Edhe Evropa mbetet në "darën" e kërcënimit të egër terrorist

New York NY: Duke u bazuar në komentet që i bëri kohë më parë media botërore, u tha se; kryeministri i Italisë Silvio Berluskoni, u bë synimi i parë i një kërcënimi serioz të një burrë shteti në Evropë, nëse do ta kuptojmë kështu, i një organizate terroriste pas asaj të 11 marsit, që na panë sytë me atë çka ndodhi në linjat e trenave të udhëtarëve në Spanjë. 191 vetë humbën jetë e qindra të tjerë u lënduan nga ky akt i paparë terrorsitë në Evropë. Kështu që më 28 korrik, thuajse të gjithë qemë deshmitarë se një organizatë terroriste, që deklaroi se ka lidhje me organizatën Al-Kaida, publikoi në websaitin e saj njoftimin kërcënues se: n.q.s. vendet evropiane nuk do të tërheqin sa më shpejt trupat e tyre nga Iraku dhe nuk do të shkëputin marrëdhëniet e aleancës me SHBA-në, ajo do të shpërthejë "luftën gjakatare" kundër Evropës.

Megjithëse, në shenjë kësaj radhe ishte dhe Berluskoni duke thënë se ai do të jetë objektivi i parë i goditjes, bota këtë e kuptoi si një kërcënim për gjithë Evropën. Mirëpo, po t'i referohemi informatave të tilla këcënuese nga kjo organizatë, kjo ishte hera e tretë gjatë këtij muaji që po kjo organizatë kërcënon me sulme Italinë, Anglinë, Gjermaninë e Francën. Kjo tregon se Evropa, ka edhe shumë punë për të bërë në drejtimin e luftës antiterroriste dhe mbetet nën "darën" fortë të një kërcënimi terrorist.

Këtë sinjal Evropës, tani thonë ekspert e terrorsmit ndërkombëtar, asaj (Evropës) ia jep organizata, që quhet "Brigada Abu Hafs Al-Masri" e cila është një degë e organizatës Al-Kaida. Në websaitin e saj, thuhet, se në rast se vendet evropiane "nuk do të kthehen në rrugën e drejtë", sipas tyre ajo do të ndërmarrë sulme kundër çdo qytetari evropian, duke filluar nga Berluskoni e deri tek qytetari i thjeshtë. Mbase ky është edhe një presion që përdorin terroristët për të futur në Evropë frikë e panik por nuk përjashtohet edhe mundësia se gjëra të tilla mund të ndodhin. Dhe rreziku i parë janë siç thuhet lojarat Olimpike Verore - Athina 2004.

Këto kërcënime e shqetësuan shumë Italinë, Greqinë, Anglinë, Gjermaninë dhe vendet e tjera evropiane. Specialistë anti-terroristë vunë në dukje se megjithëse kërcënimi nuk do të thotë pa tjetër ndodhje e sulmeve terroriste në masë, prapë, për shkak të incidentit të shpërthimit të 11 marsit në Madrid, vendet evropiane duhet të jenë domosdoshmërisht syçelët. Për ditë me radhë, Italia, Anglia, Greqia dhe Holanda kanë marrë përkatësisht një sërë masash për forcimin e parandalimit kundër sulmeve terroriste.

Analistët vunë në dukje se përballë elementëve ndërkombëtarë terroristë, që gjenden kudo, në sistemin anti-terrorist të Evropës ekzistojnë mungesa në 3 drejtime:

Së pari: vendet evropiane kanë shumë dobësi juridike në fushën anti-terroriste. Ndërmjetësuesi antiterrorist i Departamentit Amerikan të Shtetit, Kofer Blak vuri në dukje se, megjithëse vendet evropiane disponojnë pajisje të përparuara anti-terroriste, ato ndodhen përpara shumë problemeve të vështira në gjykimin e të dyshuarve terroristë dhe në zbatimin e ligjit. Krahas këtyre, ligjet e ndryshme të vendeve evropiane për emigrim dhe mbrojtje e rreptë e fshehtësitë personale i sjell pengesa luftës anti-terroriste.

Së dyti: nuk janë prerë me të vërtetë zinxhirët e organizatave terroriste ndërkombëtare në organizim dhe në fonde. Specialistët anti-terroristë janë të mendimit se organizatat terroriste mund të marrin lehtë fonde nga institucione islame bamirësie. Në sajë të lehtësirave turistike që krijojnë vendet evropiane, terroristët lëvizin pa pengesa në Evropë.

Së treti: vendet evropiane duhet të shtojnë bashkëpunimin antiterrorist. Vitet e fundit, brenda Bashkimit Evropian janë bërë thirrje të vazhdueshme për përmirësimin e sistemit të bashkëpunimit midis palës policore dhe sektorëve të sigurimit dhe për nxitjen me forcë të bashkëpunimit midis shërbimeve inteligjente të vendeve të ndryshme. Bile, ndokush bëri thirrje për krijimin e qendrës së posaçme evropiane të shërbimit inteligjent anti-terrorist. Por këto projekte kanë mbetur vetëm në letër dhe nuk janë konkretizuar anjëherë.