A E KEMI HAK KËTË KRYEMINISTËR?

Sipas “Korrierit” të djeshëm, ku ishte publikuar një përgënjeshtrim i përfaqësuesve gjermanë të “Mercedes Benz”-it, rezulton që kryeministri Fatos Nano na ka mashtruar të gjithëve lidhur me deklarimin e pasurisë. Nuk është mjaftuar me fshehjen e identitetit të “dhuruesit” të makinës së blinduar, e cila – sipas zërave nga opozita – kushton 360 mijë euro; përkundrazi, na ka dhënë një emër tjetër për tjetër, duke tërhequr në valle pa pikën e skrupullit njerëz e kompani private që s’kanë të bëjnë fare me këtë gjë. Na ka mashtruar në mënyrën më banale e më trashanike. Edhe një halabak do dinte të na mashtronte më bukur e më me lezet.

Në të njëjtën mënyrë, ai na ka mashtruar me historinë e pallatit tek “Shallvaret”, ku paska blerë me vetëm 35 mijë euro dy katet e sipërme të këtij pallati. Sipas “Shekullit” të tri ditëve më parë, ky pallat rezulton i regjistruar në hipotekë me emrin e një ndërtuesi, i cili praktikisht nuk ka asnjë lidhje me të. Edhe në këtë rast pra është fshehur shitësi i vërtetë. Si të mos ishte boll ky fakt, bëhet e ditur se dy katet që i janë falur Nanos (“falur”, pasi çmimi prej 35 000 eurosh është qesharak), nuk kanë qenë pjesë e projektit. Rrjedhimisht, kemi të bëjmë me një ndërtim të paligjshëm.

Siç shihet, mashtrimi është i dukshëm, arrogant dhe spektakolar. Kryeministri nuk ka dalë të bëjë ndonjë sqarim apo përgënjeshtrim të këtyre që thuhen e argumentohen në mënyrë të dokumentuar nga media. Eshtë zhytur aq thellë, sa me sa duket nuk ka ç’të thotë. Jo vetëm kaq. Ndoshta, nuk është përpjekur të gjejë alibi e përligjje, jo ngaqë nuk di të qepë një histori, nga e cila mund të dilte gjysmë i penalizueshëm, por ngaqë nga njëra anë përqesh ndjeshmëritë e shqiptarëve, të opozitës politike, të opinionit publik, lidhur me papërgjegjshmërinë e njerëzve në pushtet, nga ana tjetër shpërfill forcën e kapacitetet e shoqërisë shqiptare për t’u treguar vendin zullumqarëve në pushtet.

Ai është i sigurtë se mund të bëjë çfarë të dojë pa i hyrë gjemb në këmbë e pa qenë i detyruar të vihet me shpatulla pas murit. Sipas shumë gjasave, ai i konsideron shqiptarët një turmë syleshësh, të cilëve, edhe sapunin ua jep për djathë, edhe votat ua merr fët e fët. Sukseset elektorale të viteve të fundit, mendësitë prej skllavi të leadership-it socialist në mbështetje të tij, tufa e sejmenëve që i vjen rrotull dhe entuziazmi i kongress-men-ëve nëpër tubime partiake, mund ta kenë bërë vërtet ta shohë veten si një kapo të padiskutueshëm tribuje.

Gjatë gjithë këtyre viteve, shumëkush ka patur arsye të bëjë një sy qorr e një vesh të shurdhër përballë papërgjegjshmërisë së kryetarit të Partisë Socialiste e kryeministrit. Por ky mashtrim ditën me diell duhet të ketë tronditur edhe socialistët më fanatikë në besimin e tyre politik. Eshtë koha që shqiptarët të ndalen e të ngrenë pyetjen e thjeshtë: A e kemi hak ne një kryeministër të tillë? Trajtimi i këtij mashtrimi si një zullum më shumë në listën e zullumeve të një pushteti të pakonkurruar seriozisht, do të ishte edhe turpi ynë, gjithashtu. Fatos Nano, duke na hedhur syve këtë mashtrim që ia bën mu, “na ka dalë borxhit”. Kjo që sapo thashë është cinike, por është e vërtetë.

Duhet të jenë socialistët ata që duhet të reagojnë të parët. Ndoshta është shansi i fundit që u vjen në dorë për të dëshmuar përgjegjësi e përgjegjshmëri. Nuk kanë pse të ngarkojnë veten me mëkatet e një njeriu, i cili i ka përfaqësuar në mënyrën më të padenjë. Duhet ta ngrenë zërin, jo thjesht për të mbrojtur partinë e tyre nga njollosja fatale e për të mbrojtur një pushtet të harxhuar deri në pikën e fundit, por edhe në emër të respektit për veten.

Më tej, është radha e Inspektoriatit të Verifikimit të Pasurive. Kryetarja e këtij Inspektoriati, në vend që të na dhurojë buzëqeshje e entuziazëm nga ekranet e televizorëve, bën mirë të ngjitet në lartësinë e detyrës së vet. Ajo duhet të na njohë me qëndrimet e përfundimet e saj. Ka shumë njerëz që dyshojnë në kurajon e Laskajt për t’i hequr petët lakrorit e për të denoncuar paudhësitë e të fuqishmëve të këtij vendi, por nëse është vërtet kështu, është koha për t’u tërhequr nga kjo detyrë. Në mos, le të shkojë të pijë kafe andej nga Prokuroria e Përgjithshme, ku ka boll zyrtarë ngalakaqë e të trembur.

Më në fund, është radha e vetë Fatos Nanos të kuptojë, se i është bërë barrë partisë së vet, pushtetit, maxhorancës. Ndoshta është koha për të marrë vendimin e madh. Eshtë koha për të ikur, pa ceremoni e pa tam-tam-e. Nuk është se duke ikur do të na bëjë ta shohim si një gentleman, por me këtë veprim mund t’i bëjë të vetmin shërbim vendit të tij. Ka gjithmonë kohë e mënyra për t’i shërbyer vendit tënd. Kjo vlen edhe për alter-ego-n e tij, Berishën, i cili çuditërisht kish harruar të shtonte në listën e pasurive të tij të patundshme tre katet e një ndërtese, që ne e thërrasim në mënyrë eufemistike “Selia e Partisë Demokratike”.