Rikthimi shqiptar në klubin perëndimor

Në fillim të viti 2003 disa shtete të ish Lindjes si Polonia, Rumania dhe Lituania, qëndruan përkrah SHBA për luftën në Irak. Së paku 10 shtete të këtij rajoni ishin pjesë e koalicionit të gadishmërisë, "Evropa e Re" e Sekretarit të Mbrojtjes Donald Ramsfeld. Por, një nga këto vende, Shqipëria, dallohet nga të gjitha të tjerat, për shkak të së kaluarës gjysmë shekullore nën tiraninë komuniste. Me një shumicë muslimane, rrjedhojë e katër shekujve të pushtimit otoman, Shqipëria ka qenë vendi i fundit, nga i cili pritej që t'i bashkohet forcave pro-amerikane kundër Sadamit. Por, Shqipëria ofroi bazat e saj për ushtrinë amerikane, ndërsa një kontigjent i ushtrisë shqiptare po shërben aktualisht në Irak, si shenjë e mbështetjes së gjithanshme të Shqipërisë ndaj SHBA.

Mbase është shteti evropiano-lindor, i cili ka bërë udhëtimin më të gjatë që të bëhet përkrahës i SHBA. Në këtë kuptim, ne nga perëndimi u kemi borxh shqiptarëve. Mbase edhe më shumë, pasi përkrah disa shteteve të tjera ballkanike dhe evropiano-lindore, Shqipëria po e paguan koston për qëndrimin që po mban. Franca dhe BE e dënuan Shqipërinë për shkak të dhënies përparësi lidhjeve të saj me SHBA, e jo me Bashkimin Evropian, sa i përket mbështetjes të SHBA-ve kundër Sadam Huseinit si dhe Gjykatës së Hagës.

Trupi Ekzekutiv i BE-së e kritikoi Shqipërinë lidhur me marrëveshjen e saj me SHBA, për mosekstradimin e qytetarëve amerikanë në këtë gjykatë. Shqiptarët, pasardhës të ilirëve, folës të shqipes, gjuhë që përbën një kategori më vete dhe dallohet nga gjuhët e tjera evropiane, e quajnë veten bij të shqipeve dhe janë popull krenar, që ka luftuar për lirinë dhe pavarësinë e tij gjatë gjithë historisë. Pavarësinë e tyre e fituan më 1912 ndërsa më 1920 Shqipëria u bë anëtare plotësisht e pavarur e Ligës së Kombeve.

Pas luftës së dytë botërore, diktatori stalinist Enver Hoxha, e sundoi Shqipërinë me një dorë të hekurt deri në vdekjen e tij më 1985, periudhë gjatë të cilës Shqipëria u dalluar për lidhjet e saj me Bashkimin Sovjetik, pastaj me Kinën dhe në fund me izolimin e saj nga bota. Kur Shqipëria u çlirua më në fund nga kontrolli komunist, ishte vendi që pati rrugën më të gjatë për t'u transformuar në një vend me sistem pluralist demokratik dhe me ekonomi tregu. Në dekadën e saj të lirisë, Shqipëria është përballur me skemat piramidale, krimin e organizuar, pastrimin e parave dhe korrupsionin. Politikisht pushteti ka kaluar mes PS (ish-komunistët) dhe Partisë Demokratike, lideri i së cilës, Sali Berisha, presidenti i parë jokomunist i rizgjedhur më 1996, u detyrua të largohet nga posti për shkak të protestave. Rebelimi i armatosur dhe anarkia çuan në vendosjen e trupave shumëkombëshe për rivendosjen e rendit dhe në rikthimin në pushtet të Partia Socialiste, në mes të 1997, e cila vazhdon ta qeverisë vendin dhe sot...

Administrata e Bushit kohët e fundit tregoi se i njeh kontributet e Shqipërisë në luftën kundër terrorizmit dhe mbështetjen e koalicionit të gadishmërisë. Sekretari amerikan i Shtetit Kolin Pauell, vizitoi Tiranën më 2 maj për të nënshkruar Kartën e Adriatikut dhe partneritetin me Kroacinë, Maqedoninë dhe Shqipërinë. Sekretari i Mbrojtjes Donald Ramsfeld e vizitoi Shqipërinë më 10 qershor, duke i shprehur mirënjohjen Ministrit të Mbrojtjes Majko, për nënshkrimin e marrëveshjes bilaterale me SHBA për mosdorëzimin e qytetarëve amerikanë në Gjykatën Ndërkombëtare Penale.