Numri 16 (26) i revistës letrare shqiptare "ars"

-- nga irhan jubica, kryeredaktor

revista letrare shqiptare
kryeredaktor irhan jubica
shqipëri - kosovë - mali i zi - maqedoni
del të dielën e fundit të çdo muaji
numri i parë doli më 31 mars 2002
kutia postare nr. 1526, tiranë, shqipëri
tel: +355692132186
[email protected]
www.arsalbania.tk

njoftim
për daljen e numrit 16 (26) të revistës letrare shqiptare "ars"

Për herë të parë në "ars" poetja dhe studiuesja arbëreshe Katerina Xukaro

Revista letrare shqiptare "ars" njofton daljen e numrit 16 (26), në Shqipëri, Kosovë e Mal të Zi, ditën e dielë, më 25 prill 2004, si dhe brenda pak ditësh edhe në Michigan, ShBA. Gjithashtu, së shpejti "ars" do të rifillojë të shpërndahet edhe në Maqedoni.

Revista hapet me esenë e shkrimtarit anglez Ian McEwan, të titulluar "Gjuha e nënës", inkuadruar në shtojcën "arsplus".

Editoriali me titull "Letërsia shqipe në morsën mes së kaluarës dhe së ardhmes" është shkruar nga Astrit Cani.

Tema qendrore e debatit të këtij numri është: "Mungesa e debatit, paaftësi apo frikë". Në lidhje me këtë temë, kanë shkruar ekskluzivisht për revistën letrare shqiptare "ars":
Hida Halimi: "Letrari i mirë këtu nuk ka kujt t'i shkruajë"
Ramadan Musliu: "Monologu i falangave intelektuale"
Blendi Kraja: "Një frymë, një lëvizje me ose pa manifest"
Donika Omari: "Mungesa e debatit, mungesë zhvillimi"
Ardian-Christian Kyçyku: "Ndjeshmëria jonë shkelet përditë me këmbë"
Myrvete& Begzad Baliu: "Riciklimi i debatit"
Gilmana Bushati: "Debati si përmasë lirie"

Ridvan Dibra: "Debato me vetveten"
Albana Temali: "Ekzistenca e krijimit kushtëzon lindjen e debatit"
Anton Gojçaj: "Debatet nuk mund ta zëvendësojnë letërsinë"
Mentor Haliti: "Para se të kapësh mollën në degë duhet të shkelësh barin"
Artan Muhaxhiri: "Mungesa e debatit, maja e ajsbergut në krizën kulturore shqiptare"

Studiuesi dhe përkthyesi Ardian Marashi në rubrikën e tij "serioz!sht", po në kuadër të debatit boton: "Debati? Kush foli?!"

Një vend të veçantë zë këtë numër edhe botimi i disa prej mesazheve të urimit që i kanë ardhur revistës "ars" në kohë të ndryshme nga shkrimtarë, përkthyes, botues e studiues të njohur shqiptarë dhe të huaj, si dhe dy përshëndetjet e posaçme për dyvjetorin e botimit, nga Kasëm Trebeshina dhe Musa Ramadani.

Në rubrikën "kohësi" drejtuesi i Shtëpisë Botuese "Buzuku", Abdullah Zeneli, boton artikullin "Fatmir Toçi, Bujar Hudhri dhe Bashkim Shehu; Coelho s'është kurrfarë shkrimtari se nuk e do Ismail Kadare", një reagim lidhur me konfliktin e fundit mes SHB "Buzuku" dhe SHB "Toena" mbi të drejtën e botimit të romanit "11 minuta" të autorit brazilian Paulo Coelhos në shqip. Shkrimi shoqërohet me letrën e znj. Raquel Carlús, përfaqësuese e Agjencisë Letrare "Sant Jordi Asociados" drejtuar "Buzukut".

Rubrikat e përhershme paraqesin:
Që nga ky numër poetja dhe studiuesja e mirënjohur arbëreshe Katerina Xukaro nis një rubrikë të re në revistën "ars", në të cilën do të pasqyrojë zhvillimet e sotme letrare të brezit më të ri të krijuesve arbëreshë. Rubrika emërtohet "premisa" dhe fillon me shkrimin "Poezia e re arbëreshe. Para-parathënie për një paraqitje"
"qiell i përtejmë" nga Jozef Radi: "Ndërmjetësim i vështirë"
"arbërisht" nga Mario Bellizzi: "Disa herë duhet guxim të vihesh kundër popullit", mbi moralin e dyshimtë të luftës.
"borges në shqip" përkthyer nga Astrit Cani: "Historia e jehonave të një emri", një ese e H.L.Borgesit që shënon edhe mbylljen e kësaj rubrike "poezi gjermane" përkthyer nga Ferdinand Laholli: Poezi nga Hans-Herbert Dreiske (shoqëruar me origjinalin gjermanisht).
"poezi ruse" përkthyer nga Arben Marku: Poezi nga Velimir Hlebnikov (shoqëruar me origjinalin në rusisht).
"poezi n'anglisht" përkthyer nga Blendi Kraja: Poezi nga Sir John Betjeman (shoqëruar me origjinalin në anglisht).
"mbishkrim" përkthyer nga Laura Shimili: Vazhdon botimi i librit "Letërsia dhe e Keqja" nga George Bataille "Baudelaire dhe statuja e së pamundurës".

Rubrikat e tjera paraqesin:
"refuzim": "Këshilla për skupin" nga Umberto Eco.
"ese": "Prototipi i shkrimtarit" nga Mentor Haliti.
Nisur nga ideja e një lëvizjeje të re kulturore shqiptare hedhur në shkrimin e numrit të kaluar "Nuk është kurrë vonë për një manifest letrar", poeti Bardh Frangu boton reagimin "Manifesti si tezgë në tregun e vlerave apo si anë e dytë e një medaljeje të njohur".

Për herë të parë botohet në shqip poezia "Shqipëri" e autorit gjerman të shekullit XVII, Christian Hoffmann von Hoffmannswaldau.

Letërsia shqipe këtë numër prezantohet me autorët: Trina Gojani, Abdurrahman Thaçi, Mustafa Ferizi, Luigj Gurakuqi, Anila Hanxhari, Pjetër Vukaj, Edison Maçaj dhe Gëzim Rasim Krasniqi, ndërsa letërsia e huaj me Eugenio Montale, Miltos Sakturis, Hans-Herbert Dreiske, Velimir Hlebnikov, Sir John Betjeman, Giorgio Caproni dhe Ilia Venizi.

Përkthimet e këtij numri janë realizuar nga: Andet Meçaj, Gilmana Bushati, Faslli Haliti, Halit Ajdini, Jozef Radi, Lavdimir Marku, Laura Shimili, Sokol Nika, Blendi Kraja, Astrit Cani, Irhan Jubica, Ferdinand Laholli, Arben Marku, Ilir Gjocaj dhe A. Zh.

Shtojca e përhershme "arsplus" kushtuar shkrimtarit anglez Ian McEwan, është përzgjedhur, përgatitur dhe përkthyer nga Gilmana Bushati.

Ky numër i revistës është me katër faqe shtesë, në të cilat botohet një speciale"teatri për fëmijë" nën kujdesin e Jeton Neziraj. Në katër faqet e kësaj shtojce dramaturgja dhe regjisorja suedeze Suzanne Osten boton "Fëmijët duan të vërtetën"
Shtojca e përhershme për nxënësit e shkollave të mesme "mars" është organizuar në formën e debatit me temë "Leximi, jo si detyrim shkollor" mes 13 krijuesve të rinj nga gjimnaze të ndryshme.

irhan jubica
kryeredaktor