Nacionalisti Ndue Perlleshi (1908 - 1949) - ra deshmor me ëndrrën e pashuar për Shqiperinë Etnike

Përkushtimi i një studiuesi atdhetar në përjetësimin e figurave të nacionalizmit shqiptar

Trimi i Dukagjinit Ndue Perlleshi një jetë të tërë për Shqipërin Etnike. Ketë argument, më së miri e plotëson vepra jetëshkrimore: “Ndue Përlleshi - Trimi i Dukagjinit”, botuar në Prishtinë 2002 nga shkrimtari e studiuesi Jetish Kadishani.

Për një shkrimtar e studiues me përvojë, sikurse është Jetish Kadishani, të përkushtuar për zbardhjen në dritën e së vërtetës historike, të jetës dhe veprimtarisë patriotike të nacionalistëve të Kosovës (në kohën e sundimit të pushtuesve të huaj shekullorë serbë e komunistë), ka qenë shumë e vështirë dhe shpesh një punë me sakrifica titanike, për të ruajtur me mbijetesë dorëshkrimet e pasura historike.

Më së fundi, pas një hulumtimi shumë të gjatë, ecejakjet e pambarim shtëpi më shtëpi, nga katundi në katund, erdhi kënaqësia shpirtërore, intelektuale dhe historike, që i dha fati i madh, rasti e privilegji, për të nxjerrë nga pluhuri i harresës shumëvjeçare figurën e madhe të nacionalistit të shquar, trimit të bjeshkëve të Kosovës, heroin sypatrembur Ndue Përlleshi.

Që kur isha fëmijë, pranë flakëve të zjarrit dhe më vonë i ri, në mendjen time, kanë qendruar të ngulitura thellë disa ngjarje, emra nacionalistësh, që në odën e burrave të Lugut të Drinit diskutoheshin nga im atë Nikollë Mrijaj dhe bashkëkohës të tij. Me kalimin e viteve, edhe pse larg Atdheut në New York (ShBA), kam shkruar disa kujtime, që më janë rishfaqur sa herë që përmendej emri i trimit Ndue Përlleshi në gazetën shqiptaro-amerikane “Illyria”, “Gazeta55”, “Shqipëria-etnike”, “Shkodra” etj. Megjithëse larg vendlindjes, që është burim i pasur informacioni, më tepër njohuri munda të marr gjatë leximit të fejtoneve me vijim të studiuesit të palodhur Jetish Kadishani, në disa gazeta e revista si: “Victoria”, “Dielli”, “Fjala e lirë”, “Trojet tona”, në Kosovë e jashtë saj, që miqtë e mi në vendlindje mi dergonin për të mësuar shumë detaje të jetës dhe luftës së madhe, që ka zhvilluar në malet e Rrafshit të Dukagjinit udhëheqësi i çestës nacionaliste Ndue Përlleshi.

Tashmë për mua heroi Ndue Përlleshi, do të bëhet pjesë e interesimit tim gjatë kohës që po punoja, për të shkruar librin kushtuar një bashkëluftëtareje, të legjendes Ndue Përlleshi, sokoleshës së Shkodërloces Marie Shllaku, që këto ditë do të dalë nga shtypi në New York.
Autori Jetish Kadishani, para 14 viteve i lindi idea, për mbledhjen e të dhënave për jetën dhe bëmat e Ndue Përlleshit - trimit të Dukagjinit. Emri dhe trimëria e spikatur e tij, përmendej ngado që studiuesi Kadishani, me një vullnet të madh përkushtimi, hulumtoi me skrupolozitet, shkonte udhëve nga fshati në fshat, në verë e dimër, për të mbledhur si bleta punëtore nektarin e historisë së lavdishme të shumë çetave nacionaliste dhe prijësve, që vepruan në Lugun e Drinit, por edhe në krahina të tjera të Rrafshit të Dukagjinit, të Llapushës, Anadrinit dhe të kalasë së pamposhtur që ishte e mbeti Drenica. Ata luftuan ballë për ballë me armë në dorë armikun, iu kundërvunë pushtuesve shekullorë serb dhe komunistëve shqiptarë, që nuk donin vatanin, por internacionalizmin proletar, që e kishte shtëpinë propagandistike antishqiptare tek ujku i bardhë i Rusisë bolshevike.

Sa më shumë që autori Kadishani futej në gjurmët e historisë, aq më shumë rritej dorëshkrimi i ngjeshur në faqet e lavdishme të historisë për udhëheqësin nacionalist Ndue Përlleshin, që në planprogramin e luftës së tij i kishte venë si qëllim vetës çlirimin e trojeve kombëtare dhe bashkimin e tyre në një shtet shqiptar.

Për studiuesin, nuk ishte e lehtë të grumbullonte, verifikonte e sistemonte ngjarje, data, përsonalitete nacionalistësh, dëshmi rrënqethëse, që rrëfenin të intervistuarit e tij (një pjesë prej të cilëve gjatë viteve të mëvonshme kanë ndërruar jetë). Jo të gjithë kishin guximin, të shpreheshin hapur nga frika e pushtetit komunist, që gjithnjë asokohe përhapte terror e frikë ndër shqiptarë, mbasi sikurse shkruan autori Kadishani në parathënien e tij, komunistët figurën e Ndue Përlleshit dhe të bashkëluftëtarëve të tij i quanin gjithnjë “armiq të popullit, kuislingë, kolaboracionistë, kundër vëllazërim - bashkimit, kundër komunizmit etj.”

Biografi i palodhur, kishte raste të shumta, kur informatorët flisnin të vërtetën për Ndue Përlleshin, por kërkonin nga ana e tjetër që emrin e tregimtarit bashkëkohës të episodeve të ndryshme të mos përmendet, sepse do të kishin pasoja nga sistemi aktual që sundonte në Kosovë. Përkundrejt pengesave të tjera, Kadishani mundi më së fundi të nxjerrë në dritë nga thellësia e viteve historike figurën e madhe të patriotit të vendosur për idealet kombëtare Ndue Përlleshi, mbi jetën dhe veprën e trimit të Rrafshit të Dukagjinit. Duhet pranuar për hir të së vërtetës historike, se në sajë të punës së madhe hulumtuese e shkencore të studiuesit Jetish Kadishani, në ndriçimin e jetës së nacionalistit Ndue Përlleshi edhe autoritetet shtetërore, brezat e rinj kosovarë, zyra e Urbanistikës, që emeton dhe përjeton figurat e kombit, kanë nderuar një rrugë në Prishtinë me emrin e trimit të Dukagjinit - Ndue Përlleshi. Kështu është vijuar edhe me figura të tjera, që autori Kadishani, u ka përkushtuar libra jëtëshkrimorë.

Ky mbetet roli i madh e i pazevendësueshëm që luan historiani dhe studiuesi serioz në të mirë të kombit dhe figurës, që ka marrë përsipër të lartësojë me gjuhën e fakteve historike, mbasi dëshmorët e paharruar me gjakun e tyre përjetësuan emrin e Kosovës martire.
Libri mbështetet nga një literaturë e pasur, e sjellë përmes një pune të palodhshme nga autori Kadishani, i cili e bën veprën e vet më të besueshme e të qëndrushme në përjetësi.

Me shumë interes, mund të shihen referencat dhe burimet arkivore, si: Gjyqi Ushtarak për Kosovë - Metohi, Dosjet e panumërta të viteve 1945 -1949, që sot ruhen për fat të mirë në Arkivin Kombëtar në Prishtinë (AKP); Gjyqi i Qarkut në Prizren (asokohe ishin si materiale topsekret), Mbledhje, që i përkasin peridhave të viteve 1945 - 1949, në AKKP; Gjyqi Popullor Krahinor, Prizren, KZP 9 - 73, viti 1945, kutia 2, AKKP; Dosja nr. 243, MPSh, 19 gusht 1949, Tiranë, në AKKP, për të vijuar në serinë e gazetave dhe revistave të kohës dhe deri në ditët tona në Kosovë e Shqipëri.

Çfarë përmban libri jetëshkrimor: “Ndue Përlleshi - Trimi i Dukagjinit” me autor Jetish Kadishanin

Autori për të treguar truallin në të cilin lindi, u rrit dhe u mëkua me dashurinë për trojet shqiptare përsonazhi i veprës së tij Ndue Përlleshi, ka bërë një pasqyrë të hollësishme historikut të Lugut të Drinit, duke na dhënë një vështrim të përgjithshëm gjeografik me të gjithë elementët e saj dhe ka depërtuar natyrshëm në historinë e lavdishme të krahinës në zë në Kosovë. Ai përmend qëndren e banimit Jagoden, për të ardhur natyrshëm në Zllakuqan, që njihet si një nder venbanimet e hershme të krahinës, të mbështetur bindshëm nga një literaturë shumë e pasur për temën në fjalë.

Me pas, studiuesi, i jep jetë historisë së çetës së atdhetarit Kolë Gojanit, qytetit të Klinës, sikurse dashurisë për arsim, që kanë pasur e kanë gjithnjë banorët e jagodas.
Në kreu e dytë, në libër, lexuesi mund të kundrojë, përmes një stili rrëfimtari të ëmbël të studiuesit Jetish Kadishani, gjenezën e familjes Përlleshi gjatë rrjedhave të historisë, duke shtruar që në fillim pyetjen retorike: Kush ishte Ndue Përlleshi? Vetë faktet, që ka hulumtuar me kujdes dhe durim të një studiuesi skrupoloz Kadishani, na jep një pasqyrë të hollësishme të familjes së Ndue Përlleshit, duke e ilustruar shpesh edhe me foto origjinale, që ruajnë identitetin e kohës, kur ato janë fiksuar në celuloid.

Si pa e ndier natyrshëm futesh në brëndësi të faqeve jetëshkrimore, ku kupton më së miri se si u mëkua me ndjenjën e hollë të atdhedashurisë, që shpesh njerëzit e krahasojnë si një frymë e ngrohtë politike e kohës, me të cilën të gjithë shqiptarët e pushtuar nga serbët dhe komunistët shqiptarë ishin të detyruar të merreshin dikush hapur dhe dikush në ilegalitet. Pra kazani i zemërimit popullor vlonte dhe priste momentin, që si një termet të lëkundë themelet e kolonizatorëve dhe si një vullkan të nxjerrë dufin e zemërimit dhe të urretjes, për sllavët, që në Kosovë gjithnjë mblodhën terror, gjak, masakra, shfarosje, gjenocid të përbindshëm në sy të Evropës plakë, që bënte shpesh sehir përpara gotave të shampajës, konjakut apo metaxa-s greke.

Për respektin që gëzonte Ndue Përleshi në krahinën e vet, ai një ditë do të zgjidhet në detyrën e kryetarit të komunës, duke qendruar më pranë halleve dhe shqetësimeve të bashkëkatundarëve të vet, duke spikatur me cilësitë e një burri të urtë, të mençur në zgjidhjen e problemeve që e shqetesonin krahinën e familjet shqiptare, kuvendar e patriot.
Autori Kadishani, duke e njohur në detaje të gjithë jetën e përsonazhit të vet, se çfarë është shkruar kundra dhe pro tij, përshkruan me përkujdesje aktivitetin luftarak të Ndue Përlleshit dhe pse ai doli në mal, si e priti ai luftëtaren trime shkodrane, intelektualen e mirënjohur të trojeve etnike shqiptare Marie Shllaku, takimet e njëpasnjëshme të Ndue Përlleshit me bashkëluftëtarët dhe patriotet e flaktë, Prof. Ymer Berisha (që ishte dhe mbeti trupi dhe zemra morale e të gjithë kryengritësve kundër pushtuesve sllave dhe komunistëve), luftëtari sypatrembur ose siç thirrej në të gjithë Kosovën “Luani i Kosovës” Ukë Sadiku dhe luftëtarë të tjerë të 50 çetave nacionalistë, që asokohe vepronin në tërritorin e pushtuar të nënës Kosovë.

Cilësitë e mira dhe plot vlerë atdhetare e njerëzore, spikatën tek Ndue Përlleshi, në bashkimin e të gjithë forcave nacionaliste, për t’u bërë një ballinë e fortë kundër forcave sllavokomuniste, që kishin dhunuar trojet etnike shqiptare. Kështu shohim në faqet e librit, se patrioti i Dukagjinit kontribuon shumë në forcimin e çetës së vet me elemënt të rinj antisllave e antikomunist, bashkëpunimin me çetat e tjera kryengritëse, për të forcuar e organizuar edhe më mirë luftën liridashëse. Për këtë një kontribut të madh kishte luajtur edhe formimi i Organizatës Patriotike, të pagëzuar me emrin kuptimplotë: “Besa Kombëtare”.

Ngjarjet pasojnë njera tjetrën. Në kreun e pestë, mësojmë se nacionalistët fillojnë të shkruajnë historinë e tyre dhe të Kosovës martire, kur organizojnë “Kuvendin e Dobërdolit”, që me të drejtë nga autori Jetish Kadishani në libër cilësohet, si një ngjarje e rëndësishme historike. Sigurisht, për të ardhur tek ky kuvend i krerëve nacionalistë, më përpara ishte mbajtur “Mbledhja e Pllaçicës”, që i parapriu vendimeve të rëndësishme, që mori Kuvendi i Dobërdolit, ndaj të cilit media sllave dhe kalemxhijtë komunistë servilë shqiptarë përmes fëjtoneve dhe shkrimeve denigruese janë përpjekur që të hedhin baltë dhe të fyejnë figurën e luftëtarit trim Ndue Përlleshit dhe të gjithë bashkëkohësve nacionalistë asokohe.

Jemi në zemër të faqeve historike të librit, që për meritë të autorit Jetish Kadishani, lexuesi mbarëshqiptar mund të shohë se si zhvillohen ngjarjet e mbarsura plot emocione dhe momente dramacititeti, në të cilën qenë përfshirë përsonazhi kryesor Ndue Perlleshi me të gjithë trimat e tij, lufrat e njëpasnjëshme, që gdhendin në trojet shqiptare, epopenë e lavdishme të dëshmorëve të lirisë. Për këtë meritë, çetat e kuptojnë frymën e bashkimit dhe rolin, luajnë intelektualët e kualifikuar, si: Prof. Ymer Berisha, Marie Shllaku, etj., dhe të gjithë bashkohën me çetën e Ndue Përlleshit. Por, si gjithnjë në histori gjatë luftrave ka fitore dhe dështime. Autori Kadishani, në veprën e vet i shkoqitë hapur edhe arsyet e shpërndarjes së çestës së Ndue Përlleshit, se si kryetrimi i Dukagjinit me shokë i shpëtoi grackës së spiunëve në Zhdrellë dhe më pas mbledhja e luftëtarëve në Prrue t’Zi. Vrasja e Prof. Ymer Berishës e ligështon, por nuk e dobëson luftën e trimit të vendosur kundër armiqve të popullit shqiptar.

Në krerët që do të vijnë në libër, mësojmë se udhëheqësi i çetës gjen strehë dhe bujari në zemrat e shqiptarëve. Shpesh Ndue Përlleshit iu desht të kalonte ditët e vështira në Shpellën e Jerebisë (Istogut-Burimi), për të ripërtërirë forcat, që në pranverën e vitit të ardhshëm të rifillojnë përsëri luftrat, kundër armikut të përbashkët, që ishin sllavokomunistët. Rreziqet nuk do të mbarojnë në Nduen dhe me sa duket, përshkrimi me hollësi nga autori Kadishani, ka bërë të mundur, që libri të mirëpritet dhe të mbetet thellë në kujtesën e disa bashkëkohësve dhe të rinjve sot, mbasi në librin e Kadishanit nuk shohim vetëm fitoret e çetave nacionaliste, por edhe dështimet, shkaqet, trathtitë e bëra nga vetë shqiptarët (që i shërbenin me besnikëri serbëve e komunistëve në Prishtinë e Tiranë), rrethimet nga forcat e ndjekjes të ashtëquajtura partizane, që ishin të gatshëm të vrisnin bashkëvëllezërit e tyre të një gjaku e gjuhë dhe jo serbët që i kishin paguar për trathinë e tyre.

Me shumë interes mund të kundrohen pjesët: “Rruga e pasigurtë drejt vendlindjes”, “Qëndresa e tre trimave”, “Zogu u shpëtoi nga dora”, “Dita kobzeze për shqiptarët e mobilizuar”, “Lufta e Bokshiqit (këngë)”, “Mobilizim i përgjithshëm për zënien e Ndue Përlleshit”, “Dueli me Jank Buriqin e Jagodës”, “Burgosjet dhe torturat vazhdojnë”, “Ku u shërua Ndue Përlleshi?”, “Drejt Drenicës”, “Ikja në Shqipëri”, “Nga Shqipëria sërish në vendlindje”, “Për herë të fundit në mesin e familjes së tij në Paskalicë” e shumë episode të tjera, që në mënyrë historike, janë trajtuar nga autori i veprës shkrimtari e studiuesi Jetish Kadishani. Mbetet në kujtesën e popullit episodi i të riut Pren Gojanit nga Dugajeva, i cili i hapi rrugën kryetrimit Ndue Përlleshit të plagosur rëndë (me vragë) nga rrethimi në mal të Bokshiqit, ku UDB-ja me të marrë vesht e pushkatoi Prenin në vend të ngjarjes.

Në vepër përveç shkrimeve kronologjike, që e shoqërojnë veprën në mënyrë organike, autori ka bërë përshkrimin e shumë portreteve, që janë njohës, bashkëluftëtarë, dëshmitarë, fotografi, informatorë dhe njerëz, që kanë lënë shënimet e tyre mbi Ndue Përlleshin.
Së fundi, libri jetëshkrimor: “Ndue Përlleshi - Trimi i Dukagjinit”, i botuar në vendlindje (Kosovë, Prishtinë) nga autori Jetish Kadishani, i shtohet serisë së veprave serioze, që janë shkruar deri më sot në Kosovë dhe trojet etnike shqiptare, pa ngarkesa politike e ideologjike, me gjuhën bindëse e argumentuese të fakteve historike, që flasim më shumë se zhgarravinat serbe dhe nga koministët shqiptarë.

Në këtë mënyrë autori, ka përjetësuar emrin, luftrat dhe figurën e madhe të kryetrimit të Dukagjinit, që një jetë të tërë luftoi me mish e shpirt, për çështjen e bashkimit të trojeve etnike, në një shtet të vetëm, duke pasur mbi krye pushtuesit shekullorë serb dhe komunistët shqiptarë, që bënë gjithçka, që Kosova prej shumë dekadash të mbetet nën çizmen e zezë serbe.
Jetish Kadishani, i shtoi fondit të artë të librave historikë një perlë më shumë në gjerdanin e gurëve të çmuar, që ruan në zemër të saj nënëlokja Kosovë. Emri dhe vepra e Ndue Përlleshit mbeti në histori, në sajë të studiuesit serioz Jetish Kadishanit, që ndezi një qiri në kujtimin e tij të pashuar...

New York, USA, Korrik

Presidentit të Kosovës Dr. Ibrahim Rugova

Fort i nderuari President i Kosovës Dr. Ibrahim Rugova!

Ne bashkëatdhetarët me banim prej shumë dekadash në ShBA, jemi mbledhur sot, për t’ju bërë një falënderim të përbashkët, për organizimin në mënyrë të përsosur të mikëpritjes dhe të gjithë javës kulturore kushtuar 125-vjetorit të Lidhjes Shqiptare të Prizrenit të vitit 1878, në kryeqytetin historik.
Mbasi jemi larguar nga vizita e fundit në trojet tona në vendlindje, kemi marrë me vete afshin e ngrohtë të mikpritjes dhe dashamirësisë të nënës tonë Kosovë, të cilën e përjetojmë edhe sot të gjithë sëbashku në zyrat e Lidhjes në New York.

Pranoni edhe një herë nga ana e jonë respektin e thëllë dhe mirënjohjen e përhershme, duke ju falënderuar përzemërsisht për vendin e nderit që na rezervuat, si përfaqësues të delegacionit të Kryesisë së Lidhjes së Tretë Shqiptare të Prizrenit (1962 - 2003) në diasporë.
Ne u takuam dhe falënderojmë për mikëpritjen njeriun e përkushtuar të Kosovës N/Kryetarin e Lidhjes Demokratike të Kosovës (LDK), fort të nderuarin z. Kolë M. Berishën, të cilit, pas takimit të përzemërt i dhuruam me nënshkrim një libër, si dhuratë për Ju. Monografia, është shkruar në ShBA, mbështetur fillim e mbarim mbi dokumente autentike që disponon Arkivi i “Lidhjes së Prizrenit” në New York. Arkivi i ruajtur në gjendje shumë të mirë, na bëri të mundur të hartojmë me fakte një libër historik, kushtuar aktivitetit të pasur 40 vjeçar të Lidhjes Shqiptare të Prizrenit (1962-2002) dhe një ndër themeluesit e saj në ShBA z. Ismet Berisha.

Ne, pohojmë me krenari, nder dhe respekt, se gjithnjë kemi luftuar për idealet e Rilindasve tanë të shquar, të cilët me pendë bënë ndërgjegjësimin e popullit dhe me pushkë në dorë sakrifikuan jetën, për trojet e shenjta etnike shqiptare, për një Shqipëri të lirë dhe të bashkuar. Ky ideal i etërve tanë, është i pashuar edhe në ditët tona.
Ne patëm nderin dhe kënaqësinë të vizitojmë shumë qendra të rëndësishme të shekujve historisë deri në ditët tona. Vërejtëm konkretisht, se ishte bërë një punë përgëzuese gjatë 4 viteve të lirisë së atdheut tonë në disa qendra që mundëm të vizitojmë, si: në Mitrovicë, Pejë, Prizren, në Bibliotekën Kombëtare në Prishtinë, ngritja e monumentit në nderim të luftëtarit legjendar të lirisë dëshmorit Adem Jashari. Zhvilluam takime miqësore me përfaqësuesit e Qeverisë së Kosovës, Ministrat, deputetë të Kuvendit të Kosovës, njerëz të thjeshtë dhe intelektualë të insitucioneve të njohura të shkencës e kulturës shqiptare.

Të gjithë sot jemi mbledhur, për të formuluar me dashuri mesazhin e përshëndetjes për Ju dhe popullin martir të Kosovës. Njëkohsisht, Ju përgëzojmë, që për nder të 125-vjetorit të “Lidhjes Shqiptare të Prizrenit”, themeluat dekoratën, duke nderuar me mirënjohje dhe “Medalje të Artë” të Lidhjes së Prizrenit shumë veprimtarë nga Kosova dhe bota, për kontributin që kanë dhënë në fusha të ndryshme të jetës dhe të aktivitetëve politike gjatë viteve të paraluftës, disa prej të cilëve nuk janë në mesin tonë.

Duke lexuar me kujdes listën prej 37 përsonave, që janë vlerësuar në emër të shtetit tonë Kosovës, me mirësjellje dhe me një frymë mirëkuptimi, mendojmë t’ju rikujtojmë, se ka përsëri përsonalitete në diasporë, që duhet t’u ndahet një vlerësim i tillë kaq i merituar. Mendojmë, se listës të vlerësimeve të nderit, duhet t’i shtohen edhe emrat e njerëzve dhe organizatave të shquara me aktivitet në diasporën e ShBA-së për Kosovën, sikurse mendojmë dhe argumentojmë se veprimtaria e tyre është konkrete, në dobi të çështjes së Kosovës.

Një pjesë e tyre nuk jetojnë më, por nderin dhe mirënjohja nga nëna Kosovë, mendojmë se e meritojnë. Ndoshta në të ardhmen, kur të zbardhen dokumentetet autentike të pasura në dobi të çështjes së Kosovës, harresa e vlerësimit të tyre do të zëvendësohet me një mirënjohje shumë më të madhe se një dekoratë apo emër nderi. Dhe një vlerësim i tillë, ka nisur me botimin e disa librave monografikë, përjetimin me emertimin e shumë rrugëve kryesore në Prishtinë e qytete të tjera, me emrat e atdhetarve e luftëtarëve të lirisë së Kosovës. Historia e Kosovës, është një nënë e mirë, që i është mirënjohëse bijve më të denjë të saj.

Në mënyrë që të krijoni një ide më të plotë për Lidhjen Shqiptare të Prizrenit në mërgim (këtu) në ShBA dhe degët e saj nëpër kontinente e shtete të botës, po ju kujtojmë disa nga degët që ende veprojnë deri më sot:

1. New York, më 20 tetor 1962 në ShBA (Shpallja e Krijimit të Lidhjes dhe dega në New York).
2. Toronto (Canada), më 24 shkurt 1963, dega “Hasan Prishtina”.
3. Bruxelles (Belgjikë), më 17 nëntor 1963, dega “At Shtjefen Gjeçovi”.
4. Paris (Francë), më 1 janar 1964, dega “Azem Bejtja”.
5. Melburne (Australi), më 2 shkurt 1964.
6. Racine - Milëaukee (ShBA), më 19 prill 1964, dega “Haki Taha”.
7. Stamboll (Turqi), më 19 prill 1964, dega “Haxhi Zeka”.
8. Ëaldkraiburg (Gjermani), më 25 prill 1964, dega “Isa Boletini”.
9. Chicago (ShBA), më 25 korrik 1964, dega “Haxhi Zeka”.
10. Ankara (Turqi), më 28 nëntor 1964, dega “Sadik Rama”.
11. Kaiserslauten (Gjermani Perëndimore, RFGJ), më 7 prill 1965.
12. London, (Canada), më 1 janar 1966.
13. Brooklyn (ShBA), më 24 tetor 1971, dega “Abdyl Frashëri”.
14. Greenëich (ShBA), më 29 gusht 1971.
15. Bronx (Neë York, ShBA), më 3 tetor 1971, dega “Ali Pashë Gucia”.
16. Philadelphia (ShBA), më 1 tetor 1999.
17. Fort Laudersdale (Florida, ShBA), më 25 janar 1998.
18. Stamford (Conneticut, ShBA), më 22 korrik 1997.

Duke ju uruar edhe një herë punë të mbarë në të mirë të popullit tonë dhe suksese të mëtejshme drejt ëndërrës sonë të përbashkët për Pavarësi të plotë të Kosovës, shpresojmë dhe besojmë në insitucionin më të lartë të shtetit tonë dhe në emerin tuaj përsonal z. President Dr. Ibrahim Rugova, se ju do të nderoni në Panteonin e Nderit të Kombit tonë edhe një pjesë të mirë të patriotëve nacionalistë, që dhanë gjithçka për Nanës tonë të shtrenjtë Kosovë.

Falëminderit për mirëkuptimin!
Në emër të Kryesis së Lidhjes Shqiptare të Prizrenit

Kryetari
Ismet Ukë Berisha