Italianët: Kopliku, mundësi të shkëlqyera për biznes

TIRANË - Drejtori i Shoqatës së Sipërmarrësve Italianë në Shqipëri, Vincenzo Pastoressa, sqaroi për gazetën se është zgjedhur pikërisht Kopliku për të zhvilluar këtë investim, për shkak të pozicionit të tij shumë të volitshëm gjeografik dhe forcës punëtore në dispozicion. “Kopliku ofron mundësi shumë të mira si zonë strategjike, ndaj zhvillimi sipërmarrës parashikohet të ketë ritme që do të krijojnë rreth 100 mijë vende të reja pune”, - tha Pastoressa. Ai sqaroi se vendi ku do të ndërtohet zona industriale ndodhet 18 kilometra larg Shkodrës dhe është një zonë e gjerë rreth 70 ha. “Kemi ndër mend të ndërtojmë hotele, një qendër këshillimi për të gjithë sipërmarrësit, shkolla për formim menaxherial, si dhe qendra të pajisura sipas nevojave të investitorëve, në mënyrë që të përftohet një ide e qartë e nevojave të operatorëve të ndryshëm, qofshin të huaj apo lokalë,” u shpreh përfaqësuesi i sipërmarrësve italianë.

Sipas Pastoressa-s, në këtë sipërfaqe do të krijohen hapësira dhe njësi nga 150 m2 deri në 10 mijë m2, si dhe hapësira për prezantimin e mallrave të firmave që do të operojnë në këtë zonë, një filial doganor, një filial banke, në mënyrë që të përmbushen nevojat dhe të lehtësohet puna e sipërmarrësve që duan të investojnë në këtë zonë. “Ideja është që gjithçka që do t’i nevojitet një biznesi të ri do të gjendet në këtë zonë, duke siguruar në këtë mënyrë të gjithë infrastrukturën e nevojshme. Zgjodhëm Koplikun sepse ndodhet në një zonë strategjike, shumë pranë vendeve të tjera të Ballkanit,” sqaroi drejtori i Shoqatës së Sipërmarrësve Italianë në Shqipëri.

Pastoressa theksoi se kjo zonë ndodhet vetëm 12 kilometra larg kufirit me Malin e Zi dhe në përgjithësi ndodhet shumë pranë të gjitha vendeve të pellgut ballkanik, çka ofron mundësi shumë të mira të infrastrukturës së qarkullimit të mallrave dhe shërbimeve, duke ofruar një treg prej rreth 60 milionë konsumatorësh të mundshëm. “Gjithashtu, zona ku duam të investojmë, ndodhet vetëm një orë larg aeroportit “Nënë Tereza”, një orë nga Podgorica, ku po ashtu ndodhet një tjetër aeroport, pak më shumë se një orë nga porti i Durrësit, pra kemi të bëjmë me një zonë me të vërtetë strategjike”, - u shpreh ai.

“Duke qenë se në këtë mënyrë, përmes investimeve, kjo zonë e pazhvilluar do të ketë mundësi të mira të zhvillimit ekonomik, ne kemi patur edhe përkrahjen e qeverisë shqiptare”, - tha Pastoressa, duke shtuar se në afatin e gjatë, kjo zonë industriale do të kërkojë investime që shkojnë në disa dhjetëra milionë euro. Sipas përfaqësuesit të investitorëve italianë, në këtë zonë do të vendosen rreth 100 ndërmarrje të vogla dhe të mesme, sidomos në sektorin e manifakturës, çka do të thotë se mund të krijohen rreth 100 mijë vende pune. “Për momentin ka shumë interes nga investitorët dhe nëse ky interes vazhdon të qëndrojë i tillë, mendoj se brenda tri vjetësh mund të zhvillohet e gjithë zona”, - përfundoi Pastoressa.