Po ashtu, këtë numër nis ribotimi i nji serie shkrimesh që kanë të bajnë me panoramën e pandryshueshme kulturore shqiptare. Kjo gja bahet jo veç për me konfirmue faktin që n'"ars" asht shkrue s'pari për probleme të randsishme të letërsisë e kulturës shqiptare, por dhe se këto shkrime vazhdojnë me mbetë aktuale. Përzgjedhja ka me qenë funksionale, jo kronologjike. Rubrika e re titullohet "në kohë" dhe hapet me shkrimin e autorit Ardian Marashi "Kadareja? Po kjo është loja!", botue s'pari në numrin 31 të revistës (3 tetor 2004).

Ndër studimet, recensat dhe shënimet kritike mbi libra dhe autorë, n'këtë numër botohen:
- "Arshi Pipa dhe Kosova e poezisë së tij" nga Myrvete Dreshaj-Baliu & Begzad Baliu;
- "Trebeshina, askush nuk është profet në vendin e vet" nga Anila Xhekaliu - nji shikim mbi prozën e autorit Kasëm Trebeshina të botueme nga revista "ars" në librin "Më përtej kohërave";
- "Lirizmi i Rreshpjes, brigjeve të revoltës" nga Isak Eshrefi;
- "N'Itakën e vet po pushon përjetësisht Zejna Halili" nga Nijazi Ramadani;

Në rubrikën e përhershme "premisa" studiuesja Katerina Xukaro boton shkrimin "Leonardo Tartaljone, vjershat si tabllo në lëvizje", si dhe poezi nga ky autor bashkëkohor arbëresh.

Ndër materialet e tjera të këtij numri veçojmë:
- "Ammiel Alcalay: Me qenë shkrimtar don me thanë përgjegjësi" - intervistë ekskluzive me poetin amerikan, realizue nga Erica Weitzman;
- "Robert Bly: Kemi lexues të shpëlarë nga trutë" - intervistë me shkrimtarin amerikan, shoqnue me poezi nga i njajti autor;
- "Dritaret e ndriçuara" nga Enrique Villa-Matas;
- Blendi Kraja: "Gazetari i 'ars'-it apelon vendimin e gjykatës" - nji reagim i gazetarit Kraja ndaj vendimit të njianshëm të dhanë nga drejtësia shqiptare në dam të tij.

Letërsia shqipe këtë numër prezantohet me autorët: Musa Ramadani, Leonardo Tartaljone, Kujtim Morina, Lutfi Lepaja, Dhori Thanasi, Algert Siqeca, Dritan Zaimi, Bajram Sefaj, Elmaze Grainca, Tahir Foniqi e Pal Ndrecaj, si dhe me fragmente nga krijimtaria letrare e arvan itasve, mes të cilëve edhe Marko Boçari, fragmente prej poemës "Për të parën principeshën tonë Leksandra" (1889).
Letërsia e huaj përfaqësohet me: Ammiel Alcalay, Robert Bly, Natalia Ginsburg, Johan Wolfgangh Goethe e John Fante.

Mërgim Korça sjell nji përkthim të ri në shqip të "Mbretit të Tulës", poezisë së njoftun të Goethes, të ballafaqueme me origjinalin si dhe me katër variante të përkthyeme ma parë prej Ndre Mjedjes, Sejfulla Malëshovës, Vehbi Balës e Jorgo Bllacit.

Përkthimet e këtij numri janë realizue nga Gilmana Bushati, Astrit Cani, Blendi Kraja, Anila Xhekaliu, Esmeralda Jubica, Mërgim Korça e Flurans Ilia.

Ribotimi i fragmenteve nga krijimtaria e nxjerrë prej hulumtimit të gazetës "Drita" të këtij numri përkon me vitin e vdekjes së diktatorit komunist të Shqipnisë, Enver Hoxha. Krijimet që përshkruejnë dhimbjen e thellë të shkrimtarëve shqiptarë për humbjen e udhëheqësit dhe frymëzuesit të tyne më 1985, nisin prej Natasha Lakos e Marash Hajatit, e vazhdojnë me emnat e Luan Qafëzezit, Balil Gjinit, Petrit Sinanit, Nonda Varfit, Xhaferr Martinit, Robert Goros, Spiro Gjikondit, Muzafer Xhaxhiut, Vullnet e Sulejman Matos, Hysni Milloshit, Teodor Kekos, Koçi Petritit, Vojsava Nelos, Arben Dedjes, Bashkim Kuçukut, Isuf Nelajt, Dhori Qiriazit, Ismail Kadaresë, madje edhe të grekut Llambro Mallamas, për me u mbyllë numrin e ardhshëm të revistës.

Nji vend i veçantë i asht kushtue nji shkrimi të gjatë programatik e ideologjik t'autorit Ismail Kadare, me titull "Realizmi socialist - arti i madh i revolucionit". Artikulli i botuem jorastësisht në gazetën-organ të Komitetit Qendror të Partisë së Punës së Shqipërisë, "Zëri i popullit", dt. 13 janar 1974, asht nji përpjekje serioze dhe e sinqertë e autorit për me legjitimue nga pozita dogmatike, sulmet personale dhe të pushtetit që ai përfaqësonte si zëvendës i grues së diktatorit Hoxha në Frontin Demokratik, ndaj emnave ma të shquem të artit të vërtetë botnor dhe shqiptar: "…Gjergj Fishta. Fanatik i tërbuar, idealizues i çdo gjëje patriarkale, apologjet i fesë, i institucioneve mesjetare, hymnizues i primitivizmit, armik i egër i çdo përparimi, - ky është portreti i këtij letrari prift… Filo italian i papërmbajtshëm, agjent i Vatikanit, emisar i pushtimit fashist, partizan i çkombëtarizimit dhe i romanizimit të kulturës sonë… Të njëjtin shembull na jep figura e letrarit fashist Ernest Koliqi."
"…Djathtizmi i T. Lubonjës e F. Paçramit, kozmopolitizmi, urrejtja për folklorin dhe antishqiptarizmi i tyre, treguan edhe një herë se lufta e klasave në terrenin e letërsisë dhe të arteve është e gjallë dhe do të jetë e tillë për një kohë shumë të gjatë."
Tu' mos u mjaftue me denigrimet e shkrimtarëve, autori e zgjanon objektivin e shkrimit edhe me goditje ndaj shtyllave të kulturave botnore: "…Bibla dhe Kurani, këto puse të pashtershme idesh reaksionare". Për këto dhe të tjera qëndrime koherente të këtij autori, "ars" e riboton të plotë artikullin e bujshëm të asaj kohe.

Shtojca "arsplus" asht përgatitë nga Arben Llalla dhe i kushtohet fillimeve të letërsisë së shqiptarëve të Greqisë. Veç burimeve historike, autori e ilustron studimin e tij me krijimtarinë e asaj periudhe.