Vendi i shqiponjave i është mirënjohës Shteteve të Bekuara të Amerikës

I nderuar administratori gazetes Shkodra,
I nderuari z. Kabil Bushati

Ndoshta nxitohem, për të shprehur një mendim, që besoj se duhet të jetë edhe i ndjenjave tuaja, në ndihmë solidariteti për popullin fisnik amerikan. Në këto ditë të vështira, që po kalojnë zonat e përmbytura nga uragani shkatërrimtar Katrina, ne duhet të jemi pranë popullit amerikan. Duke ndjekur këtu në New York, çdo ditë lajmet që vijnë Live nga këto shtete, kushdo ndjen dhimbje dhe me sa ka mundësi përpiqet të bëj diçka në ndihmë, të këtij populli që në qershor të vitit 1999 dërgoi bijtë më të mirë të saj (me aviona) për të sjellë lirinë e popullit tonë, që gëzojmë sot të gjithë bashkatdhetarët kudo që jemi.

Për të qenë më konkret, po ju njoftoj, se Shoqata e Shkrimtarëve Shqiptaro – Amerikanë, më 9 shtator 2005, ka dhuruar $500 nga $600, që kishte të depozituar në Bank. Ndoshta është ndihmë modeste, por ndihma nuk matet me sasi por me njetin e mirë e sipas mundësisë. Këtë veprim, e kanë bërë edhe përsona individuale bashkatdhetarësh me banim në Dallss të Texas - it. Nuk di, se cili është kontributi i organizatave e insititucioneve fetare në shtetin e New York - ut ku unë jetoj prej disa vitësh. Unë detyrimin tim qytetar e kam bërë drejtpërdrejt në Manhattan, ku dhe punoj.

A është koha, që tashti ne shqiptarët të tregojmë respektin dhe mirënjohjen ndaj një shteti mik, që për ne është gjendur në ditët më të vështira të popullit tonë, kur makina shfarosëse e Sllobodan Millosheviqit bëri me dhunë shpërnguljen biblike të popullit më të lashtë në Europë, duke e shoqëruar me masakra të përbindshme. Ndërsa Europa, flinte dremiste, përpara gotave të wisk-it, shampajës, metaxa-s dhe e dehur nuk shihte gjakun qe njomte ekranet televizive amerikane, Amerika bëri të sajën dhe vendosi fatin tonë në LIRI...

Dua t’ju them se në një metro të New York-ut, kam parë një grup muzikantësh nga Peruja (shteti me kulturën më të vjetër në të dy amerikat), që fëmijëve të vegjël kosovarë, u kanë kushtuar tinguj muzikorë dhe i binin me pasion veglave të tyre popullore karakteristike. Iu afrova Jesus dhe e pyeta, se ku e ke marrë spunton, për krijimin e kësaj pjese muzikore, ai mbasi u mendua pak më tha: nga eksodi biblik i këtij populli, kur në CNN, Fox News, ABC etj., shihte lot dhimbjeje, që preken rëndë familjen time. Pra, një bir i një populli të lashtë peru-jan, mbronte një fëmijë të një populli po të lashtë në Europë…

Duke mos u zgjatur në shumë episode të tilla, dua të them, se një kolonë me makina të bashkëatdhetarëve tanë nga Texas-i, dërguar sende të nevojshme pranë Stadiumit, në pika grumbullimi të njerëzve në nevojë, duke bashkëpunuar me Kryqin e Kuq Amerikan. E shqiptarët, kur merrnin falënderime, për ndihmat e blera në dyqane të Texas-it, amerikanët, habiteshin për njetin e mirë të vendit të shqiponjave, aty ku zuri fill jeta shqiptares së madhe humaniste Nanë Tereza…

Sugjeroj:
Nëse do të gjej edhe mirëkuptimin e madh tuajin, të bëjmë sa të mundemi nga vendlindjet tona, për t’i treguar amerikanëve sensitivë, se ne shqiptarët u jemi mirënjohës, se na dhuruat përmes jetës tuaj (duke e vënë në rrezik) LIRINE. Mendoj, se populli fisnik dhe bujar i Kosovës dhe Shqipërisë, shqiptarët në Mal të Zi e Maqedoni, i ka mundësitë (më mirë pak se aspak), për të shprehur bujarinë, që të heq nga kafshata e bukës bujare një pjesë për t’ia dërguar përmes Kryqit te Kuq në Kosovë (KKK) si ndihmen financiare.

Dihet se populli i Kosovës e i Shqipërisë, ndihmohet shumë nga ne që jetojmë në emigracion. Ne duam, që ju nga vendlindja të dhuroni 10 euro për çdo kryefamiljarë dhe 5 euro për fëmijë, duke i treguar botës, se 7 milionë shqiptarë (që jetojnë në 5 shtete), kanë dhuruar shumën, që del nga bujaria e zemrës si shenjë mirënjohje të përhershme me popullin amerikan. Këto ndihma financiare mendoj se nuk duhet të mblidhen nga individë ose shoqata, por vetë njerëzit të shkojnë pranë KKK dhe të bëjnë njetin e tyre.

Media duhet të bëj rolin e saj për sensibilizimin e popullit të Kosovës, që asnjëherë nuk e harron ShBA për lirinë e dhuruar. Pak sekonda të shohim LIRIDONAT eksodin biblik të vitit të zi 1999 dhe gjithçka është e qartë. Eshtë kjo Amerikë, senatorët e kongresistët amerikanë, ku ne kemi shtëpinë tonë të dytë, që po bën shumë për Pavarësinë e popullit tonë. Ndoshta ju dhe të tjerët do të kenë mendime më të avancuara se të miat, por e rëndësishme është qëllimi i përbashkët për të ndihmuar popullin fisnik amerikan.
Falëminderit për mirëkuptimin!
Zoti ju bekoftë të gjithëve!