Ka përfunduar afati i leximit dhe vlerësimit nga ana e komisionit për librat më të mirë të botuar gjatë vitit 2003.
Kryesia e Shoqatës së Shkrimtarëve Shqiptaro- Amerikanë, qysh para tre muajsh kishte shpallur konkursin "Pena e artë", dhe kish ngritur për këtë qëllim një komision vlerësues të përbërë nga shkrimtarë, publicistë dhe studjues të njohur letërsie.
Konkursi "Pena e artë"synohet të jetë i përvitshëm duke u shndërruar në një traditë mes krijuesish që jetojnë në SHBA.
Siç është bërë e ditur edhe më parë, ky konkurs synon të vërë në lëvizje gjithë potencialin krijues, për të shkuar gjithsecili drejt vlerave të vërteta në fushën e letrave. Komisioni vlerësues ka shpallur sot fituesit e çmimit "Pena e artë për vitin 2003". Ata janë:

1. Gjekë Marinaj, për librin e tij publicistik të titulluar "Ana tjetër e pasqyrës"
2. Naum Prifti, për librin e tij me tregime humoristike të titulluar "As Miço as Muço"
3. Valter Lazeri, për librin më të mirë me poezi të titulluar "Shkruar nëpër udhë".

Këto çmime u akorduan nga një komision letrar i përbërë nga Faruk Myrtaj, -shkrimtar, poet dhe publicist; Dalip Greca,- publicist; Nikolin Narkaj, studjues letërsie; Ilir Seci, - studjues dhe kritik letrar si dhe Adnan Mehmeti, - poet.
Sipas arsyetimeve të bëra nga anëtarët e komisionit dhe të dërguara me shkrim në adresë të Kryesisë së Shoqatës, në konkurs ka patur një pjesmarrje të kënaqshme në raport me numrin e shkrimtarëve që jetojnë në kushtet e migrimit.
Intervistat e Gjekë Marinajt tek "Ana tjetër e pasqyrës"- janë vlerësuar nga komisioni si thellësishtë transparente në raportin intervistues - të intervistuar, madje të hapura edhe për lexuesin. Artisti dhe politikani, sportisti dhe shtetari, krijuesi dhe njeriu, të cilit i është dashur të shpallë luftëra, shqiptari dhe jo-shqiptari i intervistuar nga Marinaj, është së gjithash vetëm NJERIU.
"Ana tjetër e pasqyrës" është vlerësuar nga komisioni si një libër që realizon intervistën poetike, një libër që do të respektohej dhe vlerësohej prej çfarëdolloj jurie.
Një vlerësim të parë ka marrë, siç e thamë, edhe libri me tregime humoristike "As Miço as Muço" i shkrimtarit të njohur Naum Prifti.
Anëtarët e komisionit vlerësues janë të një mendimi që tregimet në libër janë të një mjeshtri të moshuar tashmë. Një realizim i ofruar përmes humorit, të një humori të ndriçuar nga njerëzillëku, vese dhe vyrtyte të sjella si kompleksitet njerëzor. Gjuha e pasur dhe subjektet të zgjedhura.
Valter Lazeri është vlersuar nga komisioni për një realizëm poetik të sinqertë, për vargun e ngjeshur dhe mendimin e kthjellët . Poeti e ka vjelur tharmin e vargjeve nga jeta, e cila duket se ka lënë gjurmë të pashlyeshme jo vetëm me bukuritë, por edhe me shqetësimet që sjell. "Shkruar nëpër udhë" është padyshim një kontribut në poezinë shqipe.
Pavarësisht prej rezultatit final të votimit të anëtarëve të komisionit vlerësues, gjatë leximit të librave të paraqitur për konkurim, janë hasur edhe vlera të tjera në artin e krijimtarisë, të cilat, ndonëse nuk kanë arritur të fitojnë këtë garë,autorët e tyre janë padyshim një kontribut në letërsi si dhe një premtim akoma më I madhpër të ardhmen. Vlejnë të përmenden këtu libra si volumi poetik i shkruar në gjuhën angleze nga autori Sami Milloshi dhe I titulluar : "Not enaugh time to die".
Një shqetësim në vargje për anën e sëmurë të përditshmërisë ku njeriu mbetet njeri me gjithë dashuritë e dhimbjet që ka. Një përpjekje për të triumfuar drejt të vërtetave të mbytura, që rënkojnë e që përpiqen të çlirohen nga mllefet, mungesat dhe streset.
Gjithashtu edhe "Bukuri tridimensionale" dhe "Kjo është Amerika" me autor Agim Bacellin. Sabije Dervishi Veseli, me "Pse u dashurove tek unë" dhe "Re dhe vetëtima" të autorit Hekuran Bido etj.
Kryesia e Shoqatës së Shkrimtarëve Shqiptaro - Amerikanë i uron fituesit e kësaj gare, dhe njëkohësisht i fton anëtarët e shoqatës, që vitin e ardhshëm të angazhohen me një pjesëmarrje më të gjerë në konkurs.