LOGOTERAPIA SI MEDITACION PSIKOLOGJIK

Viktor E.Frankl, "KU QËNDRON KUPTIMI I JETËS", psikologji aplikative, botoi "Shpresa", Prishtinë 2003, faqe. 192. Nga anglishtja përktheu Arbnore Gojani dhe Mr. Albert Ramaj nga gjuha gjermane.
ISBN: 9951-406-16-5

Libri i Viktor E.Frankl, "Ku qëndron kuptimi i jetës" është ndër librat e paktë meditativë të fushës së psikologjisë aplikative, përkatsisht "Logoterapisë", i cili i ofrohet lexuesit shqiptar në një kohë të duhur. Ky libër vjen në gjuhën shqipe në saje të përkthimit që i kanë bërë Mr. Albert Ramaj nga gjermanishtja dhe Arbnore Gojani nga anglishtja, sigurisht përkthyesit e kanë pasur parasysh luftën dhe tmerret që i ka pësuar populli i Kosovës dhe natyrisht edhe traumatizimet e shumta psiko-sociale, andaj kanë bërë përpjekje të sjellin diçka të vlefshme nga kjo fushë, në shërbim të këtyre njerëzve. Pra, libri i Viktor E. Frankl, është gjëja më sublime dhe shërbyese për qindra e mijëra njerëz të dalur me ankthe nga lufta e fundit që ndodhi në Kosovë, dhe më gjerë. Vetë jeta e Viktor Frankl, është një jetë e jetuar mbi trauma dhe mbi përjetime tronditëse, qoftë në faktin e humbjes së më të dashurve të tij, qoftë përshkak të përjetimeve të dhembëshme nëpër kampet e përqendrimit, sepse Frankl është "një psikolog që ka përjetuar kampin e përqendrimit" dhe më mirë se kushdo tjetër ka ditur ta trajtojë këtë problematikë. Jeta e Frankl ka qenë jetë vuajtjesh, por ai ka ditur t'i sfidojë të gjitha. Përballimi i vuajtjeve për të jetuar jetën, është sfida më e madhe e psikologut Frankl. Ai bëri hulumtimet më të mëdha për të gjetur mënyrat se si duhet për ta qetësuar njeriun e shqetësuar, të traumatizuar nga dhuna, nga trysnitë, nga përjetimet e tmerrshme dhe të pafundme, që i bëhen njerëzimit nga luftrat e mëdha. Frankl ishte njëri nga ata miliona njerëz të botës që përjetoi vuajtje të mëdha, që pati vdekje të më të dashurve dhe që qëndroi një kohë të gjatë nëpër kampet e përqendrimit. Ai nuk u dekurajua me fatin që ia kishte caktuar njeriu, përkundrazi ai në këto rrethana kërkoi dhe gjeti mënyra për ta shpëtuar vetveten dhe duke shpëtuar vetveten, ai mendonte se do t'i ndihmonte njeriut, pra atyre njerëzve që janë më të dobët, që dekurajohen më shpejt dhe që nuk kanë durim. Ai gjithmonë mbeti një hulumtues i pikëpamjeve psikologjike dhe në këto përpjekje ai do të zbulojë një rrymë psikologjike, që e quajti "Logoterapia".

E çka është "logoterapia"?, mund të shtrohet pyetja. Në pasthënjen që e ka bërë Mr. Albert Ramaj që shtrihet nga faqja (153-182), ai do të përkufizojë: "Logoterapia dhe psikoanaliza shqyrton kërkimin e vlerave dhe orientimin kah kuptimi në jetë si motiv kryesor i njeriut, pra "dëshira për kuptim", por "gjithësesi fjala Logoterapi është e lidhur me emrin Frankl, sepse ai është themeluesi i kësaj rryme psikoterapike", mbase logoterapia "ka të bëjë me psikoanalizën e Zigmund Frojdit dhe psikologjinë individuale të Alfred Adlerit, pastaj me psikologjinë analitike të Carl Gustav Jung, mirëpo Frankl, këtë e zhvilloi në një pikënisje të veten", faqe 162-163.
Logoterapia, po ashtu edhe libri "Ku qëndron kuptimi i jetës", janë në funksion të këtij qëllimi, pra në shërbim të njeriut të përvuajtur, për ta ndihmuar atë në situata të rënda dëshpërimesh shpirtërore, dhe padyshim të gjitha pyetjeve që ia bën njeriu vetvetës, pra në të gjitha situatat dhe rrethanat e mundshme, ai ka arritur t'ju japë përgjigje dhe jo vetëm kaq, ai me metodologjinë e vet ka arritur t'i nxjerrë prej batakut dëshpërues, përkatsisht të trajtojë të gjitha mënyrat se si duhet të sillet njeriu me vetvetën në këto rrethana.

Viktor Emil Frankl, ka lindur në Vjenë të Austrisë në vitin 1905, në një familje hebraike dhe ka vdekur po ashtu në Vjenë në vitin 1997. Nëna e tij ishte nga Praga, ndersa i ati nga Moravia. Qysh nga shkolla e mesme, Viktor E. Frankl vendosi të bëhet psikolog dhe qysh herët filloi të merrej edhe me filozofi. Ai ka botuar mbi 30 libra në këtë fushë dhe librat e tij kanë përfshirë rruzillin tokësor. Ai ka pasur suksese edhe në fushat e tjera, por psikologjia mbetet pasioni i tij jetësor. Poashtu dihet se Viktor E. Frankl personalisht ka përjetuar holokaustin e Luftës së Dytë Botërore. Nga viti 1942-1945, ishte vetë në kampin famëkeq të përqendrimit në Ausschwitz. Bile gjatë kësaj periudhe dhe pikërisht nëpër këto kampe përqendrimi ai i humbi prindërit, vëllaun dhe gruan që e kishte shtatzënë. Libri i tij "Ku qëndron kuptimi i jetës" vetëm në gjuhën angleze "Man's search for meaning" ështe shitur në Amerikë më shumë se 9 milion ekzemplarë dhe është përkthyer në shumë gjuhë të botës. Frankl ka qenë profesor për neurologji dhe psikiatri në universitetin e Vjenës, poashtu kishte katedra pranë universitetit në Dallas dhe Pittsburgh. Kurse në Kaliforni iu dha katedra e parë për Logoterapi. Ai është edhe themelues i "shkollës së tretë vjeneze të psikoterapisë". "Honoris Kausa" ështe shpallë në 29 universitete të botës, pra 29 herë ishte doktor nderi. Gruaja e tij e parë kishte vdekur në kampin e përqendrimit, kurse më 1947 martohet me Eleonore Frankl (mbiemri i mëparshëm i saj ishte Schwindt) dhe me të kanë një vajzë Gabriela. Si kuorizitet i rrallë, në biografinë e Viktor Frankl gjejmë të dhënën se ai, në moshën 67 vjeçare, është bërë pilot.

Librin "Ku qëndron kuptimi i jetës", përpiluesit e kanë ndarë në dy pjesë:
I. Një psikolog përjeton kampin e përqendrimit dhe
II. Sinkronizimi në Birkenwald.

I.
Pjesa e parë, e këtij libri ndahet në tri faza: Në fazën e parë autori i librit do të bëjë përshkrimin e hyrjes në kamp, përkatësisht fazën e pranimit, duke i regjistruar me vëmendje të gjitha reaksionet e personelit të kampit dhe reagimet e të burgosurve, sjelljet dhe gjendjen e tyre shpirtërore etj. Në fazën e dytë, bëhet përshkrimi i jetës në kamp, gjendja shpirtërore dhe dëshprimet e skajshme të të burgosurve, sëmundjet, streset psikike, dhuna kundër tyre, për punën e detyrueshme që kanë bërë, për të gjitha amoralitetet që kanë ndodhur dhe për të gjitha pasojat që ka sjellur jeta në kamp etj. etj.
Por qasja e Viktor E. Frankl, në këto rrethana nuk ka të bëjë me qasjen që i bënë një analist, një njeri i thyer dhe i dëshpëruar, as qasjes që ka mundur t'i bëjë një shkrimtar, ai të gjitha pikpamjet për jetën në kamp i shikon nga prizmi i një psikologu dhe me siguri ky përjetim do të ndikojë edhe në orientimin e tij të mëtutjeshëm profesional, duke u bërë një kërkues i metodave për t'iu shërbyer njerëzve, sidomos atyre që kanë përjetuar vuajtje e tmerre të ngjashme, dhe atyre që nga dhuna janë të traumatizuar, prandaj përfundimet e tija dalin si konstatime të sakta dhe shërbyese për të inkurajuar njeriun e depresionuar të cilit në shumicën e rasteve i ka dhënë përgjigje të drejtë.
Në fazën e tretë, autori flet për kohën "Pas lirimit nga kampi", për gjendjen e thyer shpirtërore të të burgosurit, për risocializimin e tyre dhe për riambientimin në shoqërinë normale, përpjekjet për t'ua larguar shqetësimet e nervozizmin, të gjitha si pasojë e jetës në kamp dhe zhgënjimet e pafundme për t'iu kthyer jetës normale, ngase në shumicën e rasteve manifestohej një gjendje e rëndë psikike dhe mungesa e vullnetit përfundimtar për ta riparuar moralin e degraduar gjatë kohës sa ishin në kamp. Kurse Frankl, në këtë periudhë do t'i përkushtohet jetës dhe hulumtimeve në fushën e psikologjisë, ku do të arrijë rezultate të mëdha në njërën anë dhe në anën tjetër ai do të bëhet mëshirues dhe njeriu që i ka ndihmuar miliona njerez, që kanë qenë në rrethana dhe kushte të ngjashme.

II.
Në pjesën e dytë të këtij libri prezentohet drama "SINKRONIZIMI NË BIRKENWALD", përkatsisht është "Një konferencë metafizike", e cila për herë të parë është botuar nga Frankl me pseudonimin Gabriel Lion në revistën "Der Brenner" (1948), që botohej në qytetin Insbruck të Austrisë. Edhe kjo dramë është plotsisht në shërbim të ideve psikologjike dhe të Logoterapisë së Viktor E. Frankl.