në Angli, në operan kombëtare skoceze, në operan e Irlandës së Veriut etj. por karriera e tij artistike ka shkëlqyer edhe në skena të tjera operistike si në Siatell, Lisbonë, Vankuver, Shtutgart, Keln, Pragë, Paris etj. Shquhet dhe për një karrierë koncertale me orkestrën simfonike të BBC-së me orkestrën e Uellsit, me Simfoninë e re të Londrës apo me orkestrën kombëtare në Portugali, Norvegji, Jeruzalem dhe Poloni.